1600 عادي خالص
وبالنسبة للكتالوج عيني بس مش على الكمبيوتر، ممكن تسأل وانا تحت أمرك أدور على اللي عاوزه منه
عرض للطباعة
1600 عادي خالص
وبالنسبة للكتالوج عيني بس مش على الكمبيوتر، ممكن تسأل وانا تحت أمرك أدور على اللي عاوزه منه
عندي الكتالوج يا باشا
عينيا ارفعهولك بس استني عليا شوية لأن مساحته كبيرة جدا
وهكتبلك تقرير حالا بالعربية في حدود معلوماتي
بس اصبر عليا
تحياتي
بالنسبة لصاحب الموضوع
فا فعلاً أنا مع رأيك و زوق حضرتك فى إنك مرجح البورا عن الباسات لانها شبابى و شكلها أحلى و كمان فعلا ماتورها أقل , لكن فى على فكره أسباب كمان تخليك فعلاً تصر على البورا منها إن كنت سمعت فى المنتدى الكريم هنا , إن المصفحة الحديد أسفل الشاسيه بتبقى تقيله زياده عن اللزوم بالتناسق مع الماتور , يعنى لو جيت حملتها شوية ولا حاجه بتلاقى إن عزمها ضعف وسحبها تقل , دا غير كمان إن على حد علمى والله أعلم إنها فى إعادة البيع غير مرغوبه مثل البورا يعنى أنا لاحظت إن الباسات ممكن تلاقيها أرخص من البورا مع إن الباسات فئه أعلى
وربنا يوفقك لما هو فى الخير
كنت وعدتك اكتبلك تقرير بسيط عن البورا في حدود معلوماتي عنها
بص يا باشا
طبعا في البداية بحييك علي أختيارك لسيارة من مجموعة فولكس فاجن عاما والبورا خاصاً
شركة فولكس شأنها شأن معظم منتجي السيارات بتعمل معظم فئات السيارات ابتداء من الميني وحتي الفارهة
وطبعا أشهر اربع فئات عندها هم البولو والجولف والجيتا والباسات ودول كل واحدة فيهم ليها فئة او Category مختلف عن الأخري وهم علي الترتيب سوبر ميني او صب-كومباكت subcompact (للبولو) و العائلية الصغيرة او C-Segment (للجولف) و كومباكت Compact (للجيتا) وأخيرا العائلية الكبيرة (للباسات)
ولو تلاحظ علي مدار الموديلات هتلاقي ان الأربع عربيات متخذين نفس الواجهة وخطوط التصميم مع اختلاف الحجم للأربع عربيات ودة كان واضح جدا في الجيل الخامس من الجولف والجيتا والباسات (2004-2010) هتلاقي الجيتا مشتركة مع الجولف في الوش ومع الباسات في الظهر
الجيتا هي العربية المتوسطة بين الجولف والباسات وواخدة مزايا المزج بين الفئتين -فهتلاقيها تتمتع بالروح الرياضية الخفيفة للهاتش بتاع الجولف والقوة والفخامة واناقة العائلية للباسات
الجيل الرابع منها هو الوحيد اللي أطلق عليه بورا لأسباب تجارية ولكنها طرحت بأسم جيتا في بعض الأسواق واتجمعت في المكسيك وجنوب افريقيا والمانيا
بداية انتاجها كان في النص الثاني من 99 ونزلت مصر في 2000 تحت اسم بورا وتزامن نزولها مع التوليدو في سيات والأوكتافيا a4 في الأسكودا وأشتركوا كلهم في شاسيه الجولف 4
البورا مبنية علي شاسيه فولكس فاجن الشهير A4 او PQ34 واللي أشترك معاها فيه الأودي A3 و TT ومن فولكس جولف 4 والنيو بيتل ومن سيات التوليدو 2 ومن اسكودا الأوكتافيا 96-2004
ومعني لما أقولك متخذة نفس الشاسيه يبقي مبنية علي نفس قاعدة العجلات والعفشة ومش بس كدة لا كمان كلهم مشتركين في نفس المحرك والفتيس وآلات الجر
وبكدة يبقي انت راكب الجولف بروحها الرياضية في شكل عربية عائلية متوسطة شيك وأنيقة.
بالنسبة لمشاكلها فهتلاقيها نفس مشاكل الجروب دة كله من العربيات واللي مش تعتبر مشكلة او عيب ظاهر يسئ ليها
بالنسبة لأعادة البيع فهي مطلوبة جدا جدا بشرط الحالة الجيدة
بالنسبة للمتوسط السعر فهي بتبدأ من 55 معاك لحد 65 بشرط الحالة الجيدة
بالنسبة للمحرك فهي نازلة بمحرك 1.6 حقن مباشر متعدد النقاط وبناقل حركة يدوي 6 سرعات (5 امامية و1 خلفية) واوتوماتيك 5 سرعات.
اتطبق فيها الروح الرياضية بتاعة الجولف في لوحة العدادات باللونين الأحمر والأزرق الشهيرين للجولف والبيتل
فيها تقريبا كل وسائل الأمان المعروفة
ايموبلايزر
2 اير باج
فرامل ABS
أحزمة امان ثلاثية النقاط
مساند رأس
فيها كل الكماليات بتاعة وقتها
تكييف
باور
4 زجاج كهرباء
مرايات كهرباء
سي دي
مفتاح بالريموت والأنذار
الصالون ضيق نوعاً ما والشنطة حجمها متوسط ودة لأن العربية مبنية علي شاسيه الجولف وواخدة طابع العربية المدمجة Compact
استهلاكها في البنزين معقول جدا وموفرة عن نظائرها في نفس السعة اللترية
نزل منها موديلات فيها مواتير اكبر وبوسائل امان اكتر زي EBD + ABS = ESP و كمان TCS ونزل منها فتايس اوتو ب6 سرعات
حقيقي
عربية بحييك علي أختيارك ليها ولو مالقتش منها حالة تعجبك خش علي ولاد عمها زي التوليدو 2002 والأوكتافيا 2000 - 2004 او أختها الصغيرة الجولف 4
كلهم يتمتعوا بنفس الروح وبنفس الفئة السعرية
اتمني اكون وصلتلك تقرير سريع خفيف عن العربية
تحياتي لحضرتك
والله المستعان
،
،
بسم الله ما شاء الله
إيه الجمال دا كله إيه الجمال دا كله :) :)
إيه الحلاااااوه دى :)
ربنا يكرمك يا أستاذ سيد بجد على المعلومات الجميله دى
الله يخليك و يكرمك ويعزك يا أستاذ محمد
حضرتك تستاهل كل خير :) :)
ميرسي يا جماعه علي تعاونكم وارائكم ومعلوماتكم القيمه اللي الواحد فعلا بيستفيد منها كثير
بس انا كان عندي ملاحظه بسيطه بخصوص الاسعار اللي بتبدأ من 55 معاك لحد 65 بشرط الحالة الجيدة انا عن نفسي مشفتش اي حد عارض بوره حالتها كويسه اقل من 75 الف جنيه
ويا ريت فعلا اللي معه الكتالوج يحاول يرفع لنا حتي الجزء بتاع شرح الازرار وتفاصيل السياره من الداخل وكمان معدل الصيانه وتغيير الزيوت ( فتيس وبوجيهات وفلاتر وخلافه )