تجربتى فى شراء اللانسر 2008

**ibrnassar** · 06-07-2008 09:18 AM

السلام عليكم
بفضل الله استلمت عربيتى اللانسر 2008 الشكل القديم و حبيت اشاركم تجربتى فى شراء العربية دى لعل حد يستفيد منها

اولا: انا و زميلى قررنا نشترى مع بعض عربيتين فى حدود سعر 100000 و ابتدينا اللف و البحث و زرنا معرض اوتوماك و لفينا على معارض كتير و استشرنا ناس كتير جدا و فى الأخر استقرينا ان الانسر هى احسن اختيار فى حدود السعر دا
و تقريبا مفيش منافس قوى قدامها من عدة نواحى مثل اعادة البيع و الاعتمادية و توافر قطع الغيار و باسعار مناسبة

ثانيا: اخدنا قرار شراء الانسر الشكل القديم و لاقينا تنوع رهيب فى مواصفات اللانسر من خليجى لمصرى و كمان السبورت و الهاف سبورت و الكلاسيك بصراحة كانت حيره خصوصا ان طبعا كل معرض بينزل العربية بمواصفات مختلفه و يقولك عليها هى دى الأصلى فكان الحل ان احنا نسأل اهل الخبره و بصراحة المنتدى ساعدنا كتير بأراء الناس و تعاونهم و خبراتهم وكان الفضل الكبير طبعا لله ثم المهندس / طارق اللى فعلا قدملنا النصيحه باخلاص و بحياديه

ثالثا: استقرينا ان اضمن مكان نشترى منه هو اللى يدينا ضمان عشان انا كنت عايز السبورت و زميلى عايز مواصفات خليجى و كلن الرواس هو اللى بيدى ضمان على اللانسر الخليجى و فعلا استخرنا الله و اشترينا من الرواس اللانسر 1600 مانوال خليجى و الانسر السبورت مواصفات مصرية

يعنى احنا استلمنا العربية من يومين و هى بفضل الله ممتازة و حاسين ان ربنا وفقنا فى الاختيار
و ان شاء الله بعد ما نمشى بيها فتره هنعرض تجربتنا مع استخدامها

و اخيرا لنا سؤال لأهل الخبره عايزين نركب جهاز انذار بس احنا خايفين نركبه عند اى حد عشان ميلعبش فى الكهربه بتاعت العربيه و كمان عشان الضمان

تنصحونى بايه؟هل التوكيل بيركب انذار ولا هاركبو برة و هل الضمان هيروح لو ركبتو بره و سعرو كام فى التوكيل و برة بصراحة انا خايف حد يلعبلى فى العربية

و نكرر شكرنا للمهندس طارق و جميع اعضاء المنتدى

**elpasha009** · 06-07-2008 09:43 AM

ألف مبروك طبعا وإن شاء الله ربنا يكفيك شرها.
بالنسبة للإنذار فالتوكيل مش بيركب الحاجات ده بس بيقولك ركبها عند حد مضمون علشان الضمان.وكان المهندس طارق قال قبل كده إن أحسن 2 هما أدريان وسبير كار.وبما إني ركبت عند سبير كار فبصراحة شغلهم ممتاز جداااااااااااااااااا وبجد مش هتحس إن فيه حاجة ركبت أصلا:)

**مصراوي جدا** · 06-07-2008 09:48 AM

باشمهندس ابراهيم الف مبروك العربيتين ربنا يديكم خيرها ويكفيكم شرها

وشكرا على كلماتك الجميلة انا معملتش غير الواجب

بخصوص الانذار فاحنا مش بنركب انذار في التوكيل انما بننصح بتركيبه في مراكز متخصصة مش عند كهربائي عادي يكون مش فاهم في العربيات الحديثة لأن فيها وحدات كمبيوتر ممكن تتأثر أو تتلف لو حصل شورت (قفلة) نتيجة كهربائي مش فاهم شغله.

وتركيب الانذار لا يخرج من الضمان والتوكيل بينصح بالتعامل مع مراكز أدريان لأننا اتعاملنا معاهم قبل كده وشغلهم كويس لكن طبعا فيه مراكز تانية كتير كويسة بس المهم تكون متخصصة

وممكن حضرتك تعمل بحث في المنتدى على اسم (جهاز انذار) هتلاقي 140 موضوع اكيد فيهم الخلاصة

**salehgharib** · 07-07-2008 10:37 AM

http://wikimapia.org/#lat=30.1128165...18&l=0&m=a&v=2

**ewermido** · 08-07-2008 03:24 PM

مبروك عليكم العربيتين بس لو كان ممكن تكتبلنا اسعارهم علشان نعرف الاسعار الحاليه كام وعربيه حضرتك الاسبورت اوتوماتيك؟؟ ياريت تكتبلنا الاسعار

**Hassan Khalil** · 08-07-2008 03:59 PM

الف الف مبروك ...
ربنا يباركلكم في عربياتكم ..و يحفظهالكم من كل سوء .. و تستعملوها في الخير دائما
حضرتك اخدت من الرواس بتاع شارع رمسيس و اللا هدي شعراوي ..
و هل ادالك كتيب الضمان للعربية الخليجي ؟؟