البومة عند سرعة 130

**nonnos5** · 22-08-2012 12:17 PM

انا الحمد لله معايا العربية 2007 سبورت من الزيرو بقالى 5 سنين راكبها وعامل بيها 115000 كيلوا كلهم سفر ومعظمهم زراعى وعمر ما حصل معايا ده خالص ولا حتى لحد سرعة 170 اقصى حاجة جبتها بيها
ومعايا كريستاله 99 اللى انت بتقول عليه ده بيحصل فيها على بسيط لما يكون فيه عالى وواطى بالطول انما فى البومة استحالة يحصل حتى لما اخويا اول ما ركب الكريستالة اول تعليق ليه بعد اول مرة سواقه ليها قال هيا مش فارقه كتير عن البومة فى الثبات غير فى موضوع تحريك الدريكسيون مع العالى والواطى بس

**mohamedhagrass** · 26-08-2012 02:56 AM

العربيه ثباتها ممتاز بالنسبه لعربيات كتير ثانيا العربيه مش خفيفه قوي زي ما بتوصف مع احترامي طبعا ولاكن اللانسر تتميز بتقلها وثابتها بالنسبه للعربيات في فئتها بغض النظر عن الالماني واخيرا انا بجيب 165 بعربيه والدي ومفيش مشاكل خالص ومبيحصلش الكلام ده الحمد لله

**Mostafa_Nour** · 26-08-2012 08:07 PM

السلام عليكم
بعد اذن حضراتكم اسمحولى اقول رأيى
الأخ العزيز صاحب الموضوع مش بيتكلم على ثبات العربية من عدمة , أنا فاهم قصدة كويس واسمحولى أوضحه لأن النقطة دى مالهاش علاقة بنوع العربية اطلاقا .
أنا بالمناسبة مهندس مدنى والكلام اللى هقولة دة ان شاء الله صح 100%
الموضوع ببساطة شديدة أنه الأسفلت بيتكون من مادتين يتم خلطهم ببعض على درجة حرارة عالية (90 درجة مئوية على الأقل) وبتتسمى (الخرسانة الأسفلتية) , المادتين دول بيبقوا (فى الحالات النموذجية يعنى !!) كسر بازلت (وأحيانا جرانيت) متدرج مخلوط بالبيتومين (أو الزفت , سامحونى على اللفظ) على درجة الحرارة العالية دى وبيتفرش على الأرض ويعدى الهراس (أو وابور الزلط) يدمكهم .
والسبب فى اختيار البازلت المتدرج أنة الفراغات بين جزيئات اللأسفلت تبقى أقل ما يمكن (لأن الحتت الصغيرة هتدخل بين الحبيبات الأكبر اللى هتدخل بين الحبيبات الأكبر منها وهكذا فالفراغات تبقى تقريبا مليانة) فالطريق يبقى ناعم .
نيجى بقى للى بيحصل هنا
بدل البازلت المتدرج يجيبوا زلط (أرخص بكتير) مش متدرج , وممكن عشان يبقى أرخص كمان يجيبوا زلط كبير (قد البرتقان البلدى أو اليوسفى كدة) ويخلطوة على بيتومين مغشوش بجاز ولا حاجة فالبيتومين بيتبرى من عجل العربيات بسرعة ويسيب الزلط الكبير دة طالع لوحدة , فبتلاقى عندك الأسفلت اتحول لزلط (قد البرتقان زى مابقول لحضراتكم) نصة طالع برة وبينهم مسافات كبيرة نسبيا , فالطريق يبقى خشن جدا (زى المدقات الحجرية المعمولة من كسر الحجر فى الجبال والمناطق الصناعية وكدة) وطبيعى لما العجل اللى قدام يدوس على البرتقان اللى طالع من الأسفلت دة لازم الدركسيون هيتحرك يمين وشمال , ودة طبيعى جدا ومالوش علاقة بنوع العربية , حتى لو همر لازم الدركسيون هيلعب , كذلك برضة المفروض مايبقاش له علاقة بالسرعة , أنا مستغرب من كلام الزميل العزيز صاحب الموضوع أن الحركة دى بتحصل على 130 بالذات , لا قبلها ولا بعدها .
فياريت الزميل العزيز صاحب الموضوع يلاحظ جودة الطريق اللى ماشى علية وملاحظة رجرجة الدركسيون كذلك , لأن الرجرجة اللى بتحصل عند سرعة معينة دى رجرجة ترصيص مش أكتر .

أعتذر للأطالة وتقبلوا تحياتى

**newmoner** · 27-08-2012 10:18 AM

اول مرة فى حياتى اسمع ان البومة مش ثابتة عالطريق !!!!!

**VTC** · 27-08-2012 07:51 PM

انا العربيه عندي من ٢٠٠٦ وعمري ما حسيت بالكلام دا ابدا مع العلم ان العربيه لحد دلوقتي عملت بيها ١٨٠ الف
الكلام دا حسيت بيه بعد ال ١٧٥ الف وشاكك في العفشه
مع العلم اني ما غيرتش حاجه في العفشه لحد دلوقتي غير صيانات عاديه وتربيط

**mazoon** · 16-09-2012 10:12 PM

على فكرة انا معايا 2011 ستيبترونك , العربية كويسة جدا بس فعلا هى خفيفة الى حد ما خاصا لما تكون ماشى مع التيار ( الهوا ) بس الكلام ده بعد ال 150 بس الدريكسيون ثابت مبيتحركش لا يمين ولاشمال , بتيقى عاملة زى لما تكون ماشى وعربية نقل تقيل عدت جنبك وانت على 150