الموضوع: طلب شراء سيارة من 16000 إلي 18000 جنيه

السلام عليكم ورحمة الله وبركاته

المبلغ المتاح / يفضل 15000 - اقصى حد 18000

نوع العربية / مستعمل

إمكانية التقسيط فى حالة الزيرو / يفضل بدون تقسيط - إمكانية تقسيط - مش فارقة
(ماظنش في زيرو بالمبلغ دا)

خبرتك فى السواقة وسكك الصيانة / جديد جدااااا (وأساسا لسة ماتعلمتش السواقة ومعنديش اي خبرة لا في السواقة ولا في الطرق حتي .. بس كل حاجة ولازم يبقي ليها نقطة بداية يعني )

شكل العربية / هاتش باك - سيدان - مش فارقة ( يفضل هاتش باك .. لكن لو زنقت أوي يبقي مش فارقة )

الموديل / فوق ال 2000 - تسعينات - مش فارقة ( زي فوق بالظبط .. يفضل تسعينات لأن دا المعقول بالنسبة للمبلغ اللي باتكلم فيه .. لكن لو زنقت أوي برضو يبقي مش فارقة )

إستخدام السيارة فى الاغلب / داخل المدينة ( والسفريات قليل جدا مرتين تلاته في السنة )


انتقالاتك بالعربية / فى الاغلب لوحدك - دايماً معاك ناس - الاتنين ( الإتنين)

الكماليات المرجوة / المهم التكييف ( ممكن التنازل عنه في أضيق الحدود .. لو مافيش عمليا أي حاجة بالسعر المكتوب والمواصفات السابقة )

إستهلاك البنزين / يفضل قليل طبعاااا

قطع الغيار / فى المعقول

اماكن الصيانة / يفضل توكيل - ممكن ميكانيكية - ( يفضل الاتنين )

التفرغ لأعمال الصيانة / (ممكن تتدبر)


الاستمرار بالعربية لفترة / احتمال تغير العربية قريب - هاتستمر بيها فترة طويلة - مش فارقة
(مش قبل سنتين مثلا)

سعر إعادة البيع / خسارة معقولة

اهم حاجات بتدور فيها على العربية / ( قلة اعطال)
( وبالمناسبة المفروض تبقي :: أهم حاجات بتدور عليها في العربية :: )



ملاحظات اخرى /

بصوا يا جماعة .. صلوا علي النبي عليه الصلاة والسلام ..


(( أنا هارغي كتير أوي بس معلش إستحملوا شوية عشان عايز احطكم في الصورة ))


دلوقتي أنا لا باعرف أسوق ولا باعرف في الطرق لأني مقضيها مواصلات (مترو بقي وميكروباصات وكده) ..

المهم يعني أنا باتكلم في المبلغ اللي في المدي اللي فوق دا .. طبعا في العنوان 16000 إلي 18000 وفي الموضوع مكتوب 15000 إلي 18000 لأن دا المبلغ اللي مكتوب جنبه (المفضل البداية منه ) دا أولا ..

ثانيا : أنا تقريبا اتجننت من نصائح الناس

- مجموعة تقولي إشتري مستعمل واتعلم فيه السواقة ويوم ما تيجي تبيع مش هاتخسر فيه كتير
-مجموعة تانية تقولي إشتري جديد وقسط لأنك لسه بتتعلم والمستعمل هايطلع عينك لأنك كل يوم هاتبقي عند الميكانيكي وهاتدفع قد ثمن العربية تصليحات
- تقوم مجموعة تالتة ترد علي المجموعة التانية وتقولي آه عشان تخبطلك فانوس يكلفك 300 أو 400 جنيه ولا تخبط لاقدر الله كبوت العربية وتكلفها الشيء الفلاني وانت لسه ماخلصتش اقساطها اللي غالبا هاتبقي مش أقل من خمس سنين ( والمرتب بصراحة مايستحملش قسط وبنزين ومصاريف شخصية لاسيما إني لسه ماتجوزتش )

وخد بقي فتاوي للصبح ..

- واحد يقولك الماروتي هي أنسب حاجة ليك في الوقت دا صغيرة وعملية ومابتاخدش بنزين لأنها 800 سي سي وفوق دا كله ياباني .
- واحد غيره يقولك لأ بس خلي بالك إنها 800 سي سي ( إللي هو كان ميزة فوق ) ومش هاتسحب معاك خصوصا لو حاولت تركب تكييف ( أنا اساسا مش فاهم يعني إيه تسحب ؟؟ هل هي مقصود بيها التسارع acceleration ولا حاجة تانية ؟)
-واحد تالت : في عندك دايهاتسو شارد دي مالهاش حل .. بتبدأ من 22000 جنيه !!!! ( صبرني يارب )
- الرابع : ال 127 لا يعلي عليها يامعلم
- الخامس : ال 127 دي هاتخرب بيتك وإياك تشتريها !!!!
- السادس : ال 131 هي إختيارك الأنسب وأنضف من الكلام الفاضي دا كله
- السابع : ال 131 حجمها كبير عليك خاصة في أول سواقتك وهاتتعبك .. وبعدين العربية إتهانت ومبقاش في منها حالته كويسة
- الثامن : ال 132 بصراحة تحفة ومش هاتلاقي زيها
- التاسع : معلش أصلي كنت في الحرفيين باصلح العربية أصلها فصلت مني تاني علي الكوبري وروحت عند الحج مش عارف مين وقعدت عنده مش فاكر لحد الساعة كام ووو ..... كنت عايز بقي تسألني علي إيه ؟ ( بالمناسبة عربيته 132 )
- العاشر : بوص انا عربيتي لادا 2107 هي حلوة الصراحة والميكانيكا بتاعتها ممتازة بس عايزة إيدك تبقي ناشفة شوية علي الدريكسيون عشان هاتحس إنك بتسوق سفينة !!!
- الحادي عشر : لادا إيه يا عم ؟ دي بتسخن والميكانيكا بتاعتها وحشة
- ال 1967462 : البيتل بتاعت زمان .. صحيح موتورها ورا إنما تبريدها زيت والله ماهتحس إنها بتسخن معاك وبعدين لو اتعلمت السواقة عليها هاتسوق طيارة لو حبيت ..
- اللي بعده : حلك عندي ال 128 مافيش كلام
- اللي بعد اللي بعده : ال 128 دي أزبل عربية وهاتقرفك ال 127 برقبتها ( رجعنا للخامس ) بس نصيحتي ليك وبما يرضي الله هات سيتروين AX
- اللي واقف بيسمع اللي بعد اللي بعده : إنت مجنون ؟ إنت عايزه يلف علي قطع الغيار مايلاقيهاش ؟ ويوم مايلاقيها تقطم وسطه ؟ ومايعرفش يبيع العربية لما ربنا يكرمه ويحب يجيب حاجة زيرو ؟ .. بوص يا باشمهندز .. إسمع كلامي وهاتلك حاجة سوقها ماشي ( اللي هي إيه بقي ؟؟ مقالش .. فكرني بغسان مطر وهو بيقول إعمل الصح )
- دا غير بقي اللي جاب من الآخر : شوف يا هندزة إنت عايز تجيب عربية تركبها ولا تركبك ؟
طبعا كان ردي عليه علامات تعجب كتيرة علي وشي زي دي !!!!!!!!!!!!!!!!!!!!!!!!!!!!!!!!!!!!!!!!!!
فراح مشكورا مفسر كلامه .. يعني أقل حاجة عشان تجيبلك عربية محترمة وتقول إنها عربية مش أقل من 50 الف جنيه .. ( الف شكر ياعم الحج )


أنا آسف جدا علي الفيلم الروائي القصير اللي حكيتهولكم دا .. و باعتذر جدا جدا علي الإطالة يا جماعة

((((( بس دا فعلا إللي حصلي بدون أدني مبالغة في خلال أسبوعين سألت فيهم زمايلي في الشغل علي عربية كويسة في حدود المبلغ اللي معايا )))))

لو سمحتم حد يقولي علي المفيد لأني قربت أتجنن فعلا واتخنقت من الموضوع دا
تحياتي ..

النصيحه الأولى: مدام مبتعرفش تسوق بلاش تجيب عربيه جديدة عشان لو اتخبطت هيا هتتخبط أساسى إذا كنت راكبها وبتتعلم أكيد هتحك أو تخيش وأنت بتركن فتعيط جمبها عشان هيا جديدة ده غير انها هتتخبط عشان حضرتك هتركنها فى الشارع فأساسى وأكيد هتتباس للصبح خبطات .
النصيحه 2 : مدام لسه أول مرة تسوق وهتدخل بقى ف حوارات الميكانيكية والقصص ديه وطبعا حضرتك معندكش علم بحوارتهم ونصبهم مش كلهم طبعا بس إكمن حضرتك زبون جديد هيتعمل عليك أحسن حوار فياريت تجيب عربيه مستعملة وقطع غيارها رخيصة
وأهم حاجه تكون حالتها كويسة عشان متروحش للميكانيكية ويشتغلوك بقى وكدته
نوع العربيه أنا عن نفسى أرشحلك 128 بس تكووووووووووووووووون حالتها كويسة
أنت طبعا وأكيد هتصرف عليها برضه بس أحسن ما تلبس فى عربيه متشخرمة وتندم على اليوم اللى اشتريت فيه
هيا عربيه حلوة وحمالة قاسية وعضمها ناشف هيا قديمة أأأأه بس عشان تتعلم عليها وتخبط براحتك ولما تيجى تبيعها هتلاقيلها بيعه ياااااااريت أكون أفادتك