اصبح عندى الان سانديرو...رحلة الحيره و الاستقرار

بداية...شكر واجب
منتدى نايل موتورز كان السبب الرئيسى فى اختيارى للعروسة سانديرو و اللى رجح رأى بشكل كبير هو مشاركات الرجاله هنا فى قسم الرينو, و ان كنت لبست فى حاجة صغيرة بس الحمد لله على كل حال.....

اول ما نبدى القول نحمد الله و نصلى على النبى العدنان و على اله و صحبة الكرام ....

رحلة الحيره المقيطة لشراء اول عربية بحر مالى بعد اكتر من 7 سنوات شغل و تنطيت فى عربيات العيله و الاصدقاء ...
استقر اعتماد الميزانية على مبلغ و قدرة 80 باكو بالتمام و الكمال و كانت الرحلة بدات باختيار سازج بين الفيرنا الكاملة منيول و اللانوس الكاملة منيول بردو حيث تساوت الاسعار و كفه العيوب و ان كانت الميزات المحدودة تتشابه
اللى بتتلخص فى الكلام المحفوظ عن سعر قطع الغيار و الانتشار و اعادة البيع ( و اعادة البيع دى هنرجع لها)
المهم مع الوقت ارتفع سقف التوقعات شويتان و الفلوس زادت قلت ادلع نفسى و افكر فى الافيو كامله منيول ...و رحت شادد الرحال على القرش اللى ورا الميريلاند (مكان هايل للفرجة و التقليب يمكن احسن من المصرية و ان كانت التنوع فيه كلام شوية)
كلام البياعين و منهم تقريبا راس كبيره من اصحاب المعرض (اعتزر عن ذكر اسمه لاحترام خصوصية الرجل المحترم)كان بيركز على نفس طريقة التفكير خد الافيو حلوة و ريسايل (اعادة بيع) و الكلام اياه
عرض عليا الافيو 2012 بسعر اقل من 2013 بحوالى 2 لـ 3 الاف و عنيا زغللت- الكلام ده كان فى اخر رمضان.
ظهر فى نفس الوقت فى سيرش عابر على كونتاكت كار برنج الاسعار السانديرو اللى بدت ليا ظريفة من حيث حبى للهتشباك و الاستايل الاوروبى المحب للهتشباك و اسلوبة العملى بالاضافة لاستمتاعى بقيادة سيارة اختى الهتشباك الجتز و لكن كان حايشنى ثلاث حاجات
1- موضوع الرينو و ما ""يشاع" "عنه من صعوبة صيانتة و غلو مصاريفه اللى خايف البس فيها
2- موضوع خوفى من صغر الشنطه و عدم تحقيق امنيتى بالسفر بسيارتى فى رحلات الصيد لعدم امكانية حمل المعدات و الايس بوكسات
3- سعر الزفت اعادة البيع
سالت ناس معاها لوجان لعدم معرفتى بناس معاها سانديرو و بقيت ماشى فى الشارع اتفرج عليها و افزويل العربى معايا و الالوان
لحد ما دخلت على نايل موترز لاول مره و لقيت ناس بتشكر فيها و تقول شعر و ناس بتشكر فيها و مبتقولش شعر ولا تافور و بتعرض المشاكل اللى بتقابلها و اللى ثبت انها تحتمل و مش ماسوية
على صعيد اخر لقيت سباب علنى فى الافيو مع قليل من الشكر
دخلت صليت استخارة و نزلت و قلت بردو افيو و كان بيدفعنى ليها راى اختى و بعض اصدقائى من حزب خلينا فى المضمون و المعروف
روحت القرش تانى قلت اخلص عشان تعبت و زهقت من الحيره اهى عربية و انا اصلا ناوى اسافر فهسيبها لاحدى اخوانى او اخواتى
رحت اولا مودى كان زفت حاسس انى مجبر على حاجة مش حاببها و استقريت على اللون و شفت العربية قدامى و قلتله هشيل دى ...و السعر زى ما اتفقنا يا عم القرش كان كذا...قلى لا دد احنا اتفقنا على كذا
و هنا فرملت لحظة و قلتله هروح و اكلمك كمان ساعة هقولك انا هجيب الفلوس و جى
و انا فى طريقى عديت على رينو اللى فى المحكمة ....و مكنش فى غير اللوجان....اعدت اتفرج اتوهمت بالاستايل الاوروبى مع تحفظى على شكل الشنطة و انبهارى بوسعها
زائد الادب و الشياكة بتاعت اسلوب البياع
مشيت و عديت على السبع لقيت سانديرو ياتيمة وقفه عنده....عجبتنى اكتر و اللى فاجئنى ان احد مخاوفى راح لما بصيت على الشنطة...لقتها مش فى وسع اللوجان بس و سعها مقبول نسبيا بالمقارن باللانوس مثلا
شاب ظريف و شيك قاعد فى السبع قعد يشرحلى باستفاضه و صبر غريب و فندلى مخاوفى من قطع الغيار و الصيانه (بالمناسبه السبع موزع معتمد)
هنا استقريت و قلت سانديرو....بس المشكله فى انها بالحجز :(
و تكرر نفس الموضوع مع الطارق و بردو الصفه المشتركه هى الشياكه و الادب و الود


و للحديث بقيه....مع استلام السيارة و ما وجدتة
انتظرونا


CTRL + Q to Enable/Disable GoPhoto.it




CTRL + Q to Enable/Disable GoPhoto.it

ألف مبروك على أتخاذ القرار , ربنا يمتعك بالعربية ومنتظر باقى الحكاية ...

الف مبروك يا باشا ..

ألف مبروك وربنا يبارك لك فيها ويكفيك شرها وتستخدمها فى الخير دايما إن شاء الله

الف مبروك ياباشا00وربنا يعطيك خيرها ويكفيك شرها
شوقتنا نعرف ايه اللي حصل وكمان مستنيين التقرير الجامد
دمت في امان الله

ألف مبروك وربنا يباركلك فيها ويديك خيرها ويكفيك شرها
هي عاملة 83,000 ولا أكتر دلوقتي؟

اقتباس:

---

المشاركة الأصلية كتبت بواسطة Khaled Online

ألف مبروك وربنا يباركلك فيها ويديك خيرها ويكفيك شرها
هي عاملة 83,000 ولا أكتر دلوقتي؟

---

خالد بيه ...اسعارها كالتالى الكاملة مانيوال 76500 و الاوتواتك حوالى 84 و الاستب واى (النسخة الرياضية العالية ام عتب و جنوت و abs) مانيوال كانت ب81500 و سمعت انها بقت ب83000
ممكن تاخد اسعار اللوجان حيث انها يمكن اعتبارها النسخة السيدان منها و هى بتتراوح من72 ل79 للكامله اتوماتك

و بعج جزيل اسفى عن التاخير...(طبعا اكيد مش محتاج اقول انه بسبب العمل و الطحنه ..اللهم ما تحرمنى من دى طحنه و ارضى كل واحد بطحنته)
المهم طبعا بعد استقرارى على العربية لما ارتئايته من مواصفات امان و احساسى بانها عربيه بتشبهنى (من التشابه و ليس الشبهه) جائت رحلة الحيره فى اللون . و هنا فى ملحوظة اللون المعروض بيه العربية فى البروشور هو الازرق و اللى عرفت لاحقا انه مش من الاوان اللى بتنزل مصر. الاوان المتاحة هى الفرانى و الاحمر النارى (ممكن تسمية نبيتى فاتح ) و الفضى و ده كان خارج الحسبان من خوفى ليقلب بعد ما ينطفى يبقى شبه الألامونيا.
بعد تفكير و استطلاع راى مع زمايلى و مديرينى كنت ميال للاحمر حيث ان البيت عربياته كلها يا اسود يا فرانى بس للاسف مش موجود او يندر تواجده كاستلام فورى.
الطارق كان متاح ليه الفيرانى و الفضى فقط و هو الوحيد من الموزعين المعتمدين اللى كان هيسلمنى على طولز

طلعت من ع الوب سايت بتاع رينو مصر ارقام الموزعين و سالت و كانت الاجابه يا تحجز يا استنا لما تيجى الدفعة بعد اسبوعين.
و هنا الحاجة الوحيده اللى المنتدى هنا لم يكن صائب فيها و هى لم دورت على تعليقات بعض الاعضاء على الاجانسات و لقيت تعليق عابر كده عن واحد اسمه فور برزرز فى مدينة نصر و هنا كانت اللبسه , وكانى محرمتش من بعد تجربة سمير ريان.
كلمته قالى اه فى احمر و قالى هتبقى ب 77000 بدل 76500 و يمين شمال مفيش فايده ينزل, و زى العيل اللى شابط روحت قلتله اوكيه
روحت على الاجانس و كا عادة سيلزاجية العربيات يتحول البحر لطحينة الرشيدى, و هتاخد هدايا و غطا و دواسات و مديليات و ناقص شوية يدينى طقم قوطونيل فوقها
اكدت عليه ان العربية تكون كيلو متر مايعديش 60كم و تطون عليها ورقها الابيض و اترانى كنت اهبل
عاينتها حلوه ماعدى حاجة لا تتجاوز 2 ملى كانها لزقه على اكسدام مش مهمه خالص
العربيه حافظها و فاهمها كويس من المنتدى لدرجة انه قال ايه بينصحنى عشان التكيف بيقلى انه مش حلو قلتله عشان مشحون زياده عشان لما العربية ببتشحن من المغرب و بتتحل فى 5 دقايق وانت واقف فى التوكيل و بتستناش دور و بعد كده التكيف بيبقى تلاجة

دفعت و ركبتها لاول مره و دورتها ................*و هنا الجزء اللى انتو مستنينه........ الانطبعات و الملاحظات
1- مكان الكونتاكت لجوة شوية
2- مفجأة سعيده مكنتش متخيلها ...كان يقال ان الاستب واى تفرق عن العادية انها فيها طاره ملتى فنكشن للكاست او بمعن اصح وراء الطاره....لقيتها موجوده فى الكامله العادية اللى كنت بستلمها على عكس المتوقع و التقارير ودى كانت مفجاة سعيد كنت هرقص منها
3-الكرسى عالى و ده عشان مكنتش عارف بيوطى منين بس كان احساس ظريف و انت قاعد بتسوق عالى
4- صوت الماتور عالى سنه و ده كنت عارفه و مش عاملى مشكله...خصوصا ان قفلة الشباك بتفصلك عن العالم "بشكل كبير"
فى اللحظة دى حمدت ربنا انى مترمتش على الكورى و الاسياوى اللى اكتشفت انه كان بيتضحك علينا به.
العربيه احساسها اوربى اوى تشبه الى حد ما ستايل البونتو و الابيزا . العربية تحس انها قويه و مش خرعه, ماسكه نفسها اوى عن الفيرنا و اللانوس و الافيو بفرق رهيب .
الباب تحس بنشوفيته و ثقله مع القفله ,
التابلوه كنت متوقع انه يكون كئيب بس محستش بكده بالعكس خالص و خاصة مع الاضاءه
و مع الطلعه..
الدبرياش كانك دايس على لا شيئ و النقلات سهلــــــــــــــــــه اوىــــــــــــــــــــــ ى
و نيجى على الميزة الرئيسيه فى العربية بقى....مع الحركة...العفشه حاجة تانيه خالص....محدش يقول انها مش اوروبى ابدا (فعلا عمار يا مغرب)
طبعا العربية مكانش فيها نقطة بنزين...رحت افول تفويلة الافتتاح (و طبعا بنصيحة اصدقائى اللى بيفهمه انى اقول لعامل البنزينة على اول تكه بس و ميقعدش يتكتك عمال على بطال لحد الزور)
التفويله 50 لتر بالتمام و الكمال ..يعنى حوالى 98 جند بالتبس و طبعا كنت مش متاقلم على موضوع التانك بالمفتاح (شغل اوربى برده)
و قلت اتفرج على كمبيوتر الرحلات بتاعها اللى بتتحكم فيه من دراع المساحات اللى على اليمين فى راس الدراع
وقبل مابدا انخور اكتشفت المقلب...............
عداد السرعات مش شغال و هنا قريت اللى حصل...البيه فاصل العدادات عشان ميعدش كيلومترات
هنا ركبنى ميت عفريت و العيلة اللى معايا فى العربيه ظبتونى :(
روحتله و كالعادة بلفنى و قالى اصل العربية لما بتنزل من المركب و تخش فحص ال PDI بيفصلوا العدادات
و روح التوكيل وحطها على الكوبيوتر هيقلولك
كلمت خدمة عملاء رينو (بالمناسبه و من -وجهة واحد اشتغل فى مجال الكول سنتر لسنين و على فيه - الكول سنتر بتاع رينو على مستوى عالى من الاحتراف) الموظف اللى رد عليا كلامه كان مشابه لكلام البياع و ان كان ماكدش معلومة انى ممكن اعرف فى التوكيل من الكمبيوتر العربية ماشيه اده فعليا من غير ما اعتمد على العدادات.
المهم هديت شوية
اه بالمناسبه هدايا الاجانس (فور برزرز) رسيت على طقم دواسات (مش كاوتش حاجة تانية) و ميداليه عفشه كده من الاستانلس تقريبا و عليها اسم المعرض (يا فرحتى و ياما جاب الغراب لامه)و الغطا اللى هو اهم حاجة عند صاحب اى عربية جديدة عملى فلم هابط و قعد يسال العيال اللى عنده بصوت عالى "فيه عندك غطيان؟..لا مفيش يا استاذ....خلاص يا بيه عدى عليا فى اى وقت اشوفلك واحد و انت بتستلم الورق" هو بعد العيد بيتفات كحك؟؟!!
طبق الاصل اللى حصل فى سمير ريان

المهم بدات استكشف العربية
الكلاكس و مكانه العجيب...اتعودت عليه بعد مشواريين لدرجة لما ركبت عربية البيت اتلخبط(مكان الكلاك على راس دراع الاشارة......مش عيب)
حوار تعليه وضع الكشافات الامايه كان ظريف اوى و قعدت العب بيه طول منا سايق فوق و تحت (مكان لتحت شويه ناحية ركبتك الشمال و انت سايق) اوروبى بقى :)))))))))))))))
الزجاج الامامى و ماكانه فى نص التابلوة مكان بردو غريب بس عرفت ايه الحكمة من و هو ان بعض المعايير فى بعض الشركات هو عدم مرور اى نوع من الاسلاك فى الابواب الى فى اضيق الحدود.....ماشى ميزعلش)
الزجاج الخلفى و مكانه فى الكونسول اللى فى النص من ورى و اللوك بتاعه تحت الهاند بريك و هو مكان ظريف و مناسب
ظبط المرايتين الكهربه جنب اللوك بتاع الزجاج الخلفى و ده مكان صايع اوى ...عجبنى
حامل الاكواب الامامى مش غويط اوى ...افتكر ان ده مش ظريف وان كان حتى الان محصلش حاجة من الموضوع ده.
كان موضوع العلامات الكتيره اللى فى التابلوة لغز يتكشف مع مرور الوقت و ان كان الكتالوج بيفكرنى اللى حد كبير بكتاب الفزياء بتاع ثانوية عامة ...بالمناسبه مفهوش ترجمه عربى...(انجليزى و فرنساوى و لغات واء الواء بس) و حتى الانجليزى بتاعه مكانش سلس كده زى كتالوج النوكيا :))) رغم انى معنديش مشكله فى الانجليزى بحكم دراستى و عملى و سفرى...لسه هدور فى الوب سايت يمكن الاقى حاجة اسهل

النقطه الاهم فى الملاحظات....................*
الكاسيت....كاست سى دى - ام بى 3 - و راديو بكذا باند و معلوش براند... بس فى حوااااار
الكاست ليه كود بيدخل مره واحده و متدخلوش تانى
اول ما شاغلته قعد يدى صفاره و هو شغال كل ثانيتين لمده دقيقتين و بعد كده يفصل و يطلب الكود وده دوخ اهلى....يتفك فقط فى التوكيل فى دقيقتين من غير دور (بالظبط خدت 10 دقايق فى توكيل العبور بعد فاصل من الفتى فى الميكانكيون العرب - وكيل للصيانه والبيع معتمد) مجرد بياخد رقم الشاسية و بيخش يدخله على سيستيم او ويب سايت و يرجعلك برقم من 4 ارقام يدخله و يشرحلك بصبر غير عادى تستخدمة ازاى
بصراحة ابويا تكرم بالمشوار ده (ربنا يكرمه و يباركلى فى جدعنته و يشفى دراعه المكسور يارب) و رجع بيقلى على التوكيل شعر فى الزوق و الادب اللى شكلهم بضربوه حقن هناك (غبور ابو رواش بالنسباله كشك )على حد تعبيره.

انا لحد امبارح مكنتش شيلت الورق الابيض اللى ع الكبوت و السقف (و اللى حسيت انها حركه احداث- بكسر الالف بس مش لاقى الهمزة المكسورة:)))
و استلفت غطا من واحد صاحبى المهم لاحظت زى خدشه غائره فى السقف من اول يوم مما استرعى انتباهى و عجل بعملية نزع الورق ...اللى كانت بمثابة احتفالية من زملاء و زميلات الشغل الى عملوا عليها حفله :)) و ركزت فى مكان الخدشه ....الحمد لله ملقتش غير اثر للسمغ بتاع الاستكر الابيض اللى كان ملزوق
مما دفعنى للتفكير بجديه فى اقتراح احد المشاركين فى قسم الرينو الى قال انه عمل واكس (شمع ) للعربية فى مكان ما فى اسكندرية عشان يحمى البوية من الخدش البسيط و الشمس و الفوطة الزفره و خرابيش حبات التراب و اعطاء بريق ولمعان و سهوله التنظيف من الاتربه

كانت ليا رحله مع موضوع الواكس (اللى لسه معملتوش) بس انا شايف انى طولت كتير و اخليه فى الحلقة القادمة عشان انا بردو عملت survey محترم و بردو محتاج ترشيحاتكم و ارائكم بالنسبه لموضوع الواكس

ايضا بعد الفاصل ....باذن الله هجهز جدول مقارن من وحهت نظرى يلخص بشكل بسيط المقارن بين السيارات اللى فى الفئة دى.....انتظرونا

ملحوظة شئ عظيم اللى شفته من مباركة و دعوات بعد مشاركتى الاولى ودى اول مره فعلا اشارك فى منتدى من اى نوع ....والله بجد حاسس بانى بحب كل من شارك فى الله و ربنا يباركلكم بكل خير

اقتباس:

---

المشاركة الأصلية كتبت بواسطة ahhussien

خالد بيه ...اسعارها كالتالى الكاملة مانيوال 76500 و الاوتواتك حوالى 84 و الاستب واى (النسخة الرياضية العالية ام عتب و جنوت و abs) مانيوال كانت ب81500 و سمعت انها بقت ب83000
ممكن تاخد اسعار اللوجان حيث انها يمكن اعتبارها النسخة السيدان منها و هى بتتراوح من72 ل79 للكامله اتوماتك

---

شكرا جزيلا يا أفندم. الأسعار اللي حضرتك كاتبها هي هي اللي على موقع cc، بس فيه تعليقات في موضوع زميلنا الأستاذ Gebreel اللوجان أوتو وصل تمنها ل81 فإيه الوضع بالضبط بالنسبة للسانديرو أوتو...زادت ألفاية بس؟
عايز أجربهم الاتنين بس مأعرفش حد عنده ولا واحدة فيهم. فيه تست درايف عند مين من المعارض وشروطه إيه؟
ومتشكر جدا وربنا يتمملك الشراء على خير ما تحب إن شاء الله

اقتباس:

---

المشاركة الأصلية كتبت بواسطة ahhussien

خالد بيه ...اسعارها كالتالى الكاملة مانيوال 76500 و الاوتواتك حوالى 84 و الاستب واى (النسخة الرياضية العالية ام عتب و جنوت و abs) مانيوال كانت ب81500 و سمعت انها بقت ب83000
ممكن تاخد اسعار اللوجان حيث انها يمكن اعتبارها النسخة السيدان منها و هى بتتراوح من72 ل79 للكامله اتوماتك

---

و الله يبارك فيك و فى زوقك يا باشا

اقتباس:

---

المشاركة الأصلية كتبت بواسطة khaled online

شكرا جزيلا يا أفندم. الأسعار اللي حضرتك كاتبها هي هي اللي على موقع cc، بس فيه تعليقات في موضوع زميلنا الأستاذ gebreel اللوجان أوتو وصل تمنها ل81 فإيه الوضع بالضبط بالنسبة للسانديرو أوتو...زادت ألفاية بس؟
عايز أجربهم الاتنين بس مأعرفش حد عنده ولا واحدة فيهم. فيه تست درايف عند مين من المعارض وشروطه إيه؟
ومتشكر جدا وربنا يتمملك الشراء على خير ما تحب إن شاء الله

---

بص هو انا دخلت على الوب سايت و طلبت تست درايف بس مردوش عليا...الكلام ده كان قبل العيد
الوجان عائليه اوى و احلى حاجة فيها بجد ان شنطتها مش طبيعية فى الوسع....انت ممكن تفرش فيها مرتبه و تنيم فيها جوز بنى ادمين
انا اشتريت و اكتشفت لما لقيت واحد صاحبى معاه اللوجان بتقريبا نفس التعليقات
و مصادر الرضى و الضيق...العربية كتعليق اجمالى هايله فى الوضعين (سيدان او هتشباك) و زى تعليق معظم اللى جابوها....هى انها تسوى اكتر من تمنها و ده ممكن يكون بسبب عدم وجود جمارك او كون جماركه مخفضه جدا (طبقا لاتفاقية اغادير للتعريفه الجمركية مع المغرب) وده سبب انها بتنزل من هناك مش من رومانيا
قولى عربيتك الحاليه ايه او اخر عربية ليك ايه و انا اقولك هتحس بايه معاها...بس تست درايف مش هتلاقيه بسهوله اوى

اقتباس:

---

المشاركة الأصلية كتبت بواسطة khaled online

شكرا جزيلا يا أفندم. الأسعار اللي حضرتك كاتبها هي هي اللي على موقع cc، بس فيه تعليقات في موضوع زميلنا الأستاذ gebreel اللوجان أوتو وصل تمنها ل81 فإيه الوضع بالضبط بالنسبة للسانديرو أوتو...زادت ألفاية بس؟
عايز أجربهم الاتنين بس مأعرفش حد عنده ولا واحدة فيهم. فيه تست درايف عند مين من المعارض وشروطه إيه؟
ومتشكر جدا وربنا يتمملك الشراء على خير ما تحب إن شاء الله

---

نصيحة بردو شوف الاستيب واى قبل ما تقرر

ألف ألف ألف مبروك! والله فرحتلك كأن أنا اللي جايبها! طريقتك في السرد خلتني أكلبش قدام الجهاز لغاية ما خلصت الموضوع! بس اسمحلي سؤال رخم ليه ماجبتهاش أوتوماتيك يا باشا وتدلع نفسك كدة؟ هههه بس هي كدة فل الفل وربنا يبارك يا رب :)

اقتباس:

---

المشاركة الأصلية كتبت بواسطة ahhussien

بص هو انا دخلت على الوب سايت و طلبت تست درايف بس مردوش عليا...الكلام ده كان قبل العيد
الوجان عائليه اوى و احلى حاجة فيها بجد ان شنطتها مش طبيعية فى الوسع....انت ممكن تفرش فيها مرتبه و تنيم فيها جوز بنى ادمين
انا اشتريت و اكتشفت لما لقيت واحد صاحبى معاه اللوجان بتقريبا نفس التعليقات
و مصادر الرضى و الضيق...العربية كتعليق اجمالى هايله فى الوضعين (سيدان او هتشباك) و زى تعليق معظم اللى جابوها....هى انها تسوى اكتر من تمنها و ده ممكن يكون بسبب عدم وجود جمارك او كون جماركه مخفضه جدا (طبقا لاتفاقية اغادير للتعريفه الجمركية مع المغرب) وده سبب انها بتنزل من هناك مش من رومانيا
قولى عربيتك الحاليه ايه او اخر عربية ليك ايه و انا اقولك هتحس بايه معاها...بس تست درايف مش هتلاقيه بسهوله اوى

---

بلاش إحراج يا عم دي كانت لادا ههه

اقتباس:

---

المشاركة الأصلية كتبت بواسطة ahhussien

نصيحة بردو شوف الاستيب واى قبل ما تقرر

---

الاستيب واي فيها abs وشكلها فيه من الماتريكس شوية وتحفة بس مافيهاش حتى مثبت سرعة ودي حاجة غريبة جدا في نظري. يعني المفروض يحطوا فيها شوية إمكانيات يخلوها مميزة عن السانديرو العادية. وحضرتك صح لازم أركب التلاتة قبل ما آخد قرار

الف مبروك وربنا يكفبك شرها بس عندى استفسار ايه رأيك اللون الفيرانى ولا النبيتى وانت تعرف هل فى فرق بين الاوتو والمانيوال فى الكماليات

متابع

السلام عليكم
الحقيقة انا من زمان وشاكك ان فى ناس مندسين فى المنتديات علشان يعملوا دعايا للعربيات والعضو المحترم صاحب الموضوع انا شاكك فيه ليه بقا :
1- تاريخ تسجيل جديد اول ما كتب موضوعه ثم خلع يعنى يوم واحد بث وليس مقيم
2- هو كان بيدور على عربية جديدة من اخر رمضان واشتراه بعد العيد يعنى من بعد يوم 5 شوال الى 20 شوال
الراجل اولا بيقول " اللى رجح رأى بشكل كبير هو مشاركات الرجاله هنا فى قسم الرينو " طيب فين مشاركاته هو ولا غير اسمه"
3- وبعدين استأذن من 8.30 الى 12 بحجة العمل الطحن
4- وبعد هو اللي راح التوكيل ولا والده " الكود وده دوخ اهلى....يتفك فقط فى التوكيل فى دقيقتين من غير دور (بالظبط خدت 10 دقايق فى توكيل العبور بعد فاصل من الفتى فى الميكانكيون العرب - وكيل للصيانه والبيع معتمد) مجرد بياخد رقم الشاسية و بيخش يدخله على سيستيم او ويب سايت و يرجعلك برقم من 4 ارقام يدخله و يشرحلك بصبر غير عادى تستخدمة ازاى
بصراحة ابويا تكرم بالمشوار ده (ربنا يكرمه و يباركلى فى جدعنته و يشفى دراعه المكسور يارب) و رجع بيقلى على التوكيل شعر فى الزوق و الادب"
5- وبعدين سكت ومفيش تكملة للموضوع هيكمل ايه توته توته

محدش يضحك عليا انا بث حاسس ان فيه ناس بتروج للعربيات فى المنتديات واللي شككنى ان تاريخ التسجيل قبلها بالظبط ومفيش مشاركات اخرى له

المراجع :
• عرض عليا الافيو 2012 بسعر اقل من 2013 بحوالى 2 لـ 3 الاف و عنيا زغللت- الكلام ده كان فى اخر رمضان.
• اللى رجح رأى بشكل كبير هو مشاركات الرجاله هنا فى قسم الرينو
• 08-09-2012, 08:36 pm الموافق 22 شوال
• انا لحد امبارح مكنتش شيلت الورق الابيض اللى ع الكبوت و السقف

الحقيقة لا تعليق

واحد تاعب نفسه وكاتب تقرير تفصيلي على مرتين عن عربيته والناس استفادت منه
وواحد تاني أول مرة يتكلم يشكك في كلام اللي تعب
ما هو فيه ناس كدة، لا منها ولا كفاية شرها
ربنا يهدي

اقتباس:

---

المشاركة الأصلية كتبت بواسطة khaled online

واحد تاعب نفسه وكاتب تقرير تفصيلي على مرتين عن عربيته والناس استفادت منه
وواحد تاني أول مرة يتكلم يشكك في كلام اللي تعب
ما هو فيه ناس كدة، لا منها ولا كفاية شرها
ربنا يهدي

---

لا عادى عادى .. حتشوف من دة كتير
بس ايه الشك دة كله .. دة انا شكيت فى نفسى من كتر الشك :36_1_1[1]:
والف مبروك لصاحب الموضوع وربنا يباركله فى عربيته ويعطيه خيرها ويكفيه شرها

اقتباس:

---

المشاركة الأصلية كتبت بواسطة amr.elsayed

لا عادى عادى .. حتشوف من دة كتير
بس ايه الشك دة كله .. دة انا شكيت فى نفسى من كتر الشك :36_1_1[1]:
والف مبروك لصاحب الموضوع وربنا يباركله فى عربيته ويعطيه خيرها ويكفيه شرها

---

+1
:Bravo:

ولا انا شكيت لحظة
احنا هنا لوجه الله
وكل واحد بيعامل ضميره

والف مبروك لصاحب العربية

ألف مبروك وربنا يرزقك خيرها ويكفيك شرها. طريقتك في سرد الأحداث شيقه جدا ... هايل وواضح إنك فعلا مستمتع وفرحان بالعربيه لأنك لقيت فيها وفي آدائها أكتر من توقعاتك وده باين من كلامك.

ربنا يمتعك بيها وتقبل تحياتي

اقتباس:

---

المشاركة الأصلية كتبت بواسطة شاكك فيك

السلام عليكم
الحقيقة انا من زمان وشاكك ان فى ناس مندسين فى المنتديات علشان يعملوا دعايا للعربيات والعضو المحترم صاحب الموضوع انا شاكك فيه ليه بقا :
1- تاريخ تسجيل جديد اول ما كتب موضوعه ثم خلع يعنى يوم واحد بث وليس مقيم
2- هو كان بيدور على عربية جديدة من اخر رمضان واشتراه بعد العيد يعنى من بعد يوم 5 شوال الى 20 شوال
الراجل اولا بيقول " اللى رجح رأى بشكل كبير هو مشاركات الرجاله هنا فى قسم الرينو " طيب فين مشاركاته هو ولا غير اسمه"
3- وبعدين استأذن من 8.30 الى 12 بحجة العمل الطحن
4- وبعد هو اللي راح التوكيل ولا والده " الكود وده دوخ اهلى....يتفك فقط فى التوكيل فى دقيقتين من غير دور (بالظبط خدت 10 دقايق فى توكيل العبور بعد فاصل من الفتى فى الميكانكيون العرب - وكيل للصيانه والبيع معتمد) مجرد بياخد رقم الشاسية و بيخش يدخله على سيستيم او ويب سايت و يرجعلك برقم من 4 ارقام يدخله و يشرحلك بصبر غير عادى تستخدمة ازاى
بصراحة ابويا تكرم بالمشوار ده (ربنا يكرمه و يباركلى فى جدعنته و يشفى دراعه المكسور يارب) و رجع بيقلى على التوكيل شعر فى الزوق و الادب"
5- وبعدين سكت ومفيش تكملة للموضوع هيكمل ايه توته توته

محدش يضحك عليا انا بث حاسس ان فيه ناس بتروج للعربيات فى المنتديات واللي شككنى ان تاريخ التسجيل قبلها بالظبط ومفيش مشاركات اخرى له

المراجع :
• عرض عليا الافيو 2012 بسعر اقل من 2013 بحوالى 2 لـ 3 الاف و عنيا زغللت- الكلام ده كان فى اخر رمضان.
• اللى رجح رأى بشكل كبير هو مشاركات الرجاله هنا فى قسم الرينو
• 08-09-2012, 08:36 pm الموافق 22 شوال
• انا لحد امبارح مكنتش شيلت الورق الابيض اللى ع الكبوت و السقف

---

السلام عليكم
يا استاذ "شاكك فيك" انا ولا ابشتغل فى رينو و لا غيره
طبعا باسلوبك المنهجى اللذيذ ده اللى كله بيصب فى ضحض نظرية المؤامرة البتنجانيه العويصة

بس اقسم بالله العظيم انا مش اكتر من شارى جديد للعربية و المنتدى ساعدنى باراء مستخدميها ....يعنى من الاخر حتى لو شغال فى ام الشركة العربية مكنتش محتاجة حركة المندس اللى حضرتك بتتخيلها دى
ادى واحد
نرجع لمراجعك و تفنيداتك العظيمة عزيزى المفتش كونان (و سامحنى على اسلوبى الساخر بس مش قادر امسك نفسى الصراحة)
1- تاريخ تسجيل جديد اول ما كتب موضوعه ثم خلع يعنى يوم واحد بث وليس مقيم
الرد: انا اصلان واحد من الطفيلين اللى غاوين يقروا فى المنتديات من غير مشاركة عادة و ده من كتر كرهى لصداع الايملات اللى ملهاش لزمة و الدوشة و الدعاية
لكن المنتدى عجبنى و كان نفسى احكى شوية عن العربية اللى كنت فرحان بيها ساعتها ...جرب لما تكون جايب عربية ناس كتير بتقنعك بالاختيارات النمطية فى الاختيار و لما تمشى على اختياراك و تاخد قرار عكس نصايحهم و تكتشف انك صح...اكيد هكون زى الاهبل اللى ماسك طبله و اقعد اسقف و ازيط باختيارى الموفق
و بالنسبة لعدم ظهورى مره اخرى فى المناقشة ده كان بسبب اللى قلته قبل كده...انا مليش فى المنتديات قوى و مشاركتى بتبقى محدوده بشكل كبير اضف الى ذلك اسباب متعلقة بالشغل اللى قالب يومى
بالاضافة الى ان دخولى على النت دايما بيكون فى القهوة مما يحد من فرصة مشاركتى المستمره و اليومية بسبب الشغل و ميخلنيش ابقى قاطع للمنتدى

2- هو كان بيدور على عربية جديدة من اخر رمضان واشتراه بعد العيد يعنى من بعد يوم 5 شوال الى 20 شوال
الراجل اولا بيقول " اللى رجح رأى بشكل كبير هو مشاركات الرجاله هنا فى قسم الرينو " طيب فين مشاركاته هو ولا غير اسمه
الرد: مش فاهم ودى فيها ايه....على اساس انى اتاخرت فى القرار مثلا؟؟...امال لو قلتلك انى كنت بدرس فكره شراء العربية من اول رمضان هتقول ايه
ثانيا انا فعلا مش فاكر اسماء المشاركات اللى قريتها عن الرينو لوجان و سانديرو لانى قريت كتير...فوق ال6 مشاركات...اكيد مش هعمل لسيادتك محضر باللى قريته عشان تصدق...لان ده حاجة ترجع لحضرتك و براحتك و لو ان فى ناس غاوية تعيش جو المؤمرة
3- وبعدين استأذن من 8.30 الى 12 بحجة العمل الطحن
ده كان فى الخباسه كده فى الشغل و الدنيا مريحه و كنت فاضى....اومر ياحضرة الصول
انت تعرف مديرى ولا ايه؟؟
4- وبعد هو اللي راح التوكيل ولا والده " الكود وده دوخ اهلى....يتفك فقط فى التوكيل فى دقيقتين من غير دور (بالظبط خدت 10 دقايق فى توكيل العبور بعد فاصل من الفتى فى الميكانكيون العرب - وكيل للصيانه والبيع معتمد) مجرد بياخد رقم الشاسية و بيخش يدخله على سيستيم او ويب سايت و يرجعلك برقم من 4 ارقام يدخله و يشرحلك بصبر غير عادى تستخدمة ازاى
بصراحة ابويا تكرم بالمشوار ده (ربنا يكرمه و يباركلى فى جدعنته و يشفى دراعه المكسور يارب) و رجع بيقلى على التوكيل شعر فى الزوق و الادب

ابويا هو اللى راح و رجع حكالى و حكايته تتفق مع تفاصيل اللى سمعته من ناس تانيه عملوا نفس الكلام و اللى قالهولى موظف خدمة العملاء على التليفون ....و بالمناسبه الجون ده فيك مش فيا...لو شغال فى رينو هشتم فى وكيل الصيانه المعتمد ليهم(المكانيكيون العرب) و اقول بعد فاصل من الفتيى ليه؟؟؟ هههه......ههههه.....دى طلعت اوت منك دى...........غيره

5- وبعدين سكت ومفيش تكملة للموضوع هيكمل ايه توته توته
مفتكرش ان دى حجه انى مندس....و الا كده هتطلع نص اللى على المنتدى مندسين عشان مش دايما الناس بتلاقى و قت تتابع

• انا لحد امبارح مكنتش شيلت الورق الابيض اللى ع الكبوت و السقف
انا عارف ناس كتير قالتلى بطل فلح و شيل ام الورق من ع العربية...بس محدش قاللى هتبقى مندس و كنتاكى و كده


• عرض عليا الافيو 2012 بسعر اقل من 2013 بحوالى 2 لـ 3 الاف و عنيا زغللت- الكلام ده كان فى اخر رمضان.

الكلام ده مش فاهم يثبت ايه؟؟


عموما ردى الى حد ما قد يكون ساخر بس لا يقلل من احترامى لشخصك الكريم ....و الا اصلا مكنتش رديت و عموما انا مش هقول غير

"يا أيها الذين آمنوا اجتنبوا كثيرا من الظن إن بعض الظن إثم "

و اخيرا و ليس اخرا ...عيد سعيد عليك و علينا و على كل الاعضاء

أنا مش فاهم و الله...واحد شارى عربية و فرحان بيها و داخل يكتب تجربته فى المنتدى الخاص بنفس السيارة...يعنى مدخلش كتبها مثلا فى منتدى هيونداى هنقول داخل يعمل دعايه و يشتم فى الناس....و بعدين مهواش أول واحد يكتب تقريره عن عربيته...و مهواش داخل فى مناقشة مع العضو الكريم عشان يقنعه بعربيته...يعنى بصراحة لقب مندس دى كانت باﻷولى تطلق على العضو اللى داخل يشرح فى التقرير....
و لما حضرتك شايف أن العضو صاحب التقرير بيبالغ و أن العربية متستاهلش -و ده رأيك و يحترم- حضرتك بتتصفح موضوعه ليه؟؟!!
علم..ألف مبروك عالعربية و ربنا يباركلك فيها و يحافظ عليك و عليها....و ميهمكش من أى كلام

الف مليون مبروك على العربية و ربنا يكفيك شرها .. انت ماكملتش الحكاية و قلت عملت الواكس فين قبل كده و قصته إيه و أتكلف كام ؟ و هل عملت واكس للسانديرو و لا لسه ؟

الله يكرمك و يبارك فيك يا باشا....و اكرر احترامى لكل المشاركين

اقتباس:

---

المشاركة الأصلية كتبت بواسطة Ramy Rateb

الف مليون مبروك على العربية و ربنا يكفيك شرها .. انت ماكملتش الحكاية و قلت عملت الواكس فين قبل كده و قصته إيه و أتكلف كام ؟ و هل عملت واكس للسانديرو و لا لسه ؟

---

انا اسف يا رامى باشا انى متابعتش بس تجربة الواكس اللى روحت عملته و مكانتش بنفس النجاح و لكن ساقص عليك ماحدث....(حلوة ساقص دى )ههههههههههه
البدايه لقيت اعلان على اوفرنا عن مكان اسمه زيرو كار فى مدينه نصر.مقابل 80 جنيه كار واكس كامل..اتصلت و حجزت معاد و روحت...المكان بسيط و صغير ...اصحاب المكان محترمين جدا لاقصى حد
كام عامل اكبرهم لا يتجاوز 16-17 سنه
بداء بغسيل من رايى اى كلام (علما بان صاحب المكان مكنش موجود ساعتها
بعد الغسيل بالميه (بس) نشفوها و بداو يحطوا الواكس (formula one wax)
التوزيع بتاع الواكس كان على قده اوى و خصوصا ان فى شويه جمع ع الفبر الاسود و اللى هو المفروض ما يحصلش
سابوها شوية بداو يمسحوا و انا بحاول اتابع ...الموضوع كان متلصاء خصوصا ان كان فى سيوك كتير متمسحتش مطرح الواكس
العربيه بوجه عام لمعيت لمعه حلوة و موضوع الشمع طلع فعلا مبيلمش تراب بالشكل اللى بيقولوا عليه و كمان مسح العربيه على الناشف اصبح اسهل ....كل ده عدى الحتت اللى متمسحتش من الشمع كويس...و الموضوع ده فات عليه شهرين و افتكر بفكر اعمله تانى بس هدور على حد بيفهم او اكثر اتقنا يعمله و لو رسيت اعمله بنفسى

اقتباس:

---

المشاركة الأصلية كتبت بواسطة ahhussien

الموضوع ده فات عليه شهرين و افتكر بفكر اعمله تانى بس هدور على حد بيفهم او اكثر اتقنا يعمله و لو رسيت اعمله بنفسى

---

تسلم يا باشا و لو لقيت مكان محترم ياريت تقولى عليه . شكرًا

تم انشاء صفحةRenault stepway lovers & owners على الفيس بوك للتواصل و تبادل الخبرات لكل ملاك و عشاق الساحرة (Renault step way)..... وعلشان كلنا اتحدنا فى الاختيار... اعتقد انه اكيد افكارنا هتكون متقاربة فى مجالات تانية كتير...وياريت كلنا نكون أدمن للصفحة دى....و الله الموفق((((((:

اقتباس:

---

المشاركة الأصلية كتبت بواسطة silver_eagle

تم انشاء صفحةrenault stepway lovers & owners على الفيس بوك للتواصل و تبادل الخبرات لكل ملاك و عشاق الساحرة (renault step way)..... وعلشان كلنا اتحدنا فى الاختيار... اعتقد انه اكيد افكارنا هتكون متقاربة فى مجالات تانية كتير...وياريت كلنا نكون أدمن للصفحة دى....و الله الموفق((((((:

---

استاذنك فى اللينك يا كبير....و لو انى مش استيب واى...انا سانديرو فقط...و لو ان كان نفسى الصراحة