نصائح لانوس 2004 كامله مانيول

**samehenany05** · 24-09-2012 04:13 AM

الحمد لله اشتريت لانوس كامله مانيول من يومين

بس صاحبها كان مهمل شويه فأنا عاوز بعض النصائح

زجاج الكهرباء كان بيعلق ............ رحت لكهربائى عملى تقويه وعمل نضافه للمفاتيح بتاعت الزجاج والحمد لله خد 60 ج سعر 2 كتاوت
كمان تم شحن التكييف وخد مبلغ 120 ج

لسه عاوز اروح للعفشجى العربيه فى المطبات فيها رجرجه صاحبها قالى عاوزه مساعدين امامى

كمان عاوز اركب جهاز انذار ..... بس عاوز اعرف احسن نوع ايه وينفع اجيبه بمفتاح وإذا كان فيه نوع بيفتح الشنطه والسعر كام

فيه بقى حاجه رحت افول العربيه خدت 29 لتر والعداد مجبش آخر وعملت 110 ك والعداد نزل لبعد النصف فجيت افول خدت 13 لتر وبرده مؤشر العداد مطلعش للآخر فمش عارف بقى انا كده مفول ولا لأ ومش عارف احسب معدل استهلاكها
كمان عاوز اشترى غطاء للعربيه تنصحونى اجيب قماش ولا ووتر بروف والسعر كام
اسف للإطاله بس عاوز النصيحه

ولو فى حد من المنصوره ياريت يعرفنى على احسن صنايعيه للتعامل معهم واماكن قطع الغيار

**تامر.محمد** · 24-09-2012 05:26 AM

بالنسبة للعفشة روح لعفشجي محترم عشان يشخص صح و يركب صح , و يا ريت تستعمل قطع غيار اصلي
انصحك بمحمد انيس (مش فاكر اسمه اوي) اللي جنب ابو الحسن اللي جنب مطلع كوبري صفط عند جامعة القاهرة , او بمحمد عواد اللي في اخر شارع الاربعين اللي جنب حديقة بدر في جسر السويس, بس طبعا دول في القاهرة (ما اخدتش بالي و انا باكتب و كتبتهم خلاص :)))) )

انا كنت مركب جهاز انذار spy في شارع دمشق و كان حلو اوي , عيبه الوحيد ان ريموته الحتت الفضي اللي فيه بعد فترة بتقشر , كان مكلفني بالتركيب 300 جنيه

بالنسبة لفتح الشنطة بالريموت هو بيفتحها بس هاتعوز تقلب فتح الشنطة كهربا لأنها على واير , قالوا لي في شارع دمشق ان ده بيكلف حوالي 120 جنيه كمان

بالنسبة للبنزين متوسط استهلاك العربية 200 كيلو في الصفيحة , و المؤشر بعد ما بتفول بياخد وقت شوية على ما يطلع لحد الآخر
110 كيلو قصاد 130 لتر يعني اكتر شوية من المتوسط , مفروض كانوا يبقوا تقريبا 130 كيلو , جرب تاني بقى, لو ما كانش شوف بوجيهاتك و نضف بوابتك و فلتر الهوا بتاعك شوفه عايز يتنضف ولا يتغير, و شوف ضغط الهوا في كاوتشك