الموضوع: مقابلة المنتدي لشهر اكتوبر-سي فود وبحر وسلام يا صيف :-)

السلام عليكم ورحمه الله
اتعودنا كل سنة على مقابلة شهر اكتوبر
المقابلة اللي بنقول فيها سلام يا بحر سلام يا صيف :-)
السنادي عاملينها سواحلية بس عالبحر الاحمر
يوم 5 اكتوبر القادم باذن الله
وهاتكون عائلية
عندنا اقتراحين
الاول :
فندق 5 نجوم بفايد (مش قرية شموسة عشان محدش يفتكر انها هي )
داي يوز بحر وبسين واستمتاع بالاوتيل والشمس والغداء بقي
اكلة سي فود محتررررمة من ابو علي احسن واحد يعمل سي فود في القناة للي عارفينة
سنجاري وجمبري وشوربة سي فود مليانة وسبيط
سي فود بجد مش هزار
التكلفة هاتكون تقريبا 125 جنيه للفرد شاملة كل حاجة في اليوم ماعدا التيبس ده كلام فاضي
وشاملة كمان غرفتين واحدة للرجال واخري للحريم
وبنحاول نوصل لعرض كويس اللي عايز غرفة بمبيت للاسرة ويمشي تاني يوم متاخر على 5 مثلا كدة يكون قضي يومين :-)
لان تاني يوم 6 اكتوبر يوم السبت اجازة رسمية برضه

العرض الثاني فندق 5 نجوم برضه في راس سدر وبحر احمر بقي وبسين واوتيل وغرفتين للشعب
بس مشويات واوبن بوفيه مش سي فود وهانحاول نرتب موضوع الغرف للاسر برضه للي عايز
الاطفال نصف فرد
البيبي ما يتحسبوش :-)
التكلفة هاتكون في حدود ال 100 جنيه لكل حاجة برضه

الاختيار ليكم معاكو 3 ايام فقط للاختيار يعني يوم الاربع لازم اكون عارف عشان انزل اعلان محترم
الفلوس هاتكون بايداع مباشر والدفع مقدم مش زي يوم فطار رمضان اللي نص اللي حجز واكد شفوي مجاش كالعادة دون حتي اعتذار وادينا بنعلن قبلها بشهر

هايكون اخر ميعاد لايداع المبلغ 30 سبتمبر بعد كدة مفيش حجز الا في حالة اعتذار فرد ودخول اخر مكانه
ده حجز اوتيل ووجبات ولازم يكون في عدد معين

ان شاء الله بنوعدكم بيوم يخليكم تدخلو البيات الشتوي وانتو مفضيين كل قرف السنة
بحر وبسين واكل وصحبة طيبة
وكمان هايكون في حفل افتتاح موقع نايل موتورز لبيع وشراء السيارات اللي افتتحناه تجريبي
يعني في حلو اهو بس لمو ايدك في التورتة علينا اقساط :-)

مش هانزل صور للمكان الا لما تتفقو وان شاء الله اي مكان فيهم هايعجبكم
راس سدر مايبعد عن فايد اكتر من تعدية النفق وحاجة بسيطة يعني بالكتير نص ساعة بالعربية بالكتير
نشوفكم علي خير يا اطيب صحبة
في رعاية الله
كريم منير


صورة من راس سدر