الموضوع: عاجل – الأسعار الجديدة للوقود والبنزين

تكملة لردي السابق في نفس الموضوع ...

للأسف لو بصينا علي موضوع رفع الدعم والغلاء مقابل ذلك
هتلاقي ان الوحيد اللي هيتحمل القرار وهيدفع ضريبة الغلاء هو الموظف في القطاع الخاص او بمعني ادق الموظف اللي مش في أيده رفع سعر المنتج او الخدمة اللي بيقدمها وحتي لو فرضنا ان مؤسسته رفعت السعر فبردو مش هو المستفيد بل صاحب منشأته

يعني بمثال بسيط جدا
هنفترض دلوقتي اني مثلا صاحب تجارة او مقدم خدمة وانا اللي بستفاد مباشرة من ارتفاع او انخفاض سعر منتجاتي او بضاعتي او حتي الخدمة اللي بقدمها يعني وليكن المثال علي حلاق شعر
هروح اشتري فطار (طعمية وفول والذي منه) هلاقي طبعا الأسعار زادت لأن المطعم شغال بأنبوبة غاز والفرن كذلك والخضري اللي المطعم بيجيب منه الخضار (زي البطاطس والطماطم والباذنجان والخص والخيار وووو) غلي بضاعته لأن مصاريف النقل زادت فأنا كحلاق او مقدم خدمة هرفع أجرة قص الشعر بنفس القيمة اللي زاد بيها ثمن الفطار علشان دخلي مايتأثرش يعني لو متعود افطر ب 5 جنيه والنهاردة اشتريته ب 7 جنيه هرفع الأجرة من 10 ل 12 جنيه
ولما صاحب محل الخضار غلي بضاعته أشتراها المحامي والدكتور والسباك والمهنين كلهم بالغالي فرفعوا الفيسيتا بتاعتهم هما كمان لمواكبة غلاء الأسعار ولعدم الأحساس باي نقص في دخلهم فرفعوا أسعارهم بنفس قيمة الغلاء

مش هطول عليك اكثر من كدة في المثال بس افترض معايا ان اي حد فأيده رفع سعر منتجه او بضاعته او خدمته هيرفعها
والوحيد اللي مش فأيده اي حاجة هو الموظف وللأسف غصب عنه هيتعامل مع الحلاق والدكتور والخضري والمطعم والمواصلات وهيدفع قصاد ارتفاع سعر السولار جنيه هيدفع 5 جنيه يوميا زيادة عن ما كان بيدفع قبل الغلاء (طبعا 5 جنيه دي مع افتراض اقصي درجات التفاؤل) وللأسف الشديد انه مش هيقدر يغلي او يرفع سعر الخدمة اللي بيأديها او البضاعة اللي بيبيعها وحتي لو حصل ورفع السعر فمش هيستفاد منها والمستفيد هو صاحب المنشأة وابقي قابلني بعد سنة لما يرفع مرتبه 10% او 200 جنيه ايهما اقل .

بجد القرار دة لازم يتعامل معاه بحكمة شديدة جدا جدا جدا
الموظف هيموت ويتفعص لو السولار غلي - لأن لو السولار غلي هتلاقي تأثيره وصل لعلبة الدوا وعلبة اللبن ورغيف العيش وحتي الملابس.
مفيش حاجة مش بتتأثر بالسولار
يعني الدوا هتلاقي المصانع رفعت السعر لأن تجار الكيماويات رفعوا السعر لأن شركات الشحن والنقل رفعوا السعر
علبة اللبن لنفس الأسباب ولأن الأكل بيوصل المراعي بتاعتهم بأغلي من ثمنه وكذلك مصاريف الشركة المنتجة نفسها لأن عندها عربياتها اللي بتقوم بالتوزيع
ونفس المنطق في رغيف العيش لأن الفرن شغال بالغاز او بالسولار والأتنين هيغلوا
والملابس لنفس السبب وهو تكاليف النقل

والمواصلات هتغلي

وللأسف الموظف الغلبان هو الوحيد اللي مش هيستفاد اي حاجة وهيغرم دم قلبه

تحياتي

والله المستعان
،
،