الموضوع: مساعدة فى المارروتى

المشاركة الأصلية كتبت بواسطة sunset

هي تربيط العفشة وتشحيم عصاية الفتيس وتغيير زيت الفتيس بتتعمل عند مين !؟

تربيط العفشة عند عفشجي او عند تظبيط الزوايا او ميكانيكي كويس و تكلفتها حوالي 10 ج و عند ظبط الزوايا ممكن تقوليله يربطها و تديله 5 ج في ايديه كذلك تشحيم عصاية الفتيس ممكن يتعمل عند بتاع ظبط الزوايا اثناء ظبط الزوايا او ميكانيكي
تغيير زيت الفتيس ياما في البنزينات و مش اي بنزينة بتغير ياما عند اي محل بيغير زيوت بس في البنزينة لازم تشتري الجيركن كله اما في المحل بيحاسبك ع عدد اللترات فقط من الجيركن و زيت فتيس موبيل لزوجة 90 عامل 24 ج للتر

و اوعي حد يحط للعربية زيت فتيس من الاسطوانة البرتقالي لأنها عبارة عن خليط من الزيوت و الشحم و بيبهدل الفتيس و في نفس الوقت متعرفيش حط كام لتر و ممكن ميكونش بيحط اساسا خليه يجيبلك جيركن يتفتح قصادك و يتحط منه قدامك ياما متغيريش من عنده

و مهما قالك متسمعيش كلامه و لا تقتنعي باي هجس يقوله زي مثلا ان زيت الفتيس الفبريكة مبيتغيرش و الكلام ده لأن زيت الفتيس بشكل عام بيتغير مش لأن خواصه بتتغير فقط لكن نظرا لأن الرايش الناتج عن الاجزاء المتحركة بيستقر في القاع حوالين الطبة نظرا لأن فيها مغناطيس لكن مع الوقت مبتقدرش تاخد الكم ده كله من الرايش و بالتالي الباقي بيبقي عايم في الزيت و يدخل بين الاجزاء المتحركة لذلك بيتم تغييره اما الاوتوماتيك فبيكون ليه فلتر كمانبيتغير مع الزيت عكس المانيوال اللي مفيهوش
و زيت الفتيس بيتغير كل 30-40 الف ده المتوسط قد يصل لـ60 الف و قد لا يصل لـ20 الف ع حسب ظروف القيادة و بالتالي بنخلينا في المتوسط

المشاركة الأصلية كتبت بواسطة sunset

جزاك الله خيرا اخي الكريم على اجابتك الوافية المفيدة

انا عملت صيانة 40 الف لكن ما غيرتش زيت الفتيس ومش عارفة ضبطولي العفشة والكلام ده والا لأ

رحت مرة بنزينة انظف العربية غسل وتشحيم وقلتلهم يربطوا العفشة بس صراحة ما ارتحتش للبنزينة دي خالص في الغسل
منصحش بالبنزينات تظبيط الزوايا او اي حاجة في العربية اكتر من البنزين و الغسيل العادي للعربية
في الاماكن ديه شوفي بريدجستون او اي اماكن كويسة لظبط الزوايا


العربية 40 الف وشوية دلوقتي

وكمان من ساعة ما اشتريت العربية ما عملتش ضبط الزوايا ده

هو بيتعمل كل قد ايه ؟

تظبيط الزوايا كل 30 الف تقريبا او 3 -5 شهور و ده نظرا لشوارعنا و المطبات و النقر فمع الوقت لازم تظبطي زوايا




ومش عارفة برضه موضوع الكاوتش اعمل فيه ايه ؟ وامتى اعرف انه محتاج يتغير ؟ وايه حكاية تغير وتبديل الاماكن ده ؟ وامتى العجل يتنفخ ؟

بيحتاج يتغير في حالة توافر اي شرط من الاتي
النقشة اتمسحت - الكاوتش فيه لوحة - اتعمل فيه اكتر من خابور - ظهرت فيه بلالين - عدي عليه من تاريخ انتاجه 6-7 سنين
في الحالات ديه يتم تغييره فورا
و ده موضوع يبين ازاي تقرأي العلامات ع الكاوتش
http://www.nilemotors.net/nile/232923-a.html

و في حالة تصليح الكاوتش بسبب مسماير او غيره بلاش خوابيير يفضل لحام لأنه بيحافظ ع الكاوتش ع عكس الخابور بيضعف جدا الكاوتش و سعر اللحام الواحد في حدود 7-8 ج افضل مكان بعمل فيه اي حاجة للكاوتش هي بنزينات وطنية سيبك من المحلات اللي برة كتيير منهم حرامية و لو الشخص مش فاهم بيقلبوه من الاخر
تغيير و تبديل الاماكن بصي في الكتالوج هتلاقيه شارحها و بتاع العجل عارف تتغير ازاي
امتي العجل بتنفخ شوفي العجلة اذا كانت نايمة شوية او العربية ماشية تقيلة او مش مظبوطة يعني بمعدل كل اسبوع اسبوعين ع حسب و لو مليتي الكاوشت نيتروجين بيفضل الضغط جوة الكاوتش ثابت لمدة طويلة اكتر من الهوا نظرا لأن الهوا بيتأر بدرجات الحرارة اكتر من النيتروجين




كمان كنت عاوزة أسأل على تنظيف العربية
هل يضر مسح العربية بسائل تنظيف الزجاج مثل جلانس وأشباهه ؟

اي منظفات غير المخصوص للعربية بيضر الدهان مع الوقت
في حالة عدم وجود شمابو غسيل السيارة يكفي بالمية


وبالنسبة لغسيل العربية تحت الكبوت
هل كثرته مضرة ؟ العربية بتلم تراب بطريقة بشعة

المواتير اساسا مصممة للعمل في الظروف الشاقة يعني شوية التراب اللي ع الموتور مش هيعملوا حاجة يكفي ان كل فترة تنضفي الموتور و الحوض بالهوا المضغوط وعند تغيير الزيت او تخلي العامل في البنزينة في القسم المخصص للغسيل ينفخه بالهوا
ممكن يتم الغسيل مرة واحدة في السنة بعد الشتا و غسيل العربية من تحت
لأن اقرب الاجزاء اللي ممكن تتضرر من الغسيل طقم الكهربا




كمان كان فيه واحد قال انه بيغسل الموتور بالليفة والصابون
هل ده ضار ؟ وازاي بيتمسح ؟ الواحد يكب ميه يشيل الصابون والا يعمل ايه !!!؟؟

لا ده الهبل بعينه بصراحة ليفة و صابون هو بيحمي قطة ناقص يقولي مية سخنة عشان متاخدش برد
ممكن لو موضوع التراب مضايقك تنفخيه بالهوا زي مقولتلك و كل كام شهر حتة فوطة زفرة و و يتمسح الموتور و ما حوله لأن موضوع انهمي ضربوا المية في الحوض ممكن يضر بطقم الكهربا و احنا في غني عن الكلام ده

معلش أسئلتي كثير :zb_sor1[1]:

و لا يهمك اي استفسار اتفضلي و لكن رجاء يكون في موضوع منفرد في القسم للافادة العامة و في نفس الوقت لعدم تحويل الموضوع كساحة للاستفسارات