نيسان صني الجديدة بعد 4000 كيلو - ولغز الهروب من المقطورة !
صقور المنتدى...السلام عليكم
الحمدلله ربنا أكرمني وعملت 4000 كيلو بنيسان الجديدة .... واحب اوصفلكم انطباعي عن الأداء وزاي عمل معايا مع تجربة حصلت امبارح...ماتمناش تحصل لحد فيكم :no2:
1- أداء المحرك وصوته : المحرك بسم الله ماشاء الله صوته هادي جداً وعلى السرعات 90 و120 كمان .... مسموع فقط ساعة زيادة السرعة
2- استهلاك البنزين : اتحسن عن لما كانت لسة جديدة , بس مش بشكل خرافي يعني, هي استهلاكها ممتاز من الأساس بسم الله ماشاء الله
3- صوت تزييق الفرامل : بدأ يخف بشكل كبير , مع تطبيع التيل والطنابير .... أعتقد انه في طريقه للاختفاء تماماً.... أما عن أداء الفرامل فهو قوي ويعتمد عليها في المواقف الصعبة ...ربنا مايجيبها
4- أداء التكييف : اتحسن بشكل كبير وملحوظ ...يكفي انه خلال النهار وشمس الصيف بقت سرعة 1 كافية لتبريد الصالون كويس جداً... بس نلاحظ انه سينسور التكييف بيراعي سرعة السيارة, وتاخد أحسن أداء منه بعد سرعة 60 علشان الحفاظ على ضغط الفريون
5- أداء العفشة والمساعدين : أداء متميز ماشاء الله لا قوة إلا بالله .... والعربية مصممة للدول الغلبانة من ناحية مستوى الطرق, ومنها بلادنا العزيزة !!
مع ملاحظة اني ماشتكيتش خالص من صوت تزييق المساعدين زي مابعض الأعضاء الكرام ذكروا هنا ... ممكن تكون عيوب في نسبة بسيطة من الإنتاج وماعتقدش محتاج أي كاوتش زيادة يركب على العفشة
وعن الأداء ككل أحب أحكي عن تجربة حصلت معايا امبارح:
كنت موصل صديق عزيز لمدينة الرحاب ... وبعد ماخلصت وراجع كان معايا كذا ميعاد, من ضمنهم ميعاد مع زميل عزيز في المنتدى أحب أقدم عنه اعتذار واجب
المهم...خارج من المدينة وداخل طريق السويس في أمان الله.... وكان فيه عربية راكنة على يمين الطريق, وبالتالي الحارة اللي هي راكنة فيها فاضية
وإذ بي أفاجأ بعربية نقل تقيل مقطورة جاءت من الظلام... من نفس الحارة اللي المفروض انها مقفولة ومافيش حد ماشي فيها....وكان ماشي مضلم النور ....مرة واحدة راح طالع عليا ومنور كل النور اللي في عربيته ...وشايفه في كل المرايات خلاص ولازم أقرأ الشهادتين .... توكلت على الله وجبت دواسة البنزين على الآخر ....ساعتها لاحظت الأداء القوي للعربية - كنت أقل من 40 ووصلت لسرعة 120 في 4 ثواني من غير استعمال OverDrive- والحمدلله ربنا نجاني من موت محقق بسبب الأخ المسطول صائد السيارات الملاكي ده :00020140: وجعل أداء العربية سبب في النجاة
طبعاً الحكاية دي نستني ان كان لازم اروح أعدي على والدتي أسلم عليها زي ماكنت واعدها ... :oops2:
وكمان ماعديتش على لقاء الصقور في مساكن شيراتون ...وأعتذر عن ذلك بشدة , واطمنوا والدتي اديتني نصيبها ونصيبهم :)
تاني تجربة خلال نص ساعة على الطريق الدائري ...تاني واحد من مساطيل المقطورة طلع من مطلع الدائري من أقصى اليمين على 120 وزاح كل العربيات على شماله علشان يوصل أقصى الشمال ...والأخ اللي جنبي بالتالي راح حاول يزيحني من شماله وانا على شماله :17: المهم هنا استعملت الأوفر درايف علشان كنت ماشي على 90...وتاني مرة يظهر الأداء القوي للمحرك ...الحمدلله رب العالمين
يارب بس اكون زودت الثقة في العربية .... وأفدتكم بتجربتي وانطباعي عن الأداء بعد 4000 كيلو ....ودعاء مني ان ربنا يحفظكم جميعاً ويأمن ويسلم طريقنا أجمعين.....ويارب نرتاح من بلطجية المقطورة والنقل التقيل والخفيف وكل أنواع مساطيل السيارات !!!!
