الموضوع: غيرت مقصات للياريس :)

تكملة لحملة الصيانة الى بدأت اعملها لعربيتى , كانت العفشة مش عاجبانى بقالها فترة و الفرامل مش كويسة , قلت لما انزل اشيك عليها , المهم نزلت للعفشجى طلع جرب ,و راجع بيضحك على الاخر خير يا عم : قالى لا تقلق
المهم فكينا المساعدين و طلع المقصات و قالى الجلب متاكلة شوية و نصيحة غيرها , نزلت لفيت علشان اجيب الجلب , اول واحد قالى مش بينزلها جلب لوحدها المقص بيتباع على بعضه بكام يا عم : ب 175 تايوانى , قلت جايز بيحور , رحت لكذا واحد قالى نفس الكلام , اشتريت المقصين ب 340 تايوانى نوع اسمه HS ....
رجعت للعفشجى قبل ما يركب قلتله انا عايز اهبط العربية قالى بلاش و مش بلاش و المطبات و الكلام ده , بس انا كنت واخد قرارى , هبط يا عم ايمن عايز العربية على الكاوتش , لقيته بصلى حته بصه قلته خلااااااااص خليها فرق صباع واحد , قالى ماشى , المهم فك السوست و فضل شوية يدفى في كل سوسته و يهبطها لغاية ما قالى كفاية كده ......
ركب الشغل و الحمد لله العربية بقت العفشة تمام و التهبيطة مش وحشة و مش بتحك معايا هى بقت فرق صبعين بس ورا و قدام و شكلها بقى احسن كتير عن الاول ..

نيجى للفرامل , اشتريت زيت فرامل كاسترول دوت4 العلبة ب 15 جنيه و قلتله عايز اغيره , قاله بلاش ده مش عيب زيت , انا هرجش على الفرامل ورا و هتبقى تمام .... و فعلا عمل كده و الفرامل بقت اعلى شوية , بس انا مش عارف بقى حوار الزيت ده اغيره ولا اسمع كلامه وبلاش منه خاااالص ....

....* ملاحظة كده : انا من فترة طويلة ركبت جنط 17 و ساعتها كنت غيرت السوست الى قدام بسوست تانية هو الى جابهالى , و السوست الى ورا كنت قصيتها عند واحد تانى قبلها , بس دى اكتر حاجة انا ندمان عليها فعلا , فبلاش حد يقص السوست ابداااااا . حتى ايمن الى انا عامل عنده الشغل ده , قالى مين الحمار الى قص السوسته دى

معلش بقى نسيت اصور الحاجة الى اشتريتها , علشان كنت مهيس على الاخر و مش مركز في حاجة ....
اى استفسار , انا تحت امركم :)

المشاركة الأصلية كتبت بواسطة Y a r i s

ياسيدي الف مبروك. ... وياسلام لو تعمل جميلة وتبعتلنا ايمن ده القاهرة ههههههههه يومين
بس صحيح ياباشا انتا كنت بتحس ايه قبل ما تغير الجلب بتاعت المقصات يعني ايه الاعراض الي ظهرت على العربية
النقطة التانية ياباشا. انتا مركب جنط ١٧. وانا واحد من الناس نفسي اركبو بيخلي شكل العربية نيد فور اسبيد. بس في نفس الوقت. بخاف لايحك. في الكرتيرة. انتا عملت ايه باه علشان الحكة دي هل شيلت الكارتيرة ولا لانك قصيت السوست ونشفتها فمبقتش العربية تنزل وتطلع فبالتالي مفيش حكة

لان كمان حتى سؤالك انتا بتقول ان العربية ناشفة وبتدب في مع المطبات يبقى كده معناها ان يا انتا مركب مساعدين رياضيين يا في حاجة ناشفة عندك علشان ميحكش ياريت ياباشا تصورلنا صورة الجنط بتاعك علشان نشوف شكلوا عامل ازاي العربية وتحياتي ليك والف مبروك عليك

ما يغلاش عليك والله , اكذب لو قلت انا كنت بحس بايه في العربية تحديدا بس عارف لما يبقى عندك احساس ان في حاجة غلط هو كده بالضبط ...
و الله هو الجنط مع التهبيط بيخلى العربية عموما شكلها احسن و ثباتها اعلى , بالنسبة للحك و كده , الحمد لله العربية مش بتحك في المطبات لو اخدت المطب بالعرض كله بيبقى تمام , و الجنط برده مش بيحك في الكرتيرات ولا اى حاجة , اصلا الياريس الفجوة بتاعتها كبييييييييرة جدااا و تشيل و مش هتحك غير بصعوبة جدااا ..
انا مركب صدادات كبيرة ورا و خلاص على كده ......

المشاركة الأصلية كتبت بواسطة ahmed_fahmy

مبروك على المقصات وطبعاً موضوع قص السوست زى ما الراجل وضحلك بالظبت وزيت الفرامل لازم يتغير مع احترامى للراجل بتاعك وحدة الabs هتبوظ لو مغيرتش زيت فرامل بشكل دورى كل ٢٠ الف لو عربيتك مش abs يبقى عادى متغيرش حالياً وموضوع الجنوط ال١٧ وتوطية العربيه بقصر عمر العفشه فيفضل تتجنب الموضوع ده

فعلا انا اكتر حاجة ندمان عليها , انى قصيت السوست , بس الحمدلله على كل حاجة ...
مش عارف بقى حوار الabs ده بس هرجعله تانى اسأله تانى و اكد عليه , بس هى الفرامل حاليا بقت كويسة ........
بالنسبة لموضوع ان الجنط و التهبيط بيأثر على عمر المساعد هو صح طبعا , بس انا شايف ان الواحد كده كده هيغير و يهصرف و يجيب مساعدين تانى في اى وقت , يبقى الواحد يستمتع بعربيته و يحاول يخليها احسن .. و برده التأثير ده بيعتمد على وزن الجنط مش على قطره , و حضرتك لو شيلت الجنط الحديد بتاعها و الجنط الاسبور مش هتلاقى فرق الوزن الرهيب الى ممكن يبوظ المساعد فى مدة بسيطة ......