عاجل جدا بطارية جافة 70 امبير

**DONYO** · 02-10-2012 11:57 AM

المشكلة باختصار اني شاري بطارية جافة لعربيتي من 6 اشهر وبضمان سنة وشهادة الضمان مختومة بختم المحل لكن ما ادانيش فاتورة.
ومن كام يوم ركنت بالليل عادي وجيت تاني يوم لقيت البطارية فاضية تماما لدرجة ان نور الصالون حتى مابينورش لما تفتح الباب ، المهم اخدت وصلة ودورت العربية ورحت المحل الراجل كشف عليها لقاها فاضية قاس شحن الدينامو لقاه تمام راح شايلها وحطها عندة على الشحن واداني واحدة مستعملة وقالي يومين وتعالالي.
رجعتلى قالي تمام اتشحنت وزي الفل قولتلة المهم ما تفضاش تاني وكان الموءشر اخضر ماسافت ما روحت من الدقي للهرم مع التكييف المؤشر بقى اسود والنور ضعيف .
رجتلة تاني رفض يبدلها زي الضمان ما بيقول وقالي مش هبدلها الا لو بايظه تماما ومش مهم ان المؤشر يبقى لونه اسود او اخضر المهم تشتغل .
وقالي هنسيبها في المحل من غير شحن ولو سربت الشحن نبقى نغيرها ومن الواضح كدة انه مش ناوي يغيرها.
السؤال هو :
1 - هل جهاز حماية المستهلك ممكن يعمل حاجة بدون فاتورة الشراء علما بان شهادة الضمان عليها الرقم المسلسل للبطارية ومختومة بختم المحل.
2- اية انسب اسلوب اتبعة مع واحد زي دة ؟
اسف اني طولت عليكم ....وشكرا

**moumen_hs** · 02-10-2012 01:19 PM

بص ياباشا حقك بالضبط هو انة هيبدل البطارية بس حضرتك هتدفع نص تمنها لان الضمان سنة حضرتك أستخدمتها نص سنة يعنة نص الاستهلاك ومعلش هم دة المتبع ودة الصح حتى لو هتقول أن البطارية المفروض تعد 3 سنين
عرفت حضرتك حقك هو دة بالضبط . بالزوق الاول أحنا ناس محترمين مكنش بقلة الادب والعافية وحضرتك متكنش لوحدك وبتلهم فى المحل ولا حد يشترى منهم وهيخاف على سمعتة وبعد كدة حضرتك أشترى من مكان يكون كبير وموثوق فية ولا نسترخص علشان فرق 20 ولا 30 جنية المهم المكان المحترم

**omarhelalyehia** · 02-10-2012 01:35 PM

مهم الفاتورة ....البطارية نوعها ايه .....انا عندى فارتا كويسة .....خد حقك منه فلوس و ما تاخدش من عنده حاجة

**mohamed_selim** · 02-10-2012 01:36 PM

ده للسيينا يا باشا؟
بص حصل معايا حاجه شبه كده ... البطاريه بتفضى و لما تشحنها تشتغل كويس و تفضى و شحن الدينامو سليم ... بس طلع مكان اللحامات فى ضفيرة الدينامو اللى بتدى للبطاريه (لحامات الشيكارتون) مع السخونه بتدى مقاومه عاليه و الشحن مبيوصلش للبطاريه ....
خلى كهربائى نضيف يمشى ورا الضفيره دى و ينضف اللحامات القديمه و يأكد على كل الوصلات و جرب تانى بالبطاريه المشحونه

**akmm** · 02-10-2012 02:32 PM

نوع البطاريه ايه

**DONYO** · 03-10-2012 11:35 AM

المشاركة الأصلية كتبت بواسطة moumen_hs

بص ياباشا حقك بالضبط هو انة هيبدل البطارية بس حضرتك هتدفع نص تمنها لان الضمان سنة حضرتك أستخدمتها نص سنة يعنة نص الاستهلاك ومعلش هم دة المتبع ودة الصح حتى لو هتقول أن البطارية المفروض تعد 3 سنين
عرفت حضرتك حقك هو دة بالضبط . بالزوق الاول أحنا ناس محترمين مكنش بقلة الادب والعافية وحضرتك متكنش لوحدك وبتلهم فى المحل ولا حد يشترى منهم وهيخاف على سمعتة وبعد كدة حضرتك أشترى من مكان يكون كبير وموثوق فية ولا نسترخص علشان فرق 20 ولا 30 جنية المهم المكان المحترم

والله يا باشا انا ما استرخصتش دول سعرهم زي غيرهم انا قلت محل كبير ومحترم لكن تقول اية!!

المشاركة الأصلية كتبت بواسطة omarhelalyehia

مهم الفاتورة ....البطارية نوعها ايه .....انا عندى فارتا كويسة .....خد حقك منه فلوس و ما تاخدش من عنده حاجة

فلوس اية يا باشا بس هو يرضى يبدلها وانا احمد ربنا

المشاركة الأصلية كتبت بواسطة mohamed_selim

ده للسيينا يا باشا؟
بص حصل معايا حاجه شبه كده ... البطاريه بتفضى و لما تشحنها تشتغل كويس و تفضى و شحن الدينامو سليم ... بس طلع مكان اللحامات فى ضفيرة الدينامو اللى بتدى للبطاريه (لحامات الشيكارتون) مع السخونه بتدى مقاومه عاليه و الشحن مبيوصلش للبطاريه ....
خلى كهربائى نضيف يمشى ورا الضفيره دى و ينضف اللحامات القديمه و يأكد على كل الوصلات و جرب تانى بالبطاريه المشحونه

والله يا باشا انا هعمل اللي بتقول علية دة ونشوف

المشاركة الأصلية كتبت بواسطة akmm

نوع البطاريه ايه

ايه سي ديلكو يا باشا

**peposupervisor** · 03-10-2012 12:06 PM

هيبدلهالك بس اتاكد الاول انها متصلحش متقلقش من موضوع البدل
انا عندي نفس العيب ده في بطريتي الجافة ومشية معايا كويس الا لو نسيت لمبة او كاسيت شغال وان مش مدور العربية تبص تلقيها فضيت