أبو البنات

**OlaOsman** · 05-07-2008 08:58 PM

المشاركة الأصلية كتبت بواسطة ows212

فى مثل بيقول
قالوللى ولد اتفرد ضهرى واتسند
قالوللى بنية مالت الحيطة عليا
.................................................. ......................
انا ربنا رزقنى ببنتين زى الفل
ربنا يعوض عليك وتخاويها ده اللى سمعته بعد الأولى
ربنا يعوض عليك وتخاويهم ده اللى سمعته بعد التانية
انا نفسى ربنا يكرمنى بولد علشان الناس بس تستريح .. مع ان الموضوع مش فارق معايا خلاص لا من ناحية ابو البنات ولا من ناحية الميراث

على فكرة الناس اللي من النوع ده عمرهم ما هايستريحوا و دايما هيلاقوا حاجة يقرفوك بيها و يحسسوك انها ناقصاك ما دام همه مركزين معاك اوي كده. انا رأيي ما تحاولش ترضي الناس بأي طريقة من الطرق و لو انت فعلا عايز طفل تاني يبقى عشان انت و زوجتك عايزين كده و متفقين على كده، انما ابدا مش عشان الناس تستريح.

ربنا يبارك لك في بناتك يا رب و يجعلهم ذرية صالحة بإذن الله :)

**H.ibrahim** · 05-07-2008 09:57 PM

على فكرة انا لما اتجوزت و المدام كانت حامل فى المرة الاولى كانت هى نفسها فى بنت و انا قولت لها انى مش فارقة معى بنت او ولد كلهم نعمة من الله و الاثنين بالنسبة لى زى بعض فى ( الاهتمام والتربية والمصاريف و الخ ....... ) لكن يمكن علشان هى بنت فى وسط 3 اولاد كان نفسها فى بنوتة و ربنا فعلا رزقنا بى ( حبيبة ) و بعدين دلوقتى المدام على وشك ان تضع المولود الجديد الثانى و نفسها برده فى بنت علشان متبقاش البنت من غير اخت زيها لكن السونر الاخير بيقول ان المولود ولد لكنى بردوه مش فارق معى ان يكون ولد او بنت فانا فى اعتقادى ان ممكن ولد يجعلك تزعل انك خلفته او العكس فالحياة حاليا لا تعترف بولد او بنت المهم ان الله يبارك فى المولود و ان نحمد الله على ما رزقنا - والله اعلى واعلم

**ows212** · 06-07-2008 03:13 AM

المشاركة الأصلية كتبت بواسطة OlaOsman

على فكرة الناس اللي من النوع ده عمرهم ما هايستريحوا و دايما هيلاقوا حاجة يقرفوك بيها و يحسسوك انها ناقصاك ما دام همه مركزين معاك اوي كده. انا رأيي ما تحاولش ترضي الناس بأي طريقة من الطرق و لو انت فعلا عايز طفل تاني يبقى عشان انت و زوجتك عايزين كده و متفقين على كده، انما ابدا مش عشان الناس تستريح.

ربنا يبارك لك في بناتك يا رب و يجعلهم ذرية صالحة بإذن الله :)

لا مش كده ... الناس دى عبارة عن اهلى وجيرانى ومعارفى والزباين اللى عندى
دى ثقافة عامة ... والناس بتقول كده من منطلق كلمتين يواسونى بيهم
خالة مراتى كانت معانا فى الولادة التانية وكان عندها يقين ان المولود ولد
ومش هاقولك زعلت ازاى لما عرفت انها بنت