والله يا جماعة الموضوع دة مش مقياس
انا اعرف واحد لحد النهاردة معاه ابيزا 94 من الزيرو اول يد والعربية الله اكبر عليها بحالتها من يوم ما اشتراها وتحركاته بيها محسوبة - صحيح ماعرفوش شخصيا بس من اول يوم اشتراها بشوفها معاه وبيركنها جمب البيت عندي
دي واحدة
قيس عليها عربيات كتير بنفس المنطق
اللي عايز يحافظ علي عربيته بيحافظ عليها سواء اوروبي او اسيوي
وفي بردو سيراتو موديل 2011 اتلعب فيها البخت وتعديلات وراشة اجزاء وووو
دايما لما بنيجي ننصح حد بنشدد علي الحالة لدرجة اننا يمكن مابقناش نقولها باللفظ لأنها بقت حاجة مفروغ منها
ممكن عربية موديل 94 وتلاقي الكيلومتر بتاعها اقل من الكيلو متر بتاع عربية تانية 99
حتي لو صاحبها نصاب ولاعب في الكيلومتر بردو الفيصل هو الحالة ايه يعني لاعب في الكيلومتر بس مديني العربية بحالة الكيلومتر الموجود قدام عيني
ثم ان النهاردة بالذات في الأبيزا انا اقدر ارجعلك العربية لحالة الزيرو بس اديني فلوس
الأستيراد ماخلاش - انا مش عايز اكثر من شاسيه ودواخل سليمة وانا عندي الكفاءة ارجعلك العربية علي الزيرو (وفريكة برة كمان)
انا ساعة لما عملت الحادثة كنت هجيب رفارف وكبوت نفس لون العربية (يعني لو انا كنت عايز اغش كنت هبيع العربية فبريكة برة وجوة وموتور جديد وفتيس جديد وتكييف وباور وايه - حالة شاذة كمان)
في كلمة اتقالت هنا في القسم مرة من فترة - بس للأمانة مش متذكر صاحبها
قالك - الألماني مايتركبش ورا واحد شحات (يعني ايه شحات؟؟)
يعني ماتركبش ورا واحد مش بيصرف علي العربية (طب وانا هعرف ازاي ؟؟ - هراقبه سنة قبل ما اشتري ؟؟) بيبان
لما حضرتك تشوف هيئته وطريقة كلامه وعربيته - هتعرف بيصرف عليها ولا بيهملها
لما تسأله مين الميكانيكي بتاعك
لما تسأله بتجيب حاجتها منين
لما لما لما
مش هنكر ان احتمالات نظافة الموديلات الأحدث - اكبر من الأحتمالات في الموديلات الأقدم
لكن بردو مش مقياس
ونصيحتي الغالية - اوعي تركب ورا واحدة ست
لعدة اسباب ...
1- بترميها عند الصنايعية يلعبوا فيها البخت
2- مش هقولك الدبرياج والكلام الفارغ دة - ولا حتي الصاج والخبطات
3- ممكن بمنتهي السهولة تديها لأي حد يسوقها وبردو يلعب فيهاا البخت
4- مش بتهتم بصيانات ولا بقطع غيار (والديل شوف عدد الأعضاء من الجنس الأخر في المنتدي ولو متواجدين هتلاقيهم في الأجتماعي اكثر من القسم بتاعهم)
5- مش بتهتم بأزاي تحافظ علي العربية (اقصي أهتمام بالغسيل والنظافة للبودي والصالون والدباديب)
هحكيلك علي موقف شوفته امبارح بعيني الأتنين
انا امبارح كنت راكن في شارع في وسط البلد بدون ذكر اسماء
روحت اشتري غدا وكنت هرجع اكله في العربية
شايف راكن بعدي بكام عربية - عربية هاتشباك بردو بدون ذكر اسماء -
عربية تانية قافلة عليها صف تاني ومعشق غيار وشادد فرامل اليد (غالبا العربية اوتوماتيك)
يمين شمال - الواد السايس مش او البواب مش عارف يزقها
والعربية الهاتشباك راكبها بنوتين (لا يتعدوا ال25 سنة) واللي سايقة طبعا مش عارفة تطلع بالعربية
كلكسات وو ووو
روحت ورجعت وهي لسة واقفة
قاعد بتغدي في العربية وشايف في المراية الواد السايس راح منزلها وراكب هو
وهوب - راح فضل يطلع قدام وورا وراح عادل وشه وراجع بظهره طالع علي الرصيف وعادل وش العربية وخرج بيها من خرم الأبرة (ناهيك عن احترافيته ودماغه العالية)
بس لو راجل عمره ماهيدي عربيته لحد تاني يسوقها ويطلعله بيها علي الرصيف ويعرض عربيته للخطر
المهم بعد العربية ما طلعت ومشيت - لقيت العربية بنص اكصدام فقط وطبعا النص المش موجود كان مستخبي وانا مش شايفه لأنه كان النص اللي ناحية جوة
عرفت وقتها ان كان لازم البنت دي ماتعرفش تخرج بيها لأنها واضح انها بتعامل العربية معاملة سيئة وفي الأخر ترميها لتاجر يبيعها ويقولك استعمال سيدة
عجبي