الموضوع: انا قررت اصنع سيارة افيدووني

المشاركة الأصلية كتبت بواسطة strongxx

بص....انا فيه واحد صاحبي عمل الحوار ده وعدي مراحل جامده في الموضوع ده وفضل يعدل ويصرف فيها لحد ما وصلت انه ركب لها مكنه فيات 132 2000 سي سي.....عايز أقولك انه كان بيتكلم في مصاريف 50 ألف

ومش حقولك طلعت ولا نزلت 128 لاني عمري ما أحتقرت العربيه دي لانها محترمه جدا جدا جدا....بس عاملها علي قد مقامها...متجيش تطلب من حصان انه يحرت أرض زراعيه لانك حتلاقي الحصان بيخلص منك وحيموت في الأخر لانها مش شغلته

نفس الكلام علي 128....هيه عربيه محترمه جدا وجميله....لكن راعي سنها...راعي حالة الصاج إلي معمول من السبعينات والثمانينات وأكيد إتعمل فيها العجب وإلي مش ممكن تتخيله وده بيرجع لدماغ كل سمكري إشتغل فيها ازاي......

بس عارف...العربيه دي فيها ميزه حلوه لان أقل تعديل في الموتور ممكن يعمل معاك فرق في السحب.....وحقولك علي شوية نقاط

إنت هات عربيه 128 واقعه زي ما قلت ماشي مش حقولك لأ.....بس تجيبها بالموتور ال1300 سي سي......طبعا حتاخد معاك سمكري علشان يكشف لك علي العربيه وانت بتشتريها ويعرف لك عيوبها وممكن تتعالج بكام وأزاي....بعد ما تشتريها تروح للسمكري وتتعالج عيوبها لو كانت فيها شروخات في السدر ولا بارومه واكله حتت منها.....وبعدين حتشوف الموتور أداءه عامل ازاي وده يحددها الميكانيكي...وعموما حتتعمل عمره للموتور لو محتاج وده مش حيكلف كتير

عندك بقي كام حاجه في العربيه دي هيه مصدر القلق الدائم وهي :-
الدينامو + الكربراتير + الإسبراتير + البطاريه + البوجيهات وطقم أسلاكها + ضفيرة الكهربا

الدينامو حتغيره بواحد بتاع شاهين جديد
الكربراتير حتجيبه إتنين باب جديد يوجوسلافي
الإسبراتير حتجيبه كهربا
البطاريه حتبقي سائله
البوجيهات تلاته شمعه بطقم أسلاك تخين او إسبور زي ما بيقولوا
وضفيرة الكهربا يتراجع عليها لو عايزه تتغير بضفيره جديده

وبكده حتلاقيها طياره علي الأسفلت.....بس متفكرش تبيع

الف شكر يا بشمهندس على الرد وجاري المعاينة

المشاركة الأصلية كتبت بواسطة semsem kane

طيب معلش انا اعتقد ان المبالغ دية كبيرة ( 33- 35 الف جنية ) لية يعنى انت لو جيبت اى عربية وفوقتها مش هتصرف عليها المبلغ دة وممكن نعملها سرد تفصيلى للاسعار

لو هنقول ان ال 128 اللى واقعة هتعمل 7000 جنية مع ان معنى الكلام دة ان فيها حاجات شغالة بس احنا عايزين عربية منتهية وصدقنى هتلاقى اقل من كدة يعنى ممكن تجيبها ب5000 الاف جنية

هتجيب ماتور استيراد من عزبة شلبى ب 1500 جنية بالفتيس

ضفيرة استيراد ب300 جنية

تابلوة ب400 جنية ويمكن اقل

سمكرة ودوكو 2000 جنية

طقم كراسى بالكنب + شغل الصالون كامل بالمصنعية 2000 جنية

طقم جنوط استيراد ب800 جنية وممكن فية لقط ب500 جنية

طقم كاوتش جديد ب 1200 جنية

بطارية جديدة ب 275 جنية

طقم فوانيس ورا وقدام والكلام دة مش هيعمل 200 جنية

4 مساعدين جداد ب 600 جنية

عفشة امامى وخلفى كاملة جديدة ب 2000 جنية

ردياتير ب 100 جنية جديد

عفشة خلفية سوست عرضية + مقصين خلفين = 200 جنية

4 مساعدين 600 جنية

علبة دركسيون استيراد 150 جنية

ومعلش يعنى اكيد العربية اللى هتجيبها لو مافيهاش اى حاجة سليمة يبقى تاخدها على 4000 جنية مستريح اوى

يعنى لو حسبت التكلفة هتلاقيها فى حدود ال 22 الف جنية بتمن العربية بس هيبقى معاك عربية مشدودة صح

باين على حضرتك راجل عملى دخلت فى صلب الموضوع وجبت من الاخر
كل الكلام اللي انتا كتبته كلام يتطابق تقريبا مع الواقع بس ممكن اسالك سؤال انتا مكرر المساعدين مرتين ؟؟!! وسؤال اخر في حاجة العربية محتجاها تاني؟؟؟؟؟؟ ارجو الرد علشان مبحبش المفاجات

المشاركة الأصلية كتبت بواسطة ahmed1269

بص هو طبعا انتا لو جبت 128 تعبانة يبقى هتعدى ال 20 الف طب لية هتلك عربية مشدودة وريع دماغك وابعد عن قرف الصنايعية دة غير كمان الوقت اللى هضيعة لاء هتلك عربية مشدودة كويس وريح دماغك

تمام بس اللي شادها اكيد هلكها برده فى فرق ان العربية تتبني قدامك من الرفرف للرفرف

مش هتكلف كتير ولا حاجه في ناس اصلا بتعمل كده وتجار كمان
يجيب العربية خلصانه ويظبطها ويرجعها جديدة ويكسب فوق تمنها 4000 جنيه
طبعا فكرة كويسة بس خلي بالك لازم تكون فاهم في المواضيع دي
لان الصنايعية حرامية وهضيع وقت كمان كبير معاهم

المشاركة الأصلية كتبت بواسطة semi

مش هتكلف كتير ولا حاجه في ناس اصلا بتعمل كده وتجار كمان
يجيب العربية خلصانه ويظبطها ويرجعها جديدة ويكسب فوق تمنها 4000 جنيه
طبعا فكرة كويسة بس خلي بالك لازم تكون فاهم في المواضيع دي
لان الصنايعية حرامية وهضيع وقت كمان كبير معاهم

اللي بيعمل كده الصنايعية التجار يعني يكون سمكري وتاجر أو كهربائي وتاجر أو عفشجي وتاجر ... كده هو تقريبا بيصرف زيرو مصنعية وبيجيب حاجات قديمة شغاله يمشي بيها العربية وبيروق الصاج والصالون بالذات لأن 90 % من الزبائن دول أهم حاجة عندهم...
لو عايز تعمل اللي حضرتك بتقول عليه ده ما تعمله في حاجة نصين مثلا بي إم أو ميتسوبيشي أو ممكن تفضي عربية في عربية ثانية زي ما تجار الاستيراد بيعملوا وساعتها ممكن تركب عربية مشدودة على إيدك وتفضل معاك فترة طويلة