الموضوع: شارع البلاجات بالاسماعليه

المشاركة الأصلية كتبت بواسطة Ramy_Tantawi

السلام عليكم .

هو انا مش من اسماعيليه لكن باروحها كتير الأول الطريق والمسافه.
طريق مصر اسماعيليه بيدأ من مدينة نصر جنب المطار الطريق كويس جدا جداً الحمد لله والمسافه حوالي 120 كيلو الطريق كله سرعته معقوله ما عادا اوله بس متعب شويه الجزء اللي عند سندباد لغاية موقف السلام بيكون زحمه شويه بعد كده الطريق بيكون كويس جداً ان شاء الله مروراً بمدينة العبور ثم العاشر ثم مدخل فايد ثم الاسماعيليه.

الخروج داخل اسماعيليه 90 % منه داخل طريق البلاجات اللي حضرتك قلت عليه يا استاذ وليد وبالنسبه للأماكن طالما مش عاوز تبات اكتر من يوم فا كورنيش اسماعيليه هو افضل الاختيارات حالياً وده يا سيدي هتلاقيه على شمالك اول ما تدخل طريق البلاجات ده وتمشي شويه هتلاقي بوابه كبيره وقدامها اماكن للركن بتركن وتدخل من البوابه دي لغاية البحر جوه وتقضي اليوم ان شاء الله على خير .

بالنسبه للأكل طريق البلاجات مقسوم حاجتين الشمال كله على البحر وده يا قرى سياحيه يا الكورنيش والجزء التاني على اليمين ده كله مطاعم سمك . عموماً لقرب المسافه زي ما حضرتك طلبت ارشح لحضرتك مطعم في وش الكورنيش على طول اسمه فيش لادند مطعم محترم وفيه كل حاجه وان شاء الله تستمعوا بالوقت هناك واي استفسار آخر انا تحت أمرك .

رداً على استاذه Noha-M الطريق زي ما قلت حوالي 120 كيلو انا عموماً باخده في ساعه ونص لساعتين ماعرفش ليه مع اني متأكد انه 120 فقط يعني يتاخد في اقل من كده لكن مش باحب اجري اسماعيليه على فكره من الرحلات الاستجماميه في المقام الاول وفعلاً لو ربنا كرمكم وزرتوها على خير ان شاء الله هاتعرفوا قد ايه هي مدينه هاديه جداً وخلوا بالكوا من المرور هناك غريب وعندهم اشارات حمرا وخضرا تخيلوا !!!!!!!.

تحياتي,,,,

طيب ياباشا مشكرين علي النصيحه بس اهم نقطه هوه دخول الكورنيش ده ايه ظروفه يعني في تذاكر ولا القاعده بالمشاريب ولا ايه النظام ولا أخش و اعمل هندي و مش من هنا