المشاركة الأصلية كتبت بواسطة mohamed_88sk
يا سيدي الفاضل nobody يقصد أن الماتركس ماهياش عربيه 4*4 ولا سيارة مهام صعبه ولا هي عربيه عاليه من الجيبات بأنواعها ..
فملوش لازمه خالص الأكصدامات الحديد والنيكل زي ال 4*4 يعني أغلب الناس بتحطها عالماتركس لمجرد تشبه بال 4*4 ده غير أن أكتر اللي راكبنها فاكرنها حاجه جيب ومش فاهمين انها مجرد سيارة فئة الهاتش باك فان يعني أولا وأخيرا هاتش باك زيها من الأخر زي الأيديا نفس الفئة (أنا عارف كلامي ممكن يزعل ناس كتير من ملاك الماتركس هنا في المنتدى بس أعذرني لازم أقول الحق)
دي نقطة التانيه فعلا حتحمل عالشاسي بتاع العربيه في الصدمات والعياذ بالله
نقطة تالته حضرتك لو تلاحظ أكصدامات السيارت الأن ومثلا من كام سنه فاتت أختلفت وبقت واخده شكل منحني ومش باظه لبره زي زمان وده حصل ليه ؟؟؟!!! عشان لاحظوا أن والعياذ بالله لما أحد الماره بيتصدم الأكصدامات القديمه بتبهدله وتطلع عين أهله وعشان كده غيروها للاشكال الحاليه .
نقطة أخيرة السيارات ال4*4 بتنزل من غير الأكصدامات الحديد دي عشان السبب اللي فات إلا بعض الشركات(مع أني ماشفتش الصراحه) والمفروض الناس بتركبها لو بقى بتوع سفاري وجبال وألخ .
فبصراحة الظابط ده يستاهل كل أحترام وتقدير أنه بيراعي أسباب السلامه معلش مش عشان أي حد يحافظ على عربيته يعرض حياة ناس تانيه بسبب الأكصدام ده لموت محقق لأن العربيات نزله بأكصدامها بغرض تخفيف الصدام ..
وبعدين معلش حضرتك ما تساويش تمن مثلا فانوس عربية 4*4 بماتركس فطبعا صاحبها لازم يخاف عليها وتلاحظ أغلب ال4*4 الأكصدامات المعدن قدام الفوانيس وفوق الرفرف بتاعها .. وممكن تلاقي البعض منزله شويه قدام رفارفها حقول لحضرتك ليه عشان لو لاقدر الله حصل حادث مع واحد من الماره كده كده هو بعد الخابطه مش حيطلع عالكبوت غالبا يا أما تحتها أو بيطير على عكس الماتركس والهاتش باك والسيدان بيكونوا واطين فبعد الخبطه بيطلع عالكابوت فلازم الأكصدام يكون يخفف الخبطه ويساعد أنه يطلع عالكبوت وتلاحظ كمان أن ده كله في كل الفئات حتى ال 4*4 برضو الأكصدام بيحاولوا يخلوه يهون الصدمه ...
معلش أنا طولت بس كان لازم أوضح النقاط دي..