الموضوع: سؤال لملاك الابيزا من 94 الى 99 بخصوص اضاءه العدادات

المشاركة الأصلية كتبت بواسطة syd

ازيك يا ابو حميد - ايه الغيبة الطويلة دي كلها ؟؟

بص يا باشا بالنسبة لحالتك دي - يستحسن لو تجيب علبة عدادات 98 علي بعضها
منها هتستفاد بالأربي ام والساعة والكيلومتر الديجيتال ومنها تستفاد بالأضاءة والحالة

اما بالنسبة للمفتاح
هتجيب قطمة علي بعضها (كونتاكت + طارة + دراعات مساحات + انتظار) مشكلتك الوحيدة انهم هيكونوا قاطعين الكابل بتاع الreader بتاع الكونتاكت
ودة مش هيجي غير انك تشتري علبة عدادات وقطمة من نص سليم علي بعضه

ولو عايز نصيحة اخوك محمد
هات الطابلوه كامل بالقطمة بالطارة قطعية واحدة علشان تاخد معاهم علبة الفيوزات والكتاوت والدنيا كلها سليمة ماتلمستش

لأن انا لما اشتريت القطمة اداني الكونتاكت بالزور وكان الكابل بتاع الreader دة طبعا مقصوص

الreader هو الحلقة اللي حوالين الكونتاكت

تحياتي
وان شاء الله اشوفك علي خير قريب

والله المستعان
،
،

المشاركة الأصلية كتبت بواسطة ehab_mansour

مهندس احمد فينك يا أخي متحرمناش من وجودك بيننا و عايزين نشوفك قريبا
انا مع الأراء اللي فوق انك تشتري الطقم كامل يعني حاول تنضف مرة واحده و جمد قلبك و علي فكرة التنضيف ده ممكن تظبط معاه كمان الضفيرة و تخلي كل حاجه فبريكة و لكن هتكلفك شوية و لكن هتبقي ظبطت عربيتك صح حتي تختفي مشاكلك اللي كنا تناقشنا فيها سويا لو فاكر

لكن للعلم ان عدادات ال 98 برده اضائتها مش كويسه قوي اللي جامده جدا عدادات ال 2000 لو عرفت تسقط علي طقم 2000 عدادات و طابلوه كامل بضفيرته تبقي برنس و ينفع يركب عادي لكن اللي يعرف يظبطه صح و كده تبقي نقلت عربيتك نقلة جامده

و لكن عندي نصيحة انك متفكرش في مصاريف كتير عليها يعني لو لقيت العملية هتكلفك كتير يبقي خليك زي مانت و ممكن تفك عداداتك و تشتريلها لمبات اقوي حاجه بسيطة و تنضفها هتبقي زي الفل و تكبر دماغك

بالتوفيق ان شاء الله

السلام عليكم
بشمهندس محمد بشمهندس ايهاب انا فعلا مكسوف منكم جدا
على فكره انتو واحشنى جدا ونفسى اشوفكم واطمن عليكم واشارك زى الاول بس لظروف الشغل بخش ابص بصات على السريع من اليو اس بى مودم وحتى مبعرفشى اضيف ردود
بالنسبالى كده الرد اكتر من وافى وفهمت انا هعمل ايه
انا هسيبنى مؤقتا من العدادات والاضائه والحركات دى وهظبط القطمه الاول وبعديها هكشف على الضفيره لقيتها تمشينى شويه هصبر عليها لقيتها ميته هغيرها ان شاء الله
بالنسبه لموضوع الايموبليزر والريدر انا عندى الريدر سليم ومركبه حاليا حوالين القطمه بتاعتى واللى خلانى استغرب انى لقيتله مكان وكان العربيه دى كانت مصنعه اساسا عشان يركب فيها
مدى الريدر عندى قصير جدا يعنى لازم اقرب الشيب من الحلقه دى جدا جدا ولانى عارف انها بتكون فى المفتاح معنى كده انها هتكون بعيده ما لايقل عن 5 سم من الريدر مع وجود حاجز بينهم اللى هو الفبره بتاعه القطمه وده معناه حاجه من الاتنين اولا ان الريدر عندى فى مشكله والمدى اللى بيلقط منه السيجنال قصير او ان المفناح بتاع العربيه لما بيركب جواه الشيب بيستخدم سلاح المفتاح انه يكون ناقل للاشاره وبكده السلاح بيكون حلقه الريدر من حواليه فبتشتغل بدون ادنى مشكله انا سالت عن القطمه كامله من غير الريدر طبعا لانه بيتشال مع ضفيره المكنه كامل بالمفتاح ب400 جنيه اى موديل من 94 الى 99 وممكن يكون فيه كلام كمان ونويت اشتريه
وسواء ركبت الشيب فى المفتاح او ركبته فى ميداليه زى مانا عامل مش مشكله بالنسبالى لانى محتاج القطمه عشان مفتاح الكونتكت وده عندى بايظ وبدور من زراير بلدى فى التابلوه ومحتاج كمان طاره لانى اللى عندى اكلها الفار :) علما بانى سالت على الطاره لوحدها ب200 جنيه والمفتاح كان ب300 بدون ادنى مبالغه
بصراحه انى عندى فضول جدا انى اعرف فكره الايموبليزر مش لعربيتى بس بس ده حب استطلاع واقربها كنت بدعبس انا واخويا فى عربيته الميجان 2006 وكانت المرايه مكسوره وهى مرايه ضم كهربا وسعرها فى التوكيل 2400 جنيه معرفشى على ايه فضلنا نفكها ساعه وقعدنا نفهم فى فكرتها بس شغاله ازاى نص ساعه وهو اصلا خريج هندسه قسم انتاج وبعد ما فهمنا الفكره اقتنعنا ال2000 جنيه تمن الفكره وال400 تمن خامات المرايه :)وان شاء الله ربنا يهدينى واصلحها وانزل صوره ليها بعد ما تتصلح
سؤال تانى محيرنى برضه للناس بتوع الابيزا هل طبيعى ان عربيتى توطا قوى من ورا اول ما احط اى حاجه فى الشنطه انا سالت على جوز المساعدين ورا بالسوست كانوا ب250 جنيه بس خايف اركبهم ويطلع ده عيب دائم فى الابيزا
يعنى سؤالى انت عربيتك ابيزا 94 ركبت عندك فى الكنبه اللى ورا شخصين وزن كل واحد 75 كجم لما تنزل تبص على العربيه بتلاقيها نزلت لحد فين وهل بتحك فى المطبات العاديه
بالنسبالى انا بيكون العجل حته منه جوه الرفرف فعلا وبتحك فى معظم المطبات من ورا وساعات من النص وهى راكب فيها جنوط اسبور 13 بتاعتها
اسف على الاطاله

المشاركة الأصلية كتبت بواسطة syd

اقرأ المشاركة دي
فيها كل ما تريد عن الأيموبلايزر


http://www.nilemotors.net/nile/831-a...post3874511333


والله المستعان
،
،

كلام جميل وشرح وافى ما شاء الله واكدلى حاجات كتير كنت متلخبط فيها ربنا يباركلك يا رب
بس برضه لسه سؤالى معلق ليه لما ركبت الشيب فى المفتاح محصلشى تواصل للشفره وليه لازم اقربه جامد قوى عشان يلقط
تانى حاجه موضوع المساعدين والسوست اللى ورا عامله ايه معاك يابو السيد

المشاركة الأصلية كتبت بواسطة syd

بصراحة يا باشا انا لازم اشوفها بنفسي عشان اقدر اقولك الأيموبلايزر عندك ماله

بالنسبة للمساعدين
انا بركب ورا وزن تقريبا ممكن تقول من 150 كجم الي 200 كجم
بتهبط مني شوية - يعني تقريبا لحد اول حرف الكاوتش
وباخد المطبات بوشي او بورب
احيانا بتحك واحيانا لا

يعني الشغل العادي بتاعها
وواحب اقولك ان كدة والعفشة عندي ورا عايزة شغل

المفروض العربية مهما ركبت فيها ماتهبطش بالشكل دة
يعني تقدر تقول ان انا في اول السكة وانت في اخرها
لكن لو العفشة بحالتها (السوست والمساعدين طبعا) مش بتنزل اوي - اخرك تهبط شوية بس مش بتوصل للعجل نهائي
وعلي كل الأحوال - احنا عندنا تجويف العجل (الكارتيرة) فيه مساحة محترمة تستحمل ان العربية تهبط لحد اول الجنط

احب اقولك علي حاجة
لما تحب تشوف السوست والمساعدين - اوعي تفتح الشنطة وتحاول تنزل وترفع في العربية من قلب الشنطة (هتلاقيها ملبن معاك) ودة لأن المساعدين بالسوست عندنا راكبين بميل مش عدلين
لو عايز تكشف - اقفل الشنطة ومن نص باب الشنطة حاول تنزلها وتطلعها (كأنك بتحاكي تأثير المطبات)
نزل وسيب ونزل وسيب ونزل وسيب ومرة واحدة سيبها - لو فضلت تنزل وتطلع - يبقي المساعدين في الطراوة
لو بتنزل معاك بسهولة يبقي السوست ضايعين
لأن احتمال كبير تكون مشكلتك في السوست مش المساعدين

بقولك ايه يا احمد
ما تستني لحد مقابلة القسم ونشوفها
او كلمني ونتقابل ونشوفها مع بعض

هستني تليفونك
اوك ؟

تحياتي

ياخى انت بتحرجنى بذوقك مش عارف والله اقولك ايه
لو كده ظبط مواعيدك انت وانا اعدى عليك انا بكون عند مسرح الزعيم من 9 ل5 كل يوم وبروح فيصل او هرم وممكن نتقابل عادى هديك تليفون بكره الصبح ان شاء الله علشان برضه تكون انت عرفت ظروفك ايه
شكرا جدا لاهتمامك