الموضوع: حبه فضفضه عن التيدا الهاتشباك

السلام عليكم و رحمه الله و بركاته
كيفكم يا احلى شباب

انا الحمد لله رخصت العربيه الاتنين و بعدها على طول سافرت فى مشوار للزقازيق و العربيه عندى عملت بعد ما رجعت من هناك حوالى 700 كيلو

هو أنا كلمت نيسان مصر علشان تفعيل الضمان بناءا على نصيحه اخواتى هنا فى المنتدى و ادونى كود

المشكله عندى انى لسه ما استلمتش الضمان و ان شاء الله يجى بعد العيد أنا كلمت السبع قالولى انهم فاتحين الجمعه و سالتهم الحد بتاع الصيانه ألف كيلو لغاية اد ايه قالولى لغاية 1800كم مفيش مشكلة ان شاء الله الكل عارف العيد بقى و كله بيسافر و اكيد هعدى ألف كيلو بكتير بصراحه طمنونى شويه

نيجى للعربيه :

- العربيه ما شاء الله زاد اعجابى بيها كتير و حسيت انى الحمد لله ربنا وفقنى للصواب و كلها ما شاء الله مميزات

- مريحه جدا فى السفر بعد حوالى أكثر من ساعتين سواقه متواصل نزلت من العربيه مفيش ارهاق أو تعب
العزل بتاعها جميل لانى و أنا راجع من سفرى كنت عديت ال 500كم و شغلت التكييف

- التكييف بتاعها ما شاء الله رغم ان كتير من الأعضاء كانوا ذكروا ان التكييف بيبقى ضعيف شويه فى الأول غير ان التكييف الاوتو حلو بصراحه اوى و الشاشه بتاعها لذيذة و بعدين سرعه المروحه تنزل بالتدريج بشكل سلس و مريح و كان الكلام ده فى عز الحر الساعه 2 الضهر

- ارتفاع العربيه جميل جدا مفيش حاجه اسمها تحك فى مطب حاجه مريحه جدا أنا كنت متعقد من الموضوع ده كان معايا كولت و نافخانى حك فى المطبات هو اكيد بياثر شويه على الثبات بس أنا ما حستش ده اوى لانى ما عديتش ال 120 كم فى الساعه بالتالي نقطه الثبات دى هحكم عليها بعدين

- استهلاك البنزين ما شاء الله تمام أنا فولت أول ما اخذت العربيه من يوم الجمعه و عملت بيها لغاية النهارده حوالى 520 كم تقريبا و العداد فيه أكثر من الربع شويه و لسه عامه موضوع الاستهلاك الفعلي هيبان لما افول العربية بكره ان شاء الله علشان يبقى رقم دقيق

- الوسع الداخلي حاجه زى الفل مبهره بالنسبه انها هاتشباك كمان تحفه و موضوع الكنبه الخلفية انها بتتحرك للامام و الخلف جميله اوى و تقدر تكبر الشنطة بشكل كويس لأن فى مساحة كبيره انك تطلع الكنبه للامام و بالذات لو اللى راكب ورا أطفال أو قصيرين شويه الشنطة تكبر اوى معاك

- الخامات الداخلية بتاعها جيدة جدا و التقفيل حلو جدا الصراحه مفيش اى ملاحظات عليه و الطاره الجلد الطبيعي شيك اوى و فرش الأبواب و الفرش الداخلي خامته ممتازة

- و كان ليا ملاحظة على الخامات الداخليه أنا ركبت فرش جلد عندى هنا فى السويس و ركبت دواسه جلد لارصيه العربيه برضه و كان فى واحد بيركب معايا فرش برضه بس معاه كيا ريو ,
اتعرفنا على بعض و هو شاب محترم المهم العربيه ما شاء الله شكلها من بره جميل طبعا و ركبتها معاه من جوه زى الفل ما شاء الله هو حايبها 114000 تقريبا المهم أنا عندى و هو بيطلع الكنبه الخلفية كانوا شايلنها بالعافيه لانهم طلعوا الظهر و القعده مع بعض بس التقفيل و الشغل حاجه محترمه بجد و تقيله جدا فى الوزن
و لما طلعوا كنبه الكيا بس القعده بس للامانة كانت زى الورق خفيفه جدا فرق شاسع فى الخامه

- بصراحه انبسط من اختيارى للتيدا الحمد لله ربنا يباركلى فيها ان شاء الله و لكل أصحاب السيارات امين

- فى حاجه بسيطه بس خنقتنى شويه الشبورة مثلا نورها بينور مع الواطى بس مش بينور مع النور الصغير مش فاهم ليه

- بصراحه العربيه فى مجملها و من وجهه نظرى صفقه رابحة ما شاء الله

- أنا هذكر العربيات اللى امتلكتها أنا أو والدى و كونت خلفيتى عن القيادة و السيارات علشان الكل يبقى عارف انى بقارن بين ايه و أنا سايق التيدا و حكمى على العربيه على أساس ايه
سوزوكى سويفت. اوبل فكترا b. جولف 2. النترا 2006. تويوتا كورولا 2006. تويوتا ياريس. كولت 96

طولت عليكم شويتين أنا عارف
ان شاء الله أول ما يستجد معايا حاجه أو ارقام استهلاك لشئ فى العربيه هشاركم بيه على طول ان شاء الله

السلام عليكم و رحمه الله و بركاته

---------
تم تنسيق الموضوع بناء على طلب من منسق القسم