السلام عليكم يارجاله
عايز استفسر منكم عن المتوسيكل 1000 honda varadero
عايز اعرف سعره فى حدود كام وهل المكنه حلوه ولا ايه ظروفها واهم حاجه قطع غيرها متوفره ولا لا لان فى مكنه معروضه عليا وعايز رايكم فى اسرع وقت واكون شاكر جدااا لحضراتكم
وياريت استاذ دياب يجاوبنى هو واستاذ تامر
ألفراديرو من أجمل الموتوسيكلات أللي ركبتها و ده بعد حوالي أكتر من 30 موتوسيكل و أكتر من 28 سنة خبرة في هذا المجال
من أهم مميزاته أنه عالي العزم جدا جدا و تسارع جبار و علي أر بي أم منخفض يعني موتور عمره طويل و مع الصيانة الجيدة في ناس بره مصر عملت بيه فوق ال200 ألف كيلو من غير أصلاحات كبيرة و عموما هو موتوسيكل قليل المشاكل و بتاع مسافات طويلة و سفر حول العالم لو أردت و من غير صيانات كتير و تنك البنزين ضخم 25 لتر لقطع مسافة طويلة قبل ما تحتاج بنزين
برده من مميزاته أنه عالي عن الأرض و بالرغم من ذلك الثبات ممتاز
الموديل ده بدأ أنتاجه من سنة 1998 و حتي يومنا هذا
الجيل الأول من سنة 1998 و حتي 2002
الجيل الثاني من سنة 2003 و حتي 2007 و ده كان أنجكشن و تغيير بسيط في الشكل الأمامي و من 2004 بدأ الأبي أس ينزل
الجيل الثالث من 2008 و حتي أخر الأنتاج الذي سيتوقف هذا الشهر (أكتوبر 2012 ) و ده تم تغيير في شكل العداد و بعض التغييرات الطفيفة الأخري
و عموما الفرق الجوهري كان في الجيل الثاني حيث أنه كان أنجكشن
ندخل بقي علي العيوب
الحجم الضخم بيكون صعب في التعامل مع شوارعنا و الأشارات و الزحمة و طبعا الوزن ثقيل جدا
الأرتفاع عن الأرض مشكلة لو أن طولك أقل من 185 سم و لازم تكون رجليك قوية عموما أنا طولي 175 سم بس أتعودت عليه و الدنيا ماشية زي الفل ما عدا في الزحمة بيكون غير مريح بالمرة أنما في الطوالي مالهوش حل و مريح جدا
أستهلاك البنزين في الجيل الأول يعتبر عالي شوية بس مش مشكلة كبيرة يعني في المتوسط العام بس يفرق حوالي 25% عن الجيل الثاني
بالنسبة للأسعار أعتقد أن الجيل الأول بيكون من حوالي 36 ألف و أنت طالع و ممكن يوصل لغاية 45 ألف لو حالة مميزة و به كماليات كتير (خد بالك الكماليات مش رخيصة أبدا) ده أنا شاري أنجين جارد ماركة جيفي ( GIVI ) سعره بعد الشحن و الجمرك تجاوز 2500 جنيه
أما الجيل الثاني أعتقد أن سعره من أول 55 ألف و أنت طالع و برضه علي حسب الحالة
قطع الغيار مش مشكلة لأن معظم حاجة الهوندا بتركب علي بعض و أللي مش موجود بنجيبه من بره بسهولة تامة بس السعر من بره غالي شوية
نصيحة أخيرة :
ده موتوسيكل تورينج ( Adventure Bike ) و ليس تريلا يعني ممتاز في الشوارع الممهدة و ممكن قليل من المدقات و لكن غير مناسب نهائي للأوف رود علشان ثقيل جدا و مركز الثقل عالي يعني حايغرز في الرملة زي الطوبة
يارب أكون أفدتك
والله انا شاكر جدااااا لحضرتك على المعلومات المفيده جدا وبجد افدتنى ولو ممكن طلب
بس اخد رقم تليفون حضرتك استفسر منك على شويه حاجات بما ان حضرتك معاك نفس المتوسيكل دا
منتظر حضرتك
:first::lurk5:اقتباس:
المشاركة الأصلية كتبت بواسطة gsxr600
عندك رسالة