العربية من الركنة مبتقومش والبطارية سليمة وشغالة !!!!
السلام عليكم
بعد ما الحمد لله جيت ووصلت المنتدى بالسلامة أو بمعنى أصح المنتدى وصل عندى بالسلامة وداعا فيس بوك نايل موتورز وهاى منتدى بس عاوزة الردود والخبرات تنزل مطرة ترف عليا :coool:
العربية بتاعتى ريجاتا 86 لما بتقعد اكتر من اربع ايام منزلش وحتى مسخنهاش اجى بعد كدا ادورها بتحلف بالله ما هى قايمة
كشفت على البطارية مظبوطة وسليمة وشحنها مية مية والعيب مش منها لانها شغالة ومنامتش ننة هوووووو:embarrassed:
المهم بقى مرة دارت بان اتجرت بعربية تانية وفضلت فيها احاول ادور وانا جايبة التانى وكارك دبرياج دارت بس بعد ما المارش صوت وطلع تاريخه هو والبطارية والموضوع دا معجبنيش ورحت لميكانيكى قالى لا هى زى الفل قام بتعليه حاجة تخلى ال rpm بيعلى شوية وهى واقفة بيقرب على رقم 10 لان كانت احيانا يقل اوى لدرجة تفصل
المهم بقى ان كل مرة العربية تتركنلها كام يوم تعمل نفس الحركة
مرة تانية دارت ان حد من الجيران فتح غطا الموتور وحط بنزين وبعدين فتحت الشفاط ودورت فصلت مرة وبعدين دارت الحمد لله
هل بقى كل مرة تتركنلها كام يوم هنزل اعمل فيها الحركة دى ؟
وهل دا طبيعى يحصل ؟
والعيب منين ؟؟
واكتشفت حاجة انهاردة ان فى سلكة من السلوك الموصلة للموبينه فاصل والسلك دا ماشى فيه كهربا ومش شايفة ان فى تأثير عالعربية العربية عادية بس كل اللى حساه الفترة اللى فاتت ان فى قفلة بسيطة فى الكهربا لان لما اكون مشغلة الكاسيت وادوس كلاكس الاغنية او السورة ترجع من الاول تانى
وسؤال أخير معلش رخامة يعنى
عاوزة اتعلم واعرف توصيلات الكهربا فى العربية بادئة منين وماشية ازاى فى الريجاتا علما بأن عربيتى بتقفيلة المصنع مش ملعوب فيها خالص شرياها من مالك اول كان محافظ عليها جدا لحد ما اشترتها منه
هل فى فى المنتدى هنا كدا ؟ ولو مفيش دلونى على موقع يعلمنى
شكرا نايل موتورز
