العربية اتحكت و نفسيتي في الحضيض!

مساء الخير,

من غير ما اطول عليكم, معايا الانترا 2012.. المهم يعني, كنت باخد يوتيرن و كانت عربية جنبي ربنا يسامحها.. رمت عليا فجأة, فا العربية يدوب كدة شمت في الرصيف من نحية العتب..
و من عند شفف الكوريك, محكوكة حكة محترمة..
بالنسبة للعتبة, انا مش قلقان عليها عشان البطانة موجودة و حتة صغيرة بس المشكلة بقي في شفف الكوريك, الحكة كانت شديدة و خدت حتة حلوة كدة من البتومين و البويا و البطانة و كلة! لدرجة ان الصاج نفسة اتكشف! السؤال بقي, الشفتين مقفولين يعني مفيش مية رقدة عشان تعمل صدا و برومة, طيب لون الصاج دة يغير مع عوامل الجو؟ ولا وضعها اية دي؟ انا عايز اعرف رأيكم و شكرا جزيلا.

رأيى ان كل اللى ييجي في الصاج ولا تشغل بيه بالك

الواحد لما بيفكر انه كان ممكن تكون معاه بنته تتعور ولا مراته حامل يجرالها حاجة ولا والدته ولا والده يقول يغور صاج الدنيا كله ومايجيش حاجة في ضفرهم

ربنا يروق بالك وحكة تفوت ولا حد يموت

مفيش حاجه تستاهل و قدر الله و ما شاء فعل. ممكن تبقى تسأل حد بتاع دوكو يكون شاطر و يقولك ازاى ممكن يعالجها

قدر الله وماشاء فعل ...لو الصاج اتكشف اعزله باي حاجه علشان البارومه فقط ولو حتي تضرب نفس لون العربيه وبفرشه صغبره تداري الصاج(طالما مش ظاهر ومستخبي تحت)

شكرا جزيلا يا جماعة لكل اللي ردوا.

بص ياباشا روح لواحد فى شارع دار المركبات طريق صلاح صالم شغله الله ينور عليه هو تبع الجيش وجت سليمة الحمدلله