صنى 2013- اذكى من ما كنت اتخيل

**د. علاء ابراهيم** · 16-09-2012 07:32 AM

اخوانى الكرام و احبتى فى الله
كنت قد لا حظت بعض الامكانيات و الاشياء البسيطة فى السيارة
و ان كانت حجات صغيرة لكنها ذات فائدة كبيرة و اتمنى ان اراها فى كل السيارات الحديثة

بعيدا عن انها تنبهك لعدم غلق الابواب جيدا ( عن طريق لمبة خاصة)
بعيدا عن انها تذكرك بحزام الامان عن طريق لمبة خاصة و صفارة مزعجة ( و الله واحد سمعها و هوا راكب معايا قالى تصدق عربية محترمة!)
بعيدا عن انها تنبهك لو فتحت باب العربية و ما سحبتش المفتاح من الكونتاكت ( عشان ما تنساش تاخده)
بعيدا عن فتح الابواب ( المسوجر) اوتوماتيكيا عند سحب المفتاح من الكونتاكت و غلق المسوجر اوتوماتيكيا عند بدء تحرك السيارة بسرعة اعلى من 10كم/ساعة ( يمكن برمجة كلا الامكانيتين فى السيارة او الغاء احداهما) لن اخوض فى هذه التفصيلة لان احد الاخوة الاعضاء قام بعمل موضوع منفصل لها http://www.nilemotors.net/Nile/304117-2013.html

اولا : عند الحوادث لا قدر الله - فى حساس شغلته انه يحس باى خبطة جامده فى جسم السيارة-ابواب السيارة ( السنتر و المسوجرات) تفتح اوتوماتيكيا لتسهيل عملية انقاذ الركاب (و اتمنى ان لا يحتاج احدنا هذه الميزه عافانا و عافاكم الله)

ثانيا: من منا لم ينسى ان ينزل فرامل ايد - على الاقل ولو فى مرة- و طلع بالسيارة و مشى و الفرامل مشدودة
معى هذه السيارة الوضع مختلف ... صحيح ان فى لمبة بتفضل منورة (!) بنفس الشكل ده
لكن كمان اول ما السيارة تتحرك و السرعة تزيد عن 7كم/ساعة الصفارة تشتغل ( و كان السيارة بتقول لك فوووووق يابنييييى) و تسكت الصافرة بعد ما انتا تفوق و تنزل فرامل اليد

ثالثا: نور التابلوه (او النور الصغير للفوانيس) او النور العالى او الفوجات
من منا غير معرض انه ينسى اى حاجة من دى شغاله بعد ما يغلق السيارة و تفضل شغاله طول الليل و تانى يوم الصبح تجد البطارية نائمة
مع هذه السيارة الوضع مختلف .... مجرد ما تضغط مفتاح تامين السيارة lock مش بس المسوجرات بتقفل
لا كمان الانوار السابقة دى بتقفل حفاظا على البطارية ( وكان العربية واخده بالها انك ناسى الحجات دى)
و لما ترجع للعربية لو لغيت الامان بالضغط على unlock لن تعود للعمل مرة اخرى ( العربية لسه شايفه ان ماجاش الوقت المناسب ان الحجات دى ترجع تشتغل)
لن تعود الا عندما تفتح انت الباب ( يعنى العربية عرفت انك وصلت لها و داخل جواها فحتلاحظ انك سايب النور و تتصرف)

رابعا: من منا لم ينسى المفتاح بداخل السيارة من قبل؟

مع هذه السيارة" الوضع مختلف.... هى مصممة ان الحركة دى صعب جدا تحصل
طول ما المفتاح فى الكونتاكت هو فقط مفتاح و لا يعمل كريموت

و العربية بتعمل صفارة و هيصة لو خارج و ما اخدتش المفتاح من الكونتاكت
كمان لو حاولت تغلق سنتر العربية و انت خارج ... حيفتح تانى ( هوا مصمم انه ما يتقفلش و الباب مفتوح لازم تكون الابواب مغلقة)
يعنى لازم تخرج من العربية و معاك المفتاح و تقفل الابواب و بعدين تعمل lock

خامسا: و دى خاصية انا بحبها اوييييى
مين فينا ما عندوش حماده صغير ( سواء ابن او اخ صغير او اى طفل و حتى اى شخص ناضج على سبيل الخطأ) ممكن يلعب فى المفتاح و يفتح العربية و هيا مركونة تحت فى الشارع
و ساعتها اى حد معدى يقدر يفتح العربية؟؟؟؟
مع هذه السيارة الوضع مختلف..... لن تظل السيارة مفتوحة كده ( ابسليوتلى) لانك ان لم تبادر بفتح احد الابواب فى خلال 30 ثانية يعود نظام الامان للعمل و يتم غلق السيارة مرة اخرى ( بشرط انك اصلا تكون عامل lock يعنى هيا اصلا كانت مسوجره قبل ما حماده ياعب فى المفتاح و يعمل unlock )

و اخيرا : بمرور الوقت كلما تعاملت مع هذه السيارة ادرك ان ورائها صانع ذكى
و انه فعلا مع هذه السيارة.... الوضع مختلف

**S O P H O S** · 16-09-2012 07:38 AM

ما شاء الله
ربنا يباركلك فيها ..

**HAITHAM1985** · 16-09-2012 09:09 AM

خلصت فيكى كل الكلااااااااااااام ........... أنا مش لاقى كلام أقوله

**Ahmed_selmy** · 16-09-2012 09:32 AM

المحترم محترم بردوا...اليابانى لا يعلا عليه

**kar!m** · 16-09-2012 09:40 AM

بسم الله ما شاء الله .. ربنا يبارك لك فيها.

80% من اللي حضرتك قلته ده كان موجود في الأوبل الكوسا اللي معايا .. موديل 2004 .. و كنت شايفها حاجات عادية يعني.

أول مره أعرف ان الحاجات دي مكانتش موجودة في الصني اللي قبل دي.