السلام عليكم ورحمة الله وبركاته

النهاردة وانا نازل رايح شغلي لقيت امبير الحرارة علي ال3/4 فورا ركنت ووقفت اشوف الدنيا فيها ايه
لقيت القربة بتطلع بخار وفي صوت كركرة وغليان
يا ساتر يا رب

استنيت شوية كدة - قيمة ربع ساعة وخلال الربع ساعة كنت كل شوية افتح غطاء القربة قيمة لفة كاملة بحيث انفس الضغط بتاعها شوية بشوية
وبعد الربع ساعة قررت افتح القربة
وانا في اخر لفة لقيت الغطاء طار من ايدي ونافورة مياة وعينك ما تشوف الا النور
استنيت لحد لما النافورة خلصت وسيبت العربية تهدي شوية
وبعد ربع ساعة كمان بدأت ادور العربية واحط مياة تاني
مفيش دقيقتين ولقيت المياة بتغلي
بطلت العربية تاني
وقولت لازم استني عليها شوية
روحت قعدت علي قهوة وقولت علي ما اشرب قهوتي تكون بردت
وانا قاعد علي القهوة - قولت لازم اشرك معايا رفيقي في الكفاح المهندس ايهاب منصور
اتصلت بيه واتكلمنا شوية وشربت قهوتي وكله تمام
رجعت للعربية عشان ادورها تاني واحط مياة
لاحظت ان المروحة مش بترضي تدور نهائي
اخدت الهوا من الدورة وشيكت علي الفيوزات والكتاوت والفيش بتاعة المروحة والثرموستات
لقيت كله تمام
الله ؟؟ امال ليه مش راضية تدور والمياة بتغلي ؟؟؟
قعدت اعمل شوية investigation واخر ما زهقت من المحاولات
استنيت لما العربية بردت شوية وخدت ديلي في سناني وعلي بتاع الردياتيرات بتاعي
بص وفضل يجرب يدور المروحة بقفلة في فيشة الثرموستات - مش بتدور
وصل كهربا من البطارية للمروحة مباشر دارت
قالي يا بيه مش واصل كهربا للثرموستات
روح لكهربائي
روحت للكهربائي بتاعي
بردو فضل يجرب شوية حاجات وفي الأخر طلع ايه ؟؟؟؟
طلع الأرضي بتاع فيشة الثرموستات مهرب
غير السلك والترملة والمروحة دارت
وتوتة توتة خلصت الحدوتة
حلوة ولا ملتوتة ؟؟؟

حلوة طبعاً