تقرير على السريع,استهلاك بنزين "صنى الجديدة"

**Dr_MaTrix** · 27-09-2012 01:01 AM

السلام عليكم ورحمة الله وبركاته

الموضوع ده بخصوص اول مشوار طوالى فعلى ليا بالصنى الجديدة

الرحلة :كانت من المنصورة للقاهرة

التفاصيل:
مونت الصبح التانك على الاخر لحد تكة المسدس,كنا اربعة اشخاص وبما ان العربية بتلين كانت السرعة القصوى 100 واحيانا 110 وبدون تكييف الا مرة وانا راجع شغلته 10 دقايق قولت اجربه برده وطبعا المسافة المقطوعة كان فيها وقوف كتير فى اشارات فى القاهرة وزحمة

المسافة المقطوعة: رايح جاى باللف فى القاهرة 286 كيلو لحد البنزينة فى المنصورة

الكمية المستهلة للمشوار: 23 لتر برده لحد تكتة المسدس وكان العداد البزين فى نصه بالظبط

انا حبيت بس انقل تجربتى, وبصراحة العربية بصفة عامة ممتازة وربنا يبارك فيها..., والسلام ختام

سبحان الله وبحمد سبحان الله العظيم

**Bishoy.Girgis** · 27-09-2012 01:19 AM

اولا شكرا ً علي التقرير ..
علي فكرة دا استهلاك ممتاز جدا .. ده معناه ان اللتر بيعمل معاك 12.50 كيلو
بس لو عايز تعرف الاستهلاك بالظبط يبقي لازم تفول العربية لحد الزور و تصفر عداد الرحلات و تموت بعد مسافة كبيرة و من هنا تعرف استهلاكك بالظبط اد ايه

**Ahmed.TV** · 27-09-2012 01:33 AM

الف مليون مبروك يا دوك
وتسلم على افادتك للقسم نيسان
وبسم الله ماشاء الله القراءة كويسة بالنسبة لعربية لسه فى التليين .. وكمان انت بتقول انك دخلت فى زحمة
وكمان كان مفروض متزدش على 100 فى السرعة عشان تقدر تحكم على البنزين اكتر .. بس كدا مش وحش ابدا كبداية واهم حاجة اتاكد من مقاس ضغط الكاوتش انه مظبوط ولالا

وربنا يباركلك فيها ويكفيك شر الطريق ويبعد عنك العين والحسد

تحياتى ليك

**Youssef.Awad** · 27-09-2012 01:38 AM

شكرا على نقل التجربة .. ومقارنة بتجارب باقى الاعضاء هتلاقى الصفيحة معاك ممكن تعمل 300 او 320 كم كمان مش 250 كم بس بعد صيانة الالف و ال5000 كم

**dodyam** · 27-09-2012 11:10 AM

المشاركة الأصلية كتبت بواسطة peaceman

اولا شكرا ً علي التقرير ..
علي فكرة دا استهلاك ممتاز جدا .. ده معناه ان اللتر بيعمل معاك 12.50 كيلو
بس لو عايز تعرف الاستهلاك بالظبط يبقي لازم تفول العربية لحد الزور و تصفر عداد الرحلات و تموت بعد مسافة كبيرة و من هنا تعرف استهلاكك بالظبط اد ايه

طب ليه لازم يفول لحد الزور هو مش المفروض الأدق عند تكة المسدس
يعنى لو عربيتين نفس الموديل و فولتهم لحد تكة المسدس
المفروض البنزين فى العربيتين أد بعض بالظبط لان العوامتين وصلوا لنفس المستوى
لكن لو عامل البنزينة فول كل واحدة فيهم لحد الزور
هنا ممكن تختلف شوية
لان ممكن يفول واحدة أقل من التانية مش لحد آخر الزور