فيات قردة استيشن .... تصدقو

**aif** · 03-07-2008 11:44 AM

النهاردة الساعة 8 الصبح وانا لسة باقول ياهادي وكنت في الزيتون عند والدي وانا في شارع سليم ... ألاقي التحفة دي معدية جنبي
انا اول مرة في حياتي اشوف فيات قردة استيشن ....
اللي ما يعرفش الفيات قردة ...
هي عربية فيات قديمة جدا كانت منتشرة في مصر في الخمسينات والستينات من القرن الماضي ... وكانت شغالة تاكسي زي الفل ... وكانت عاملة زي الزلطة .... يعني لو خبطت مرسيدس 2008 ح تقسمها نصين وبدون اصابات تذكر في الفيات ...
وبعد القردة ..... ظهرت الفيات R وطلع المثل الشهير " العار ولا الآر " ... وبعد حقبة زمنية طويلة ظهرت سيارة الشعب .... 128 اعتقد كان في اوائل السبعينات ...
وكانت ابوابها الفيات قردة بتفتح في اتجاهين متعاكسين ... وباينه في الصورة ... وأكرة الابواب ...تماما زي أكرة باب الحمام في الشقق القديمة .. والكرسي الامامي كنبة واحدة والفتيس في الدركسيون ... ومش متأكد كان فيها كلاكس والا كان السواق بيزعق للناس عشان توسع
وكنت دايما زماااان اقعد افكر .... لو البابين الأمامي والخلفي اتفتحو جامد في نفس الوقت ...ايه اللي ممكن يحصل
ولسة فيه عربيات قردة ماشية في مصر .... لكن استيشن ....لا أعتقد ...وعلي فكرة العربية زي العروسة وحالتها فل ... واضح انها كانت مرفوعة مش اقل من 100 سنة ضوئية

**fahd_628** · 03-07-2008 12:25 PM

شبة تاكسى لندن :)

**hamedo0** · 03-07-2008 12:58 PM

يا استاذ احمد انت اول مره تشوفها

**iBiZa** · 03-07-2008 01:02 PM

انا شفتها قبل كدة كذا مرة عند التجنيد فى جسر السويس و فعلا استغربت جدا من منظرها.

**mohamed ibiza** · 03-07-2008 01:09 PM

ايه الشيء ده:):):):):) دي موديل كام يا فياتاوية

**Ahmed Hassan** · 03-07-2008 01:09 PM

انت شفت وش العربيه؟ أصلها من الضهر شبه رينو 4 بالضبط

**hazem_khidr** · 03-07-2008 01:25 PM

الف شكر للصوره يا احمد باشا
العربيه دي الاب الروحي لفئه ال Mpv
يعني اول عربيه تنزل بالشكل دا و تكون الرائده
فيات طول عمرها حكايه:)

**homme49** · 03-07-2008 03:02 PM

وكانت ابوابها الفيات قردة بتفتح في اتجاهين متعاكسين ... وباينه في الصورة ... وأكرة الابواب ...تماما زي أكرة باب الحمام في الشقق القديمة .. والكرسي الامامي كنبة واحدة والفتيس في الدركسيون ..

و أذكر أن ذلك من العيوب الكبيرة و الفاضحة لتلك السيارة
و هو أن الباب الأمامى كان يفتح للخلف و ما يسببه ذلك من إحراج للسيدات و الآنسات
خاصة فى الستينات و إنتشار موضة المينى و المايكرو جيب

و الشباب البيئة الذى يتلطع أمام السيارة عند نزول أو ركوب السيدات