تسلم ياباشا ربنا يخليك .. الله يبارك فيك ويرزقك
عرض للطباعة
بجد يا جماعة العربية دى جامده جدا ..بقالها معايا 7 شهور وحاسس انها بجد تستاهل كل مليم اتدفع فيها وبجد فرق تانى عن الهيونداى ووالكيا ولكلام ده كله
تسلملي ع الدقة بتاعتك يا باشا ....
أعتقد من وجه نظري إن تكلفة الكيلو متر لاتتعدي 0.13 - 0.15 قرش للـ 1600 سي سي ومن 0.10 - 0.12 قرش للـ 1000 سي سي، وأعتقد ده الإستهلاك الطبيعي عن تجربة
يعني لو لقيت إستهلاك سيارتك أعلي من المعدلات ديه ... علي الاقل هتكون عرفت إن عربيتك بتستهلك بنزين كتير لذلك لازم تبحث عن الحاجات الي تخلي العربية تستهلك بنزين، وأعتقد انها هتكون حاجة من دول:
1- طقم الكهرباء (بوجيهات وكوندنسر وأبلاتين - طبعا مش في كل العربيات-)
2- فلتر هواء
3- زيت الموتور
يارب أكون قدرت أفيد حضراتكم
الف مبروك ربنا يديك خيرها ويبعد عنك شرها
ملحوظه الفوانيس الخلفيه نفس اللى فى موديل 2001 كانت معايا غريبه انهم ينزلوها فى 2013!!!!!!!!!!!!!!!!!
بس احلى من اللى قبلها
الله يبارك فيك ياباشا .. تسلم على مشاركتك
وبالنسبه للفوانيس هي فعلا القديمه بتاعت 2001 مااتغيرتش
أما بالنسبه لفوانيس اللي حضرتك تقصدها أعتقد انت تقصد الفوانيس الشفافه دي اللي بتنزل في العربيات اللانسر الخليجي , لكن مافيش منها دلوقتي تقريبا .
تحيــــــاتي :tumb:
طيب سؤال علشان انا ان شاء الله ناوى اجيبها :) .... ايه اخبار السحب بتاع الموتور ؟ يعنى لو دوست عليها بتيجرى و تشد ؟ زى انك عايز تطلع من عربيه و تقرص على الموتور . هيا بقا بتجيب معاك فى القرص ده ؟
انا اخر سعر سمعته في العربيه دي دلوقتي هو 133 الف جنيه سعرها رفع خالص وطبعآآ السوبر اكشن مش بتنزل خلاص
بص ياباشا .. موضوع السحب ده ماتقلقش منه , أنا الحمد لله العربيه كويسه معايا جدا وخصوصا عشان هي
لسه جديده فتلاقي الفلاتر والبوابات لسه بحالتها والسحب كويس أوي معايا
لكن بعد كده لما يقل السحب ليها حلول كتير طبعا وأفتكر لو قريت في المنتدى هاتلاقي الإخوه الأعضاء شارحين كتير
ده غير طبعا انك لو هاتجيبها أوتوماتيك فهيكون معاك الفتيس الستيبترونيك وطبعا ده فيه خاصية انك ممكن تحول العربيه مانيوال وتقرص على الغيار زي ماانت عايز لغاية ماتجيب السرعه اللي انت عايزها وبعدين تنقل
يارب أكون أفدتك وبالتوفيق في الشراء
ألف مبروك يا باشا.... ربنا يديك خيرها ويكيفيك شرها
بسم الله ما شاء الله لاقوة إلا بالله العربية روعة وانا من معجبين اللانسر بشكل عام والبوما بشكل خاص........... عشان كدة انا استخرت ربنا وبالفعل حجزت سوبر اكشن 2013 ولون فيرانى بردة وإن شاء الله احتمال استلمها على اخر الاسبوع دة
والحقيقة انا كنت عايز منك طلبين:-
الاول:- وانا بستلم العربية من المعرض اخلى بالى من اية؟؟؟؟
التانى:- ما شاء الله الفرش اللى انت عاملة روعة ربنا يباركلك فكنت عايز اعرف تكلفتة كم وهل نوع الجلد اللى أنت عاملة دة بسعر معين وفى انواع تانية باسعار تانية ولا دة الموجود للبوما؟
وشكرا وربنا يباركلك
الله يبارك فيك ياباشا .. وعقبال ماتستلم عربيتك انت كمان ان شاء الله واللون الفيراني فعلا شيك أوي في العربيه خصوصا ان الألوان الحديثه في الموديلات 2012 و 2013 بقت ألإتح من الموديلات الأقدم شويه
أما بخصوص اسألتك بقى , فأولا ً : انا لما جيت استلم العربيه مادققتش أوي في الإستلام بس ده لأني كنت باستلمها من التوكيل فطبعا قولت دول ثقه عن المعارض اللي بره بس طبعا برضه دققت على حاجات كتير.
المهم .. إنت لو مشتري العربيه من معرض غير التوكيل لازم تاخد بالك من شوية حاجات كده هاقولك عليها :
- في لزق أبيض كده بيبقى ملزوق على العربيات الجديده .. لازم تخليهم في المعرض يشيلوه هم بمعرفتهم عشان ممكن يكون تحت اللزق ده العربيه واخده نقره كده أو كده ولا حاجه فطبعا لو لقيت حاجه لاقدر الله من حقك ماتستلمش العربيه .
- لو انت شاري السوبر أكشك اللي بتيجي بجنوط هاتلاقي في جزء كده بيركب في النص بيسموه الصره تقريبا ... ده بيكونوا خالعينوا عشان مايتسرقش تاخد بالك وانت بتستلم انهم يكونوا ركبوهم في الجنوط .
- خد بالك كمان من موضوع الجنوط ده .. المفروض ان الاستبن كمان بيكون جنط سبور مش جنط عادي.
- بخصوص كاسيت العربيه .. المفروض تتأكد انهم حاطين الكاسيت الأصلي اللي هو نوعه Kenwood وهاتلاقي في الظهر كده بعد ماتفك الوش الأمامي مرسوم على باب الكاسيت علامة ميتسوبيشي , وخد بالك لأن في معارض بيحطوا في العربيات كاسيت نوع سيمفوني أو حاجه غريبه كده صيني وطبعا ده وحش جدا بتجربة ناس كتير وبيبوظ بسرعه وانت من حقك طبعا تطلب الكاسيت الأصلي بتاعها .
- طبعا مش هاوصيك انك تلف حوالين العربيه من كل الجهات تشوف احسن تكون محكوكه كده ولا كده وان شاء الله مش هاتلاقي حاجه بس برضه احتياطي .
- العربيه بييجي معاها مفتاح العجل طبعا وكوريك ومفك .
- تتأكد ان الأوتوماتيك بتاع المرايات شغال ( اللي هو بيحرك المرايا فوق وتحت وشمال ويمين ) .
- وانت بتستلم مفتاح العربيه المفروض تستلم مفتاحين وخد بالك تحافظ عليهم كويس لأنك كمان لو حبيت تطلع عليهم لازم بيكون عن طريق التوكيل عشان المفتاح ده كمبيوتر يعني لو عملت منه نسخه عند أي بتاع مفاتيح هايفتح الأبواب بس مش هايدور العربيه .
- اتأكد كمان وانت يتستلم انك تستلم الإريال بتاع الكاسيت .
- خد بالك كمان من حاجه مهمه .. انك أول مابتستلم العربيه بيكون البنزين اللي فيها يادوب يمشيك لأقرب محطة بنزين تمون على طول أحسن تقف منك ويستحسن برضه بعد كده دايما تمون العربيه قبل ماالبنزين يفضى على الآخر يعني ممكن آخر شرطتين كده تروح تمون وده عشان ماتخليش شوائب البنزين توسخ الكاربراتير وتدخل بقى في قصص تنظيف وكده .
- في كمان حاجه مهمه جدا .. انك وانت بتستلم العربيه طبعا هايسلموك العقد بتاعها وشهادة البيانات اللي هاتروح بيها المرور ومعاها كمان الإفراج الجمركي عشان ماترجعش على حاجه منهم وفي حاجه كمان لازم المرور هايخلوك تعملها اللي هي اسمها استعلام أمني وده عشان يتأكدوا ان العربيه مش مسروقه .
- يستحسن كمان وانت بتستلم العربيه تستلم بالنهار عشان تقدر تشوف لو كان العربيه فيها خدش أو خبطه .. لأن في حاجات مش بتبان بالليل .
تقريبا كده دي أهم الحاجات اللي تاخد بالك منها وانت بتستلم , غير كده بقى انك لما تستلم ان شاء الله على خير وانت ماشي بالعربيه ماتخليش العداد بتاع الـ RPM مايعلاش عن 3 عشان العربيه لسه في التليين طبعا وده خلال أول 1000 كيلو بس وخد بالك مش معنى كده انك تمشي بالراحه لأ .. لأن عداد الـ RPM مالوش علاقه بالسرعه أوي قد ماهو ليه علاقه بدوست رجلك على دواسة البنزين وبالسلامه ان شاء الله .
في حاجه كمان عايز اقولك عليها بخصوص زيت الموتور .. طبعا العربيه بييجي فيها زيت اللي بيسموه زيت التليين .. وده لازم يتغير بعد أول 1000 كيلو .. بعد كده التوكيل بيحطلك في الموتور زيت TOTAL وده بيقعد معاك لغاية صيانة الـ 10000 .. انا بصراحه ماكنتش مقتنع بيه أوي بس حاولت أقولهم أغير نوع تاني أجيبه معايا من بره ... قالوا ماينفعش بس بعد كده لقيت انه زيت كويس وإلا ماكانش التوكيل استخدموه .
طبعا أكيد في زيوت أحسن منه بره بس انت مضطر تلتزم بتعليماتهم على الأقل في خلال فترة الضمان .
ثانيا بقى ياباشا , بخصوص الفرش بتاع عربيتي اللي انت شوفته في الصور , ده ياباشا فرش جلد عملته تفصيل طبعا مش جاي مع العربيه ولا حاجه .. اللي بتنزل بفرش جلد السوبر أكشن .
المهم انا عملت الفرش ده عند جينز كار ... هو غالي شويه بس ده عشان انا اخترت خامة جلد كويسه .
وانت لو هاتروح هناك هاتشوف الموديلات والخامات ومش هاتستخسر في عربيتك لأنهم بسم الله ماشاء الله هناك صنايعيه زي الفل .. وكفايا كمان معاملة الحاج أحمد مشعل .. بجد قمه في الكرم والأخلاق .. ربنا يباركله , وبالمناسبه انا كنت عامل الفرش بتاعي ده بـ 1300 جنيه بس عشان كان عاملي خياطه دبل وزي ماقولتلك انا اخترت خامة جلد نضيفه , بس في حاجات تانيه بتبدأ من 700 جنيه , ده غير ان الحاج أحمد عمل معايا واجب وعملي فرش لأرضية الشنطه ببلاش , وكمان كافر للدرج اللي جنب إيد السواق وكفر لفرامل اليد واداني كمان كفر للطاره .. ربنا يارب يكرمه ويرزقه رزق خير ويباركله فيه .
بالمناسبه كمان .. لو نويت تروح عند جينز كار تعمل فرش .. ابقى قولهم انك عضو في نايل موتورز لأنهم بيعملوا خصم 10 % للأعضاء وانصحك برضه انك تتعامل مع الحاج مشعل نفسه لأنه راجل طيب كده وهاتحب التعامل معاه , بس هم هناك الشهاده لله كلهم كويسين بس يمكن راحه نفسيه مش أكتر .
معلش انا طولت عليك أوي بس أنا حاولت أوضحلك كل اللي أعرفه عشان دي نصيحه والنصيحه لله , وبالتوفيق ان شاء الله ياباشا في الإستلام وربنا يستر طريقك وطريقنا كلنا . ولو احتجت مني أي مساعده انا تحت أمرك ومش هاتأخر عليك .
وفي نصيحه أخيره .. ياريت تتابع المنتدى هنا دايما لأن الأعضاء بسم الله ماشاء الله ماسابوش حاجه إلا لما اتكلموا فيها .. بجد استفدت منهم حاجات كتير أوي ولسه العطاء مستمر .
في أمان الله
آمين يارب
ومبرووووك مقدما على العربيه يانجم
هي الطنابير الخلفية طبل ولا سكاكين
ايه يا شباب؟؟؟؟؟؟؟؟؟؟؟؟
الاخ العزيز قرأت موضوعك وهو اللى خلانى اجيب لانسر 2013 سوف استلامها انشاء الله يوم الخميس 21/3 واطلب من سيادتكم معرفه مكان الحاج احمد والسعر واى اخبار عن العربه وتليفونى 01020052339واشكرك لتعاونك وبارك الله فى سيارتك وحفظك وحفظها من العين
الفرامل الخلفية طبل يا باشا
------------
بالنسبة للكاسيت انا شاري من شهر بومة هاف سبورت بس الكاسيت اللى فيها مش كينوود
تقريباًَ اسمه airplane
ودا نفس اللى كانت بشوفه عند كل المعارض
هل دا مش الاصلي بقى ولا ايه؟؟
يا جماعه انا بشتري بومه من معرض و لاقيتها عامله 107 كيلو و من غير الستيكر , تفتكرو دا عادي و لا كدا مجبهاش لأنها مشكوك فيها و خصوصا اني سمعت ان العربيات هتغلى فخلال يومين
بص ياباشا انا لما جيت استلم عربيتي .. كانت عامله حوالي 30 كيلو .. وكنت مشتريها من التوكيل نفسه
لكن معظم المعارض اللي بره التوكيل .. مابتكلفش نفسها وتجيب مقطورة الشحن الكبيره تنقل بيها عربياتها
في الغالب بتتساق لحد المعرض , فانت من الأفضل انك تشوف مكان تاني .. لكن لو لزماك أوي العربيه دي
ممكن تشيك عليها كلها عشان مايكونش فيها أي حاجه .. ويستحسن تاخد معاك حد يكون فاهم ويعرف يكشفلك على العربيه كويس
وبالتوفيق ان شاء الله
انا خلاص مش هخودها , بصراحه مش مرتاح خالص للمعرض و تحس انهم عايزين يلبسوك العربية و خلاص , المصرية ,, ياريت تقولي االبومه عامله معاك إيه علشان في ناس بينصحوني ان الشارك أحسن بكتير, أيه رأيك؟
أحسن انك ماخدتهاش فعلا .. خليك في المضمون أحسن
بخصوص البومه .. بص ياباشا انا الحمد لله العربيه مريحاني وانا كنت حاببها من زمان قبل مااركبها حتى
بس انا بصراحه ماعنديش فكره عن الشارك لأني ماركبتهاش , بس ع العموم في ناس كتير فعلا بتشكر فيها
ومن ناحية الشكل كمان .. بس هي طبعا أغلى من البومه وبالتالي قطع غيارها أغلى كمان .
وفي الأول والآخر الاختيار ليك.
بالتوفيق في الشراء ان شاء الله يانجم
107 كيلو كتير جدا وايه اللى يجبرك على كده انا اشتريت وكانت عامله 27 كيلو بالضبط
آخر سعر ليها الآن (مايو ٢٠١٣) هى ١٣٠ ألف للاستاندر ١٦٠٠ أوتو و ١٣٣ ألف للاوتو ١٦٠٠ بس بجنوط
لو سمحتم يا جماعة عايز أعرف عنوان وتليفوم الحاج أحمد بتاع الفرش
أرقام التليفونات أهي ياباشا :
ت : 22616675 02
موبايل : 0199999753 - 0127423977 - 0199999754 - 0101187339
العنوان بقى :
6 شارع عمر زعفان من شارع الطيران خلف حى مدينة نصر .
لو جاى من شارع مصطفى النحاس من ناحيه مكرم عبيد .. تدخل يمين فى شارع الطيران (على ناصيته جامع نورى خطاب) .. اول ماتدخل هتلاقى بنزينه شل على إيدك اليمين .. ادخل اليمين اللى بعده على طول .. تعدى تقاطع صغير هتلاقى جينز كار على ايدك اليمين .
أما لو جاى من شارع النصر هتدخل شارع الطيران يمين (رابعه العدويه على يمينك) وطبعا ده مستحيل اليومين دول .. هتفضل ماشى لحد آخر لفه فى الشارع (قبل ماتطلع على مصطفى النحاس) .. وتدخل معاها شمال و تدخل الشارع اللى قدامها ... وتعدى التقاطع هتلاقى المحل على إيدك اليمين .
بالتوفيق ان شاء الله ياباشا
أي خدمه ياجميل .. انا في الخدمه دايما
صباح الفل يا Dragon78 باشا كنت عايز اعرف منك بعد تقريبا سنه من استلامك العربيه وانتا اول مالك ليها
انا عندى احد اصدقائى عايز يشترى لانسر بومه 2013 الهاف سبورت بس هو بيسمع كلام عن العفشه مش عارف اذا كان الكلام ده صح ولا لا
عايز اعرف من حضرتك ايه اخبار العربيه بالتفصيل من حيث
1-العفشه
2-الفرامل
3-الامان
4-التكيف
5-التوكيل والصيانه
6-صوت الموتور
7-المساحات الداخليه
8-القياده سواء العاديه او الاستربترونيك
تحياتى ليك واسف على الاطاله
صباح الجمال يانجم .. آسف على التأخير في الرد بس انا لسه شايفه النهارده , النقط اللي حضرتك بتستفسر عنها ردي عليها كالآتي :
1- العفشه أول مااستلمت العربيه كانت ناشفه شويه .. لكن بعد 2 أو 3 اتظبطت وبقت تمام وكمان حسيت بفرق لما مليت الكوتشات نيتروجين .
2- الفرامل زي الفل ياباشا وخصوصا انها ABS مااشتكتش منها أبدا .. كان عيبها الوحيد ان الفرامل اللي بتنزل في العربيه من بلدها بتقعد معاك 10 آلاف بس أو 15 بالكتير (كل واحد حسب مشيه) , لكن لما بتتغير وتركب الفرامل الأصلي (اللي لونها رمادي مش أخضر) المفروض بتقعد معاك حوالي 30 أو 25 ألف .
3- بخصوص الأمان الحمد لله طبعا في حزام أمان .. وفي 2 ايرباج لو لاقدر الله حصل خبطه شديده من الأمام .. وبالنسبه للأبواب في طبعا اللوك الداخلي واللوك بتاع الأطفال , وطبعا احساسك بالفرامل الـ ABS بيخليك ماشي وانت مطمن انك أول ماتحب توقف العربيه هاتدوس فرامل تقف على طول .
4- التكييف الحمد لله برضه شغال تمام وزي الفل طبعا الجو الحر بيخلي الواحد يحس بالتكييف بعد ماتشغله بفتره كده .. بس الواحد هو بيساعد بشوية ستاير كده والركنه في الظل بقدر الامكان.
5- التوكيل والصيانه ياباشا .. الحمد لله برضه على قد اللي حصل معايا الناس كانوا كويسين مافيش مشاكل (دراع الاشاره كان في عيب انه لما بيلف شمال مابيرجعش) ... لكن عيبهم التأخير شويه في تسليم الصيانات (بس الشهاده لله المكان هناك نظيف ومكيف ومريح وفي شاشات LCD يعني القعده مش ممله أوي ولا حاجه .. الملل الوحيد هو ان الواحد بيكون قلقان على عربيته :tongue32: ).
6- صوت الموتور بقى انا مش عارف انت تقصد في المشي العادي ولا في الشد زي طرق السفر أو كده , ع العموم هو في المشي العادي حلو جدا .. لكن في طرق السفر بيكون عالي شويه عشان الواحد بيكون قارص على البنزين (بس أعتقد في ناس كتير بتقول ان نوع الزيت بيفرق في صوت الموتور , وطبعا انا لسه ملتزم بزيت توتال اللي التوكيل جابرني عليه ع الأقل خلال فترة الضمان .
7- المساحات الداخليه دي انا مش فاهم تقصد بيها ايه بالظبط .
8- القياده العاديه والاستبترونيك مرضيه جدا والتسارع بتاع العربيه مش بطال .. وان شاء الله يفضل كده على طول .. طالما الواحد بيحافظ على مواعيد الصيانات .. وتنظيف الفلاتر والبوابات وطبعا أهم حاجه نوع البنزين (مابحطش غير 92) , لكن بخصوص القياده بالاستبترونيك لما أحب أشد يعني مع حد أو اني اجري بيها عن المعدل الطبيعي .. فده بصراحه انا ماجربتوش أوي لأني كل اما أحاول أعمل كده .. الاقي قلبي مابيطاوعنيش اني أقرص على الموتور .. وبلاقي نفسي بانقل بدري غصب عني :ma(36): .
بشكل عام .. أنا الحمد لله راضي عن اختياري للعربيه .. بغض النظر عن قلة الكماليات الاضافيه الموجوده في العربيات الكوري أو أي عربيات تانيه لأني بصراحه شايف انها ممكن تركب في أي عربيه ... مش مجرد وجودها ان كده العربيه تبقى 100% .. لأ المهم الموتور والاعتماديه ومعايير تانيه كتير .
معلش طولت عليك بس حبيت أرد عليك باستفاضه عشان أي حد من الأعضاء و عنده نفس التساؤلات بتاعتك يلاقي الرد قدامه .
السلام عليكم...كل سنة وانتوا طيبين...لو سمحت كنت عايز اعرف منك ايه اللى غيرته فى صيانة العشرتلاف كيلو
ý
انا معايا نفس الموديل وحابب اضيف ان العريية من الداخل واسعة ومريحة للي بيقعد ورا كمان وصوت الماتور عالي نسبيا. وهأكد على نفس تعليقك وهو نقص الكماليات مقارنة بالكوري. شكرا على توضيحاتك الجميلة انت فعلا من اكتر الناس الي فادتني اول ماستلمت العربية وواضح انك بتعمل كده مع كل الاعضاء :)
صيانة العشر آلاف كيلو ياباشا مش بتغير فيها حاجه تقريبا إلا لو فيها مشكله لكن اللي بيحصل بالظبط :
- تغيير زيت + فلتر زيت
- تنظيف الفلاتر والبوابات + فلتر التكييف
- عمل روتيشن للأربع فرد كاوتش + الكشف على تيل الفرامل الأمامي والخلفي
- في حالتي أنا لما روحت وكشفولي على التيل الأمامي قاللي ده محتاج تغيير وكان عامل 600 جنيه (بس الحقيقه ماكنتش عامل حسابي في الفلوس) , جبته بعد كده من فرع بيع قطع الغيار وركبته بره التوكيل (عند المتخصصون لو حد حابب يعرف ركبت فين)
ولو في أي حاجه تانيه ياباشا عندك ملاحظات عليها في العربيه بتقولهم عليها في التوكيل
يعني انا مثلا كان عندي مشكله في ذراع الاشاره من أول مااستلمت العربيه .. وغيرهولي في الصيانه دي (لأنه قبل كده ماكنش متوفر عندهم) .
في ملحوظه صغيره ياباشا .. وانت بتتصل تحجز لصيانة العشر آلاف .. المفروض اللي بيرد أو بترد عليك بتقولك انت هايتعمل في عربيتك ايه بالظبط ومن حقك كمان تسأل التكلفه في حدود كام
أي استفسار تاني أنا حاضر ياباشا .. بالتوفيق ان شاء الله