بالنسبه للسوبارو عن تجربة ، قطع غيارها أه غاليه و لكن أرخص من عربيات كتيره فى فئتها بل و الأقل من فئتها كمان على سبيل المثال الكثير من قطع غيار الكورولا و السيفيك و المازدا 3 و اللألنترا الجديده أغلى من قطع غيار السوبارو و طبعاً المقارنة هنا بالقطع الغيار الأصلية و من التوكيل ، و العيب فيها و الى بيديها سمعة ان قطع غيارها غالية أن الواحد قبل ما يشتريها يسال على قطع غيارها فى التوفيقية و شارع دمشق و خلافة مش حيلقلها قطعة غيار و احدة و لكن حيسأل على قطع غيار السيارات سالفة الذكر سيجد لها الكثير من قطع الغيار الغير أصليه رخيصة الثمن نسبياً ثم يقارنها باسعار قطع غيار سوبارو الأصلية من التوكيل و هنا تكون المقارنة ظالمة جداً للسوبارو و فى غير صالحها بالتأكيد ، و أنا مش عارف إزاى واحد يدفع 150 ألف أو أكثر فى عربيه و يشترىلها قطع غيار غير أصلية و صيانة خارج التوكيل يبقى هنا بيخسر نص عمر العربيه من وجهة نظرى ، فالمقارنة ما بين السوبارو من ناحية الصيانة و قطع الغيار و السيارات الأخرى مثل الفوكاس فى التوكيل فى صالح السوبارو أكيد ، ده غير أنه توكيل فاضى عالطول ، يعنى انا بروح دايماً ابوغالى المعادى بحجز سريع و بروح بتكون الدنيا فاضيه لدرجة انهم بيدخلو فى المكان المخصص للسوبارو التيجو و الدايو و دى ميزه يحس بيها ملاك الهيونداى مثلاً و الشكاوى من الزحام الشديد و طول فترة الحجز ، أما بالنسبة لجودة التوكيل فى الصيانة أنا شيفها جيده جداً و بيرجعلك فى أى حاجة محتاجه تتغير لأخذ الموافقة قبل التغير و بيطرح عليك حلول مختلفة و متعونيين جداً ، مش زى بتوع الجيتا عربية والدتى يبيعوك العربية و هدومك .
بالنسبه للثبات حدث و لا حرج من افضل السيارات على الأطلاق من ناحية الثبات بفضل الدفع الكلى المستمر و المتور البوكسر اللى بيزود ثبات العربية كلما زادت سرعتها و كفاءتها العاليه جداً فى الملفات الحاده التى تعطيك ثقه لدرجة الغرور ،
بالنسبه للتسارع اعتقد ان 115 حصان جيدين جداً لأن عربيتى 96 حصان فقط و لكن ادائها مقبول جداً و بتكون طلقة بعد ال120 فيما فوق يعنى ممكن هيونداى تطلع منى من الثبات و لكنى أطلع منه ببساطة بعد ال 100 خصوصاً لو كان فيه تيار هواء معاكس أو مطلع و مع العلم أن ال 115 حصان دول 115 حصان بجد مش 140 و 130 حمار كورى زى بتوع السيراتو و ليؤكد كلامى السيراتو الخيبانة بجنوط 17 و السوبارو بجنوط 15 فقط ده دليل انهم بيدورو على الأداء الجيد بعيداً عن الشكل الفارغ و كلنا عارفين مشاكل الجنوط ال17 مع العفشة و النشوفيه و البلالين اللى بتطلع فى الكاوتش و خلافة .
أما سعر ما بعد البيع فغير جيد على الأطلاق ، يعنى عربية العمر ، لأن المصريين ينتهجون سياسية القطيع ، الهيونداى و الكيا منتشره فى الشارع تبقى عربيات تمام لكن الى منشفوش مانعرفوش و منسألش عليه و نطلع عليه كمان إشاعات .