مشكلة في فتيس الفيكترا بي 2
السلام عليكم و رحمة الله
مش قلت لكم أنا جبت فيكترا عشان أحس بمشاكلكم .. أنا حصل عندي مشكلة في الفتيس .. مع اني ممشيتش ألف كيلو بالعربية دي .. الحمد لله .. قدر الله و ما شاء فعل.
وأنا راجع النهارده من القاهره للزقازيق .. و يمكن في نفس المكان اللي اتكسر فيه عامود الكامه في الكورسا أو بعده حاجه بسيطه .. لقيت العربيه مبتجيبش رابع .. العربية فيكترا بي 2 1600 أتوماتيك .. و لمبة الصيانه نورت .. و زرار ال s و التراكشن مش شغالين .. ركنت و بطلت و دورت تاني .. و لما وصلت لسرعة 80 نفس المشكلة .. الار بي ام بيعلى و العربية مبتنقلش .. و لما أقف و أطلع مبتطلعش على الأول .. زي ما بتكون بتطلع على التاني أو التالت.
المهم مشيت على 60 عشان الار بي ام ميعلاش و وصلت الحرفيين الساعه 10 بالليل كده ( من شويه يعني) .. و روحت لهيثم .. قال لي ممكن يكون سنسور ولا حاجه .. المهم كشف بجهاز التك 2 لقاه كاتب Gear ratio is incorrect .. قال لي كده عاوزه فتيس.
الحمد لله على كل شىء .. يمكن دي تالت مره أركب العربية المره دي .. عشان كنت بضبط الكورسا عشان أبيعها .. المهم قلت له عندك؟ .. قال لي عندي .. قلت له بكام؟ .. قال لي 2500 بالمصنعيه و الزيت و كل حاجه .. قلت له و حالته ايه؟ قال لي هفكهولك من على مكنة.
سألته لو أنا جبت الفتيس هتاخد كام؟ قال لي 350 جنيه مصنعيه .. غير تمن الزيت.
حاسبته على الكشف و مشيت من عنده و ركنت العربية في جراج و رجعت مواصلات القاهره .. عاوز أكشف عند حد تاني عشان أتأكد اني لازم أغير فتيس .. و لو كده عاوز أعرف سعر الفتيس الاستيراد كام .. و مين عنده حاجه كويسه.
و طبعا موضوع تضبيط العفشه كل سنه و انتم طيبين .. الحمد لله.