شكر واجب لنيسان واوتوايجبت بعد عذاب مودرن موتورز

**dr_hassan1eg** · 10-09-2012 11:03 PM

السلام عليكم
اعتقد ناس كتير عرفت موضوع الحادث بتاع عربيتى الجديدة الصنى
المهم العربية كانت عند مودرن موتورز الهايكستب (منهم لله) من يوم الاتنين اللى فات -8 ايام- وانى اتصلت بطوب الارض عشان قطع الغيار ولم اوفق
امبارح بعد ما كتبت شكوى لنيسان وكتبت الموضوع على نايل موتورز - اتصل بيا نيسان مشكورا وحولونى للمهندس/ حسام سعيد
هو انسان محترم واتناقش معايا فى الموضوع ووضحلى ان فيه مشكلة فى شحن قطع الغيار واكدلى انه عارف ان دى مش ذنب العميل لكن هتتحل فى اقرب فرصة
النهاردة رحت اشوف العربية فى مودرن - بصراحة صعبت عليا نفسي لما لقيت عربيتى مرمية والتراب مغطيها كأنها توتال لوس !!!!!!!!!!!!!!!
حتى شنطة العربية مفتوحة ولمبة الشنطة منورة بقالها 8 ايام ومحش فكر يقفل الشنطة او حتى يفصل البطارية !!!!!!!!!!
المهم انا قررت انى هاخد عربيتى ومش عاوز اصلحها خلاص
وفعلا اخدتها من مودرن
وكلمت المهندس حسام وقلتله انى هسوق عربيتى ذى ما هى لحين توافر قطع الغيار
هو طلب من اروح اوتوايجبت ابورواش عشان يكشفوا على العربية
وفعلا رحت
استقبال محترم - مش ذى استقبال بلية بتاع مودرن - ناس اكتف ومدربة بجد والحقيقة كان المهندس حسام بتاع المصنع مديهم فكرة عن الموضوع
انا قلتلته حضرتك اكشف على العربية وانا هاخدها لحين توافر قطع الغيار
المفاجأة
كل قطع الغيار موجودة فى اوتوايجبت !!!!!!!!!
2- المهندس احمد الرزاز استلم العربية وقالى هنسلمهالك -ان شاء الله- بعد 5 ايام عمل (فى مودرن كانوا 22 يوم من حين توافر قطع الغيار)
3- بساله عن سعر الاكصدام الخلفى قالى 560 جنية تقريبا ( سالت عليه مهندس مودرن قالى 1850 جنيه ده خلانى اتصل بمصنع نيسان واتاكد من السعر واقدم شكوى كمان فى مودرن موتورز
4- مقايسة التامين اللى عملها مودرن واتوافق عليها لقيت ان المصنعيات فى اوتو ايجبت تقريبا النص !!!!! ( صحيح التأمين هيحاسب) لكن انا هدفع 10% بدل اصلاح بالتوكيل

طبعا شكرا لنيسان ولشركة اوتوايجبت - اللى اصروا يعرفوا مين الشخص اللى رد عليا فى التليفون امبارح وقالى ان قطع الغيار مش موجودة وطبعا شكرا لنايل موتورز

وربنا يتممها بخير

**dr_hassan1eg** · 10-09-2012 11:05 PM

نسيت اكتب شكر كبيررررررررر جدااااااااااااااا للمهندس هانى .. مدير قطع الغيار باوتوايجبت لانه تقريبا هو اللى خلصلى كل حاجة

**dr_hassan1eg** · 10-09-2012 11:13 PM

نسيت انى اقولكم -عشان تكمل - انى وانا خارج من مودرن الهايكستب (منهم لله) الرخصة اتسحبت عشان الفامية واتخانقت مع الرائد عشان ارجعها - طبعا انا متخانقتش عشان انا بلطجى لانى وافقت على قراره رغم انى عرضت عليه ادفع غرامة - لكن اللى استفزنى بجد انى شوفت عربيات كتير مفيمه وبدون ارقام كمان ومعدية ومبيكلمهاش ومقدرش ان عربيتى مضروبة وخارج من توكيل رايح توكيل تانى (مكنتش بتفسح يعنى)- اللى عليها طيارة واللى عليها نسر ... ده اللى استفزنى بجد وخلانى اتخانق معاه لان رده سخيف انه ملوش مليون ايد عشان يمسك الناس كلها وانه تعالى البس ميرى واشتغل مكانى - طبعا انسان قليل الادب ومعرفش الشرطة دى هتحترم نفسها امته
المهم الاخر الحمد لله دفعت 50 جنيه واخدت الرخصة

**Dr_MaTrix** · 10-09-2012 11:15 PM

والله انا فرحت لك كتير ان الموضوع اتحل الحمد لله ............ الموضوع من الاول انك روحت غلط لمودرن وربنا وقعك فى كام واحد كده ما عرفوش يساعدوك لو فى مودرن او حتى اوتو ايجيبت

الف مبروك يا دكتور وعقبال ما نبارك لك على الاستلام لتانى مرة
ما تقولى موضوع التأمين ده اصلى عاوز اعمله

**zambarota** · 10-09-2012 11:16 PM

مبرووووك على الصيانه

ان شاء الله تستلمها على خير

فعلا مودرن موتورز الهايكستيب تعبان اوى

ناس ضايعه اصلا

وعربيتك تخلص ولا حتى يعبروك وينادوك

تحس انها ورشه والله

**dr_hassan1eg** · 10-09-2012 11:19 PM

المشاركة الأصلية كتبت بواسطة dr_matrix

والله انا فرحت لك كتير ان الموضوع اتحل الحمد لله ............ الموضوع من الاول انك روحت غلط لمودرن وربنا وقعك فى كام واحد كده ما عرفوش يساعدوك لو فى مودرن او حتى اوتو ايجيبت

الف مبروك يا دكتور وعقبال ما نبارك لك على الاستلام لتانى مرة
ما تقولى موضوع التأمين ده اصلى عاوز اعمله

شكرا جزيلا
انا كنت رحت مودرن مضطر والله لكن ربنا ستر
التأمين
انا مامن فى مصر للتأمين- تامين شامل بنسبة 3.7 % من قيمة العربية
لكن فهمت منهم انك لو هتصلح فى التوكيل بتتحمل انت 10% من القيمة لكن لو برة هم بيتحملوها كلها (يمكن عشان التوكيل اغلى)

**dr_hassan1eg** · 10-09-2012 11:21 PM

المشاركة الأصلية كتبت بواسطة zambarota

مبرووووك على الصيانه

ان شاء الله تستلمها على خير

فعلا مودرن موتورز الهايكستيب تعبان اوى

ناس ضايعه اصلا

وعربيتك تخلص ولا حتى يعبروك وينادوك

تحس انها ورشه والله

الله يبارك فيك
والله لما شوفت العربية مرمية فى مودرن والتراب مغطيها صعبت عليا
انا شفت عربه اخت عربيتى بتتسمكر من ورا مودرن - انا شوفت شغل انضف من ده عن سمكرية فى الشارع لانى كان معايا عربية قديمة قبل كده واعرف شغل السمكرة كويس
انا قولت بس اخلع بعربيتى منهم باى شكل
مش فاهم نيسان مديهم توكيل صيانة اذاى؟؟؟؟؟؟؟؟

**canner** · 10-09-2012 11:24 PM

يا سيدى ما حدش بيتعلم بالساهل و ربنا يسترها معاك

**Dr_MaTrix** · 10-09-2012 11:27 PM

المشاركة الأصلية كتبت بواسطة dr_hassan1eg

شكرا جزيلا
انا كنت رحت مودرن مضطر والله لكن ربنا ستر
التأمين
انا مامن فى مصر للتأمين- تامين شامل بنسبة 3.7 % من قيمة العربية
لكن فهمت منهم انك لو هتصلح فى التوكيل بتتحمل انت 10% من القيمة لكن لو برة هم بيتحملوها كلها (يمكن عشان التوكيل اغلى)

ما فيش نسبة اقل

.............. يعنى تقريبا 4الاف ......... والله كويس شوارعنا مش مضمونة صراحة

**dr_hassan1eg** · 10-09-2012 11:39 PM

المشاركة الأصلية كتبت بواسطة dr_matrix

ما فيش نسبة اقل

.............. يعنى تقريبا 4الاف ......... والله كويس شوارعنا مش مضمونة صراحة

بص يا سيدى
فيه حاجة اسمها تامين بتحمل
يعنى انت بتشيل جزء من المبلغ مع التأمين
بس معرفش نسبة كام بالضبط
وعموما يمكن التأمين ميكونش مهم اوى فى الاصلاحات الصغيرة
لكن لالالالالالالالالالالالال الالالالالالالالا قدر الله - وربنا يسترها مع الجميع - فى حالة التوتال لوس او السرقة هيتحملها هو ( مش هيبقى موت وخراب ديار) والصراحة للحق
مص للتامين معايا شركة غاية فى الاحترام