الموضوع: جديد ولا مستعمل؟ فيرنا ولا لوجان ولا جولف؟ دماغي هتطق!

هو انا حابب اقول رايي عن خبرة 7 سنين في عربية الماني . بالتحديد سكودا فابيا 2001 وحابب اقوول ان العربيات دي احسن حاجة فيها 3 حجات:

1 ثبات
2 هيكل متين وامان
3 تقفيل وخامات لا يعلى عليه

بالاضافة الى التكنولوجيا العالية لكن ما انصحش اي حد يجيب العربيات دي غير حديثة يعني بالكتير فات عليها 5 سنين لانها لما بتبفتح بقها وبتبتدي تتعب بتخليك تشوف الويل وكل ما تصلح حاجة تلاقي حاجة تانية باظت وقطع الغيار حدث ولا حرج ,,
تخاف تروح تسال عليها في التوكيل لانك ممكن تتصدم لما تحب تجيبها استيراد فحاجتها عند ناس معينين في البلد ولازم تروحلهم مطرح ميبقو موجودين و مشكلة العربيات دي انها لما بتعطل بتقف مبتتحركش لان معظم مشاكلها (كهرباء او حرارة) وبعد ما تبهدلك لحد ما تجيبلها حاجتها استيراد باسعار غرييييبة (ثمن قطع الغيار الجديدة الكوري ارخص) تروح بقة تدور على كهربائي شاطر بيفهم في العربيات دي وعنده الكمبيوتر بتاع العربيات دي عشان تصحيح الاخطاء بعد التصليح
غير بقة ان اعادة بيعها تقييييل ومش اي حد يشتريها الا الي غاوي
فنصيحتي ليك عايز تجيب الماني وتستحمل مشاكلو يبقة هاتو حديث مش اكتر من 5 سنين فاتو عليه
عايز الي يمشي مع البلد والي ينجدك في اي حتة وقطع غياره عند البقال برغم من سوء التقفيل وقلة الثبات يبقة خليك في الكوري
ولو معاك ثمن الياباني فانا انصح بيه برضو حاجة زي الياريس مستعمل ب 73 الف حاجة زي كده تاخدها مثلا موديل 2008
وعموما ربنا يرزقك بالي فيه الخير ليك ان شاء الله

العفو يا باشا
بالنسبة للفيرنا فهي عربية عملية جدا لكن ليست لمتعة القيادة
لان فيه حجات كتير بتعكنن عليك وانت سايقها زي رداءة التقفيل والاصوات والشخللة وكمان الكراسي الغير مريحة (كراسي مصري)
التكييف ممتاز
فرامل متوسطة
ثبات مش قوي,, طول ما انت ماشي طوالي تحس انها ثابتة تيجي تلف الدركسيون شوية تتفرج على رقص الباليه
المساعدين الخلفي بيطلعو صوت تزييء
الباور متوسط النعومة لا يقارن بالالماني كان حلاوة وده بيرجع ان طرمبة الباور شغالة على سير لكن الالماني كهرباء
الموتور استجابته حلوة قوي ما شاء الله لكن الفتيس برغم انو ناعم جدا لكن تحس انو اضعف من قوة الموتور وكمان فيه نتشة
وكل ما تسال في التوكيل على حاجة يقولولك هية الفيرنا كده ههههههههه