سؤال : الرادياتير النحاس الـ 3 ماسورة للفليشيا افضل و لا الالومنيوم الصيني ؟
السلام عليكم ,
لو سمحتم انا عايز اعرف الرادياتير النحاس دة اشطة و لا بلح ؟؟ يعني مهم و لا حوار على الفاضي ؟
انا بصراحة حكاية السخونة دي مزعج جدا رغم اني تأقلمت عليه , هي عربيتي مكيفه ,العربية بتسخن كل مازود في القرص سواء مشغل التكييف او لأ , كل مالسرعة تزيد كل مالحرارة تزيد جدا بالتوازي مع انه المفروض العكس و الكل مجمع ان كمية الهوا اللي داخله العربية مش كافيه و انا متفق معاهم بس اعمل ايه بس , انا عملت كل شىء ممكن تتخيلوه
غيرت بوش سلندر + الجوان الاصلي
غيرت برادياتير صيني
غيرت برادياتير اصلي مستعمل نضيف
غيرت بمروحة اصلي 6 ريشة الماني 2 سرعة
غيرت بمروحة شاهين حرقتلي الضفيره من كتر قوتها عشان الترموستات مابيفصلش من شده حراره العربية
حطيت قميص للرادياتير و شلته و حطيته هههههه ( جربت كدة و كدة )
بعمل صيانة لدورة التبريد و بحط مياة خضراء غالية
عليت الترموستات و وطيتها
المياة مش بتنقص خالص يعني الموتور زي الفل ما شاء الله و الحمد لله و لا اله الا الله
حطيت مروحة امام سربنتينة التكييف كبيرة عشان اندفاع الهواء يبقى افضل
عملت زرار للمروحة للطوارىء
بصوا يا جماعة . . . انا عملت كل شىء الا 3 حاجات
1 - اني اركب رادياتير عمولة نحاس 3 ماسورة و عايز رأيكم و خصوصا الناس اللي جربت
2 - اني اغير السربنتينة بتاعة التكييف لان بقالها 5 سنين ماتغيرتش , و دة حل ماحدش كتير اتناقش فيه , معظمنا لا قدر الله بيعمل حوادث او تخيشات بسيطة او تريحات من الامام و انا بعتقد ان السربنتينة ممكن الريش بتاعتها تكون تأثرت أو حصلها ثنيات باعتبار السربنتينه في مقدمه العربية بالتالي ها تقلل مرور الهوا للداخل الى الرادياتير
3 - اخر حاجة ماجربتهاش هي اني اوسع تهوية العربية من قدام يعني الموضوع هايبقى عايز متخصص تعديلات فايبر هايشيل العلامة ويوسع مكان التهوية بطريقته بقى
هي دي قصة السخونة معايا
ملحوظة العربية دي انا بحبها جدا و تأقلمت مع عيبها القاتل الا و هو السخونة بخلاف كدة للامانة عربية قوية و صاجها قوي و موتورها كويس و موفر للبنزين و عربية ممتازة و تقفيلها عالي
