الموضوع: ارجو المساعدة من خبراء الهيونداى والسوزوكى

المشاركة الأصلية كتبت بواسطة amanda

مش عارفة اقول لحضرتك ايه استاذ axel على ذوقك وافادتى
معلشى استحملنى لانى ان شاء الله هشترى بعد العيد اذا امر الرحمن
طيب انا ان شاء الله هتوكل على الله واشترى السوزوكى
يبتبقى انى استقر الالتو ولا الماروتى - لكن هعرف ازاى انا معرفش حد معاه العربيتين علشان اجربهم
وهل المبلغ اللى معايا يجيب التو حلوة ؟ - ومنين؟
وهل مشاكلها قليلة بردوا ولا الماروتى افضل؟

و لا يهمك اي استفسار اتفضلي و ان شاء الله نرد ع حضرتك

اه يجيب التو 2008-2009 800 سي سي بس فاضية بدون اوبشنز الحمد الله الاتنين مفيش اي مشاكل مفيش غير ان قطع الغيار اعلي من الماروتي شوية
اهم حاجة متابعة الصيانات و العربية هتفضل زي الفل ان شاء الله و طبعا اول ما العربية تجيبيها طالما مستعمل هنقولك ع شوية صيانات تتعمل للعربية عشان تبدأي معاها زي ما بيقولوا من أول السطر بغض النظر عن المالك السابق عمل ايه

و الماروتي زي ما قولنا ياما زيرو مقدم و تقسطي و ده افضله من وجهة نظري
ياما مستعمل و ديه بالمبلغ اللي معاكي تجيبي 2010-2011 و ممكن موديل اقل سنة و طبعا المبلغ بينقص و بيعتمد ع الحالة برده

اما منين ياما معرض يا اما سوق السيارات ياما تلاقي عربية معروضة للبيع ماشية في الشارع
و في كل الحالات لازم يكون معاكي ميكانيكي ثقة برده عشان يبص ع العربية كلها ميكانيكة و صاج و عفشة و يتمنها
و لو نزلتي سوق متخليش الميكانيكي يقابلكم هناك او يعرف انتوا نازلين عايزين ايه
لأن ساعات الميكانيكي يعرف انتي عايزة ايه و يقولك اقابلكم هناك و هناك ياخد لفة محترمة يربط مع اللي هيطلعله مصلحة و خدي معاكي شخص برده من العائلة و اول نزلة تشوفوا العربيات و متستعجليش و متنزليش بفلوس طبعا التخليص بعد الاتفاق وساعة الشراء تكشفي ع العربية في المرور و تتاكدي ان ورقها سليم و المالك يطلع شهادة مخالفات و معليهاش اي مخالفات و الشهر العقاري في سوق السيارات اكيد حضرتك عارفة الاجراءات نظرا لامتلاكك عربية من قبل

و هننتظر ان شاء الله تقرير عن العربية بعد شرائها :)

و بالتوفيق ان شاء الله

الشاهين عربية حلوة و شديدة لكن هتكون تقيلة زي اللادا في السواقة بالنسبة لك و لو بالمبلغ ده هتجيبي حاجة موديل قديم شوية و طبعا الشاهين شكلها اتم شوية و معليهاش اقبال زي الأول
ممكن نتغاضي عن كل ده لكن هنرجع لنفس المشكلة الأولي عربية مستعملة موديل قديم
الميزة في الماروتي او الالتو عربيتين عليهم اقبال عايزة تبيعيهم في اي لحظة تبيعيهم و منتشرين و قطع غيار رخيصة و سهل الشغل فيهم من اي صنايعي فاهم و في نفس الوقت موديلات جديدة يعني ملحقتش تتبهدل و مناسبة للشوارع هنا في الوقت الحالي يعني ممكن تتركن في حتة صغيرة او فوق الرصيف حتي محدش هياخد باله منها ههههه و طبعا مفيهاش الطمع :)

المشاركة الأصلية كتبت بواسطة amanda

استاذ axel عند حضرتك حق جدا فى موضوع الركنة بالذات - انا كان معايا تمبرا (حجمها كبير بالنسبة ليا) فى وسط الزحمة الفظيعة فى البلد حاليا مكنتش بعرف اركنها لان كان من الصعب الاقى مكان ليها - يمكن علشان لسه مش ممتازة فى السواقة - لكن عمتا اكيد العربيات الصغيرة اسهل كتير فى الركن
اشكرك جدا وان شاء الله اول ما اشترى العربية اتابع مع حضرتك لمعرفة بقية النصائح

اه التمبرا طبعا حجمها ما شاء الله مينفعش دلوقتي في الركنات
لكن الالتو و الماروتي هيساعدوكي في الركنة في اي مكان ان شاء الله
و في انتظار التقرير ان شاء الله عن شراء الالتو او الماروتي