الموضوع: لو حد من طنطا يدخل هنا

السلام عليكم ورحمة الله وبركاته
كل سنة وانتم طيبين يارب تكونو بخير
انهاردة يوم مش جميل خالص خالص ( أستغفر الله العظيم ) ربنا يسامحنى انى بقول كدا
انا من المنوفيه وكنت نازل طنطا علشان اجدد شهادة التجنيد بتاعتى ومن حظى الجميل بدل ما اخد طريق شبين طنطا او جنزور اخدت الطريق السريع وعند ميت حبيش وقفونى فى لجنة ولقيت الامين اخد الرخص وقالى انزل كلم الظابط
نزلت اكلم الباشا الضابط وفوجئت بانه بنى ادم فظيع بجد بيتكلم بمنتهى التناكة اللى خلقها ربنا فقولت استنى لان فى ناس كتير حوالية هو ماشاء الله خلص الدفتر كاملا ولما لقيت الدنيا فظيت حوالية وطبعا كل الوقفة دى كانت فى الشمس وسعادته قاعد فى عربيتة كلمتة قلتلة صباح الخير قالى نعم قلتلة يافندم انا من المنوفيه وجاى علشان التجنيد ومن حظى الجميل انى قابلت حضرتك وكل سنة وانت طيب وانا بتعشم فى كرم حضرتك انا زى اخوك الصغير وانا والدى يبقى عميد شرطة زميل حضرتك يعنى ووريتة الكارنية وعلى فكرة انا مش صغير انا عندى 26 سنة وبشتغل محامى فى مطار القاهرة قالى انت مخالف ودا الوصل ياتدفع دلوقتى 150 جنية ياتجيلك المنوفيه وتدفع 300 جنية قلتلة وحلفتله بايمانات المسلمين انى من المنوفيه ومعيش غير 100 جنية وفتحتله المحفظة حتى علشان يتاكد قالى مليش دعوة ومتقرفنيش بقى وتزهقنى امشى قلتلة قلتلة طيب حضرتك ممكن تنزلى المخالفة بما يتناسب مع الفلوس اللى فى جيبى دلوقتى برضة مرضيش حضرتك انا بكلمك بكل ذوق وادب ليه حضرتك ترد عليا كدا رد ردود عجيبة الشان وحتى مرضاش يكلم والدى على التليفون بالرغم من ان سعاتها امين من اللى كانو معاه كلم امين زميلة وجاب الرخصة لعربية نيو اكسنت سماوى كانت نمرها مطموسة المهم مطولش عليكم قلتلة طيب ياسعادت الباشا اروح اجيب فلوس واجى بس لوملقيتش سعادتك هنا اجيلك فين قالى تعالالى المرور كمان ساعه المهم اخدت اول يوترن وروحت البيت جيبت فلوس ورجعت على الكمين كانت بقت الساعة 1.30 الضهر لقيت الكمين مش موجود روحتلة الادارة العامة للمرور زى ما قالى قالولى ادفع ونديك الرخصة دفعت قالولى الرخصة مع البية الضابط فى ميدان الجمهورية روحتلة الميدان اسال علية قالولى عند المحافظة روحت المحافظة قالولى عند كنتاكى المهم روحت هناك لقيتة بقولة سلام عليكم انا روحت لحضرتك المرور ملقيتش سعادتك ودفعت هناك وقالولى اجى اخدها من حضرتك قالى لا يابية انت دفعت لضابط تانى ودا مش من حقة حضرتك لازم كنت تدفع عندى انا وزقنى بإيدة المهم قلتلة حضرتك انا مش بتاع البهدلة دى كلها ياباشا بعد اذنك ادينى الرخصة انا خلاص دفعت المخالفة وتعبت وحضرتك انا بشتغل فى القاهرة وعندى شغل بعد الفطار على طول ياريت حضرتك تساعدنى وتدينى الرخضة قالى لا تعالى المرور بكرة الصبح خدها قلتلة حضرتك انا كنت المفروض انى انام فى بيتى انهاردة اريح علشان عندى بيات فى شغلى بعد الفطار ونزلت علشان اجى التجنيد لا خلصت مشوارى ولا نمت وكمان اتبهدلت وبترجى حضرتك بعد ما دفعت المخالفة وحضرتك ياريت تساعدنى بقى برضة مفيش ميل عليا امين شرطة جنبة وقالى استنى شوية وكلمة تانى الساعة بقت 2.30 المهم لقيت الباشا دخل محل موبايلات بين مغربى وكنتاكى وقعد فى التكييف دخلتلة بعد شوية قلتلة حضرتك انا عشمان فيك تدينى الرخصة علشان اروح وطلعتلة كارنية شغلى اللى بيثبت انى شغال فى المطار قالى انت رايح شغلك امتى قلتلة بعد الفطار والله العظيم قالى طيب استنانى برة شوية طلعت استنيت سعادتة نص ساعة فى الحر وهو قاعد فى التكييف ودخلتلة تانى قالى انا مش قلتلك بكرة طبعا انا مسكت نفسى وقلتلة حضرتك انا عشمان فيك انا لو اول ما دفعت ككلمت والدى وقلتلة ان حضرتك اديتنى الرخصة لما شفت الكارنية ومينفعش ارجع بيتى دلوقت من غير الرخصة فبعد اذنك ادينى الرخصة ساعتها كلمة مدير المرور على الجهاز قالة ياهشام انا عاوز مخالفتين عكس السير قالو ياباشا عينى هجيبلك تلاته
وقام وسابنى وانا مشيت وراه بالعربية لقيتة شال موتسكلين ومن ضمنهم واحد بتاع دليفرى تقريبا مكتوب علية المنشاوى وفزبة فبكلمة قلتلة بعد اذنك الجو حر والدنيا صيام ارجوك ادينى الرخصة قالى استنانى مكان ما جيتلى وانا لما ارجع اديهالك المهم روحت هناك واستنيتة لحد الساعة 4.45 العصر وادانى الرخصة بذمتكم دا يرضى ربنا انا دلوقتى عرفت ليه الناس بتبيع عربياتها علشان تتحاشى التعامل مع المرور اصلا الضابط دا اسمة رائد / هشام سلام
بجد حسبى الله ونعم الوكيل الف مليون مرة ويارب يتغم زى ما غمنى وحرق قلبى

المشاركة الأصلية كتبت بواسطة shadishamel

متشغلش بالك عشان البلد دي عمرها ما تنضف انا عندي تاكسي في طنطا بتاعي وبشتغل انا عليه ومن خلال خبرتي الصغيرة اقدر اقولك ان بلد زي طنطا مثلا بتلاقي المرور فيها بايظ جدا وتقريبا مفيهاش امن وممكن يطلع عليك بلطجي قدام المحافظة وقدام لواءات شرطة ومحدش يقولك انت فين هو كل همهم انهم يشتغلوا ويلموا السبوبة
يني كام مخالفة من هنا علي كام محضر من هناك وتبأي جبرت بالنسبالهم والبلد زحمة والمرور فيها بايظ ومليانه بلطجية وهما ولا هنا
متشغلش بالك ومتحرقش في دمك

قدر الله وماشاء فعل والحمد لله
المشكلة ان الواحد بيتعامل باحترام مع ناس قليلة الاحترام
ربنا يحمينا من شرهم ويبعدنا عنهم