قصة عربيات نادره و مميزة أتباعت فى مصر _ كل واحد يكتب قصة عربيه كاملة بالأسعار
حبيت يكون الموضوع دة لهواة السيارات النادره
سواء كانت عربيات كلاسيكية أو سبور قديمة أو حتى حديثة و كانت نادره أوى أو فان قديمه
المهم أنها تكون عربيه مش معروفة فى مصر أو مش منتشرة
على سبيل المثال (البويك - الجى أم سى - لينكولن - السيارات الفان بكل أحجامها - هكذا)
و كمان كل واحد يكتب القصة كاملة بالأسعار عشان يكون مرجع لهواة السيارات النادره و كلنا نستفيد من القصص دى
بس طبعا فى مصر لان لو برة مصر ممكن يجيلنا شلل سداسى
أنا هحكى أول قصة و دى كانت عن فورد موستنج و دى كانت أول قصة لواحد زميلى لأمتلاكة عربيات أساسا كان طول عمره بيدور على عربيه رخيصة و خلاص لأننا كنا لسه خارجين من ثانوى عام مكانش هامه أمكانياتها أو شكلها أو غيره و فضل يدور عليها فتره طويلة جدا و مكانش لسه قرر هيجيب أية و طبعا كالمعتاد أنا قولت أكيد هيجيب فيات 128 أو حاجة زى كدة
غاب و رجع مرة واحدة قالنا أنا فيه عربيه فورد موستنج هجيبها
طبعا كلنا فكرنا أنها موديل جديد و ضحكنا و كان هيجيلنا هبوط من الضحك و هو كمان أخد الموضوع بهزار و فجأة و بدون مقدمات لقيناه جاى بعربيه فورد موستنج موديل 79 بس طبعا خلاها تحفه و حكالنا القصه بالكامل
قالنا أنه كان بيكلم واحد قريبه على عربيه تكون رخيصه قاله أنا عندى عربيه فورد موستنج موديل 79 و عايز أبيعها قاله بكام قاله بـ7 ألاف جنيه لأنها مركونه و مش بيستخدمها خالص (طبعا صاحب العربيه دى لو يعرف قيمتها ميفكرش يبيعها ) و قالنا أن حالتها كانت زبالة لكن كانت بتمشى كويس
غيرلها حاجات فى الميكانيكا و رشها من بره و جابلها فرش جديد و عملها كسوة فى التابلوه شبه البلاستيك كدة بس مقاوم للسخونيه و جابلها جنوط وفوانيس كريستال خلاها بتلمع من كل أتجاة و دفع حوالى 9 ألاف جنيه يعنى أكتر من سعرها
يعنى بمعنى أصح وقفت عليه بـ16 ألف جنيه رغم أنها تحفه فنيه
بعدها بحوالى سنه بالظبط زميلى دة باع العربيه بـ24 ألف جنيه :whtauwant:
الفكرة كلها فى العربيات النادره و الدروس المستفاده
أن لو واحد مش حاسس بقيمة التحفه الفنيه إلى معاه ممكن تتباع بسعر رخيص جدا جدا
لكن هواة السيارات النادره ممكن يشتروها بأى سعر مهما كان و دا الغريب فى الموضوع كله
أية قصص العربيات إلى شوفتوها نادره فى حياتكم ؟