الموضوع: كيا سبكترا 2003 بتعوم منى (أعمل ايه يا جماعة محتار اوى).

السلام عليكم,
الحمد لله بتوفيق ربنا اشتريت سبكترا 2003 عاملة 54000 ك, فبريكة بره و جوه معادا الاكصدامات,(صحيح العربية اتخبطط 3 مرات و هيه وقفة و ده فى اول يوم جبت فيه العربية بس بسيطة الحمدلله و ربنا يحفظنا و يحفظكم من العين).
المهم, العربية كان فيها تعويمة تحس بيها من الجزء الورا يمين, و كان التفسير ان الكاوتشات الورا من عمر السيارة بقالها 5 سنين, انا روحت شارى كاوتشات جديد كوموهو 195/60 14, و كمان جبت جنوط, و طبعا رسست و ظبط زوايا, طب و كانت النتيجة ان اى مطب هوا أو فرق فى الطريق و انا بجرى الاقى الجزء الورا يمين يتهز او يتنطط و يخلى العربية تعوم شمال (الجزء الورا شمال ماسك نفسو شوية عن الجزء اليمين) روحت لعافشجى اشتغلت معاه ابل كده,قلى احنا نركب بطاحات مساعد مرسيدس عشان المساعد يمسك نفسه و مش يتهز و العربيه متعومش حتى و انتا بتغرز و كمان ممكن نوطى السوست بسيط من ورا و رأيه ان العفشة كويسه (و انا قلقت يكون بيفتح شوغل), مع العلم ان الشاسيه من تحت زى الفل و مفهوش الهوا و مفيش ولا مساعد مثلا معوج ولا حاجا و ده كلام البنزينة الكشفت عندها و كمان ال ظبطلى الزوايا, انا عارف ان فيه حاجا اسمها الميزان ورا, ده ممكن يعمل التعويمة دي و كمان ممكن المساعد يكون خفيف عن باقى العربية بس انا شاكك انو يعمل التعويمة الجامده ديه, و حاجا كمان جربت اجرى بالعربية, من اول 140 بحس(والله اعلم)انها مسكت نفسها شوية, (و كان ممكن ازود بس انا خوفت العربية تعملها معايا ,انا كنت بمشى 180 بالأكسنت عشان انا سفرى كتير) و علا 160 و170فى صوت تصفيرة من ورا يمين برضو و شكيت انو ممكن يكون البلى, انا فعلن هاتجنن مش عارف ايه الحل و كل واحد بيقولى كلام شكل.
يا جماعة يا ريت حد يكون حاصلو مشكلة قريبة من ديه أو فاهم فى العربية يدينى رأي, جزاكم الله خيرا و على فكرة ده أول موضوع أو تعليق ليا على المنتدى بس باقالى متابعو مدة طويلة(الموضوع معروض في منتدى الكيا و مجاليش ردود كثير).

النهارده فوت على ورشة متخصصة كيا عند قصر الطاهرة كدا اسماها الأصدقاء, الراجل رفع و جرب(بس مسقش العربية) و الى احنا عشان نشتغل تمام لازم نغير: ال 4 مساعد, سرة خلفى شمال, بلى عجل اتنين قدام , قعدة موتور امامى و يمين, المهم رحت سألت على الحاجات ديه فى الجندى بتاع دمشق حسبت بتاع 2000 ج, انا مقتنع بان حاجات زى البلى و السرة و المساعدين الورا فعلن فيهم مشكلة, الباقة بقى قلقان يكون بيفتح شوغل و بعد كل ده مايظبطش, المهم بردو لو حد عندو فكرة عن الى فيها يقترح.
حاجة كمان ناس قلولى المونرو احسن من المساعد الأصلى بس لازم يتظبط عند الخراط, و واحد تانى قلى بردو المونرو أشد و روح التوكيل بتاعهم عند نادى المقاولون و اسألهم على مساعدين السبكترا و انتا تلائيها و تركب من غير تعديل, الكلام ده صح, و يا ريت لو حد عندو نمرة توكيل المونرو. و شكرا


أخوكم أحمد عبد الرحمن.

- نينى باشا, ما ده ال انا كونت ناوى عليه انشالله بس كونت عاوز اغير ورا بس ميش الأربعة, و صحييح عربيتك ايه يا باشا.

- جيمنو هوا موضوع الخراط ده فعلن عشان ينفع اركب المساعد على العربية بس انا ماهتمتش اعرف تفاصيل عشان اكييد مش هاودى مساعد جديد لخراط و الحوارات الفاكسة ديه, انشالله اول ماروح توكيل مونرو هأقولكو التفاصيل, بس الموضوع احتمال يتأخر شويا عشان الشغل و السيولة خصوصا انى لسه مابعتش العربية القديمة (ma lovely accent)