انا مع القرار واؤيده و كان مفروض يحصل من زمان
انا مع القرار واؤيده و كان مفروض يحصل من زمان
لا مع ولا ضد لأن بأختصار شديد جدا جدا
القرار مش هيتنفذ اطلاقا
لسبب واحد بس
ان مفيش لاشخصيه للحكومه ولا الرئيس والدليل لسه طازه واسأل النائب العام
أنا مع القرار
بس شايف فعلا انه قرار زى القرارات اللى بتطلع كل يوم وتترمى فى الدرج
ومفيش تنفيذ
وكده كده الشتاء داخل والمحلات بتقفل بدرى
المهم يعرفوا يطبقوه فى الصيف القادم
انا معاه لكن مع تعديل بسيط
و هو ان القرار يكون في ايام الاسبوع بس
و عدم تفعيله في عطله نهايه الاسبوع و العطل الرسميه و المناسبات
مش ناقصه نكد هي
طب سؤال دلوقتى لمه المحلات تقفل بدرى ومنها طبعا القهاوى علما بأنى مش بقعد على قهاوى خاااالص غير فى الظروف الشباب اللى بتبقى على القهوه هتروح فين ياترى هيقفو فى الشارع ولا ايه النظام ؟
وهوا من امتي اي قرار او اي قانون بينفذ في البلد دي؟!!!!
كل واحد بيعمل اللي علي هواه
وياريت هواه ده كان علي الصح
الا دايما لازم يكون غلط
طيب يقفل حاجه تانيه غير المحلات الفساد للركب
http://www.nileup.com/uploads/13502144601.jpg
انا مع القرار وهو متنفذ فى معظم دول اوروبا بس مش مع التوقيت بتاعه انه يتعمل حاليا لأنه هيسبب مشاكل دلوقتى اكتر من فايدته
أتفق مع القرار و اوافق عليه بشدة.......و لكن
هذا القرار يتطلب بجوارة اشياء اخرى....و هي على سبيل المثال انتظام حركة المرور و سيولته
لأن الناس بترجع من شغلها في حدود الساعة الخامسة و بعد الراحة و الطعام و خلافة سينزل عدد كبير في وقت واح للشراء قبل غلق المحلات و هو ما سيزيد من اختناق المرور
هناك أمر ثاني و هو طبيعة المستهلك المصري الذي لم يعتاد على النوم مبكرا و التسوق مبكرا
مع القرار
لما المحلات تقفل الساعة 10 الحركة فى الشارع هتبقى هادية من بدرى وبالتالى الحرمية هتنتشر
طب و بالنسبة للناس اللي بتخلص شغلها متأخر و بتتحشر كام ساعة في الطريق عشان توصل بيتها, وللا الناس اللي بتشتغل أكتر من شغلانة عشان تكفي قوتها .. هل دول هيعملولهم خدمة المحلات دليفري للبيت وللا ايه ؟!
حتى القوانين بقيت مجرد عايزين نقلد عمياني و خلاص من غير ما نشوف طبيعة الحياة في مجتمعنا عاملة أزاي و هل النظام ده ينفع يتطبق علينا وللا لأ..
ماشي القرار ده حلو و ياريته ينفع يتطبق هنا زي أوروبا.. بس هل أحنا هنا الواحد بيبدأ يومه الساعة 6 الصبح؟! و هل تقدر تشتغل شغلانة واحدة بس تعيش منها ؟! و هل فعلاً بعد ما تخلص الـ8 ساعات بتوعك تقدر تروح ؟! وهل بعد ما تخلص شغل تقدر توصل لبيتك أو لأي حتة أنت عايزها في زمن معقول ؟!.... أشــك!!..
وفروا الأول البيئة اللي ينفع يتطبق فيها القرار بعد كده ألفوا زي ما أنتوا عايزين!!..
مع الفكره لانها تؤدى إلى ترشيد الاستهلاك و ايه الداعى ان المستهلك المصرى ينزل يشترى فى نص الليل ملابس و لا اكل ؟ ممكن يبقى فى استثناء لبعض الصيدليات أنها تعمل ٢٤. ساعه و طبعا المستشفيات أما غير ذلك يقفل عادى و فى الدول المتقدمة المحلات بتقفل الساعه ٦ او اخرهم الساعه ٨ و الناس بتتسوق و بتقسم وقتها صح بدل ما كل حاجه سايحه على بعضها عندنا كده
انا مع القرار و أأؤيده بشدة لأن منها هيقل الازدحام بليل و منها توفير الكهربا نلاقي محل كله متر في متر و نص و حاطط اضاءة مول بحاله
و لكن مع تعديل بسيط
ان الصيدليات و محلات الكاوتش تكون 24 ساعة نظرا لأهميتها طبعا بجانب البنزينات احسن حد يقول بتتقفل .
و السوبر ماركت الساعة 12 اما باقي المحلات كبيرها 10 و تكون قافلة و ممكن يوم الخميس و الجمعة فقط يوصل جميع المحلات التجارية للساعة 12 .
اما بخصوص الفتح
-المحلات التجارية متفتحش قبل الساعة 10 صباحا .
- المصالح و الشركات ع الساعة 9 صباحا.
- المدارس زي ما هي 8 صباحا.
لسبب بسيط لو المحل بيفتح 7-8 صباحا و كذلك المصالح و الشركات و المدارس بينزلوا في نفس الوقت و الموظفيين في نفس الوقت كل ده اللي بيعمل تكدس رهيب لما تلاقي مصر كلها نازلة في نفس الوقت.
لكن لما نخلي فرق ساعة او ساعتين بين كل مجموعة هيبقي فيه نظام شوية يعني اللي بيفتح 8 هينزل 7 و يكون واصل 8 و اللي بيفتح 9 هينزل 8 و اللي بيفتح 10 هينزل 9.
و بكده بدل ما كله في نفس الوقت و الدنيا بتتقفل لأ يبقي المجموعة ديه توصل ديه تنزل ديه توصل ديه تنزل.
و كذلك بالنسبة لأخر اليوم للجميع او الغلق يعني
-المدارس كبيرهم الساعة 1-2 ظهرا سواء حكومة او خاص يعني 6-7 ساعات كويس جدااا ويا ريت لو اقل لأن كتر الساعات بيخلي الطالب اخر اليوم دماغه زي البيض الفاسد يعني لو بقت 5-6 ساعات مفيدين هيكون عنده باقي اليوم يمارس انشطته و يذاكر و يبقي دماغه متفتحة مش نص اليوم نايم من تعب المدرسة.
-المصالح و الشركات االساعة 4 عصرا يعني طبقا لقانون العمل 7 ساعات عمل.
-المحلات التجارية ماعدا ( الصيدليات - محلات الكاوتش ) الساعة 10 مساءا و السوبر ماركت 12 صباحا.
و بكده ان شاء الله نحقق الآتي :
-سيولة في المرور و طبعا لو فيه سيولة في المرور يبقي توفير في البنزين و بالتالي الاستهلاك هيقل و الضغط ع التموين من المحطات يقل و بكده ميبقاش فيها أزمة في البنزين و الدعم يبقي اقل لو فيه دعم.
-ولي الأمر اللي بيوصل اولاده المدرسة يقدر يوصلهم و يروح شغله بدون استعجال و الطريق يكون كويس.
- و لما الشخص يوصل شغله مرتاح يقدر يشتغل و هو مرتاح ميبقاش رايح تعبان و قرفان و مش طايق نفسه بسبب الطريق من الاخر كده رايح فريش.
-و طبعا توفير استهلاك الكهربا بليل عند الغلق بدري.
ده جزء من اللي بفكر من زمان فيه و نفسي يطبق هنا في مصر من الأخر اعادة تنظيم الوقت اهم حاجة الرقابة بجد لمتابعة تنفيذ الجميع للقرار
ده أنا فرحان من القرار ده علشان القهاوى بالذات
بيحطوا الكراسى على الارصفة وفى الشوارع بالكامل من الجهتين علشان محدش يركن قدامه حتى الزبائن بتوعهم !!!!
عربيات الزبائن الشباب بتقفل بقية الشارع
ده غير التهريج والصوت العالى والإزعاج اللى بيحصل
ده غير الدخان اللى طالع بسبب السجائر والشيشة وماخفى كان اعظم
الله يكون فى عون الناس اللى ساكنه بجوار قهوة
قرار فاشي مصر دخلت عصر الانفتاح من ايام السادات يمكن حد يكون سمع
طب والناس اللي بتخلص شغل 10 و 11 و 12 مساء وشغلهم فوق ال 12 ساعه يشتروه حاجتهم امتى (قولولي نحدد اماكن متقفلش عشان الناس دي تشتري احتيجاتها دول هايبقوا على اي اساس)
بعد كدا ايه يقفلو لكم المحلات بدري وبيتك بيتك وينيموكو بدري وياسلام لو في شوب شاي بلبن عشان اللبن غالي
ايه التخريف دا هم مش عارفين يلموا السوق السودا اللي شغاله في السلع الغذائيه والتموينه والبنزين والسولار و الاستيراد الفاشل والتهريب الناجح
وجايين عالاناس اللي بتاكل عيش قال كدا بيوفروا كهربا وبنزين
(وحجتهم القهوة والنايت ) طب مايقفلوا الفنادق ال 5 و ال 7 ستارز من المسخره والدعاره اولى
السلام عليكم ورحمة الله وبركاته
هو مش فى عداد يعنى فلوس
الغلق بدرى = فترة واحده يعنى نص العمالة
السؤال
ليه توفير استلاك الكهرباء؟؟؟؟؟
بما ان فى استهلاك + عداد + فلوس
إذاً أذود محطات.
على فكرة عندنا فى دهب محطة كهرباء للأردن....ها ها ها هــــــــــــا
يعنى فى فائض
أنا مع القرار
والناس هتكيف نفسها لشراء احتياجاتها فى مواعيد متأخرة
ورزق المحلات هيجيلهم برضه بس مع تغيير ساعات ذروة الشراء.
بس اللى أنا خايف منه ، واللى ممكن يخل بالمعادلة دى
هى ان القرار ده ممكن يساهم فى رخاء امبراطورية الباعة الجائلين وفرش الأرصفة ودول التحكم فيهم صعب ، بكده فعلاً المحلات الملتزمة بالقرار هتضار فى أكل عيشها.
ع فكرة انا مش قصدي ع التوفير العام فقط لكن بسبب النتائج المترتبة لأن لو جمعنا كل دهبيحصل ضغط جامد مش حكاية فائض او مش فائض لكن ده ضغط بيأثر ع البنية الاساسية للكهربا اللي محتاجة تعديل عشان تستحمل و للأسف حتي لو اتعدلت غباء الكثير هيقصف عمرها زي مقولت محل متر في متر و نص تلاقيه عامل فرح باللمبات و اليفط طب ليه ؟؟؟ و خد عندك الافات و ملايين بالفكر ده و غير كده تلاقيه فاتح مثلا 20 ساعة من 24 ساعة او ع مدار اليوم كل اللمبات شغالة حتي بالنهار اه حتي بالنهار ده غير الاجهزة يبقي مفيش راحة و الضغط مبيخفش و بالتالي ده بيستهلكها اكتر و زي مقولت من غير حاجة هي محتاجة تتعدل
اما موضوع العمالة العمالة مالها مهو فاتح طول اليوم يعني ساعتين -3 ساعات هيقفلهم بدري هم اللي هيخلوها نص عمالة :)
و خلي بالك انا برده هتقرف بسبب الموضوع ده عشان الشراء و اخر اليوم هيبقي قدامي حوالي 3 ساعات عشان انزل اشتري حاجة يعني انا مش مرتاح طول اليوم باشا ههههههههه
الصبح شغل ثم الماجستير بعد العصر و كورسات :)
القرار صائب ومفيش دولة محترمة في العالم بتسيب المحلات تفتح للصبح
لكن المشكلة هل ح يقدرو يطبقو الكلام ده في ظروف البلطجة اللي احنا فيها دي
لو قدرو يبقي .... شابوووووووو
لو ما قدروش يبقى إخص على كدة
أنا ضد القرار تماما ...
أولا : انتهاك للحريات دون إقراره من مجلس الشعب .. واي قرار ينتقص من الحريات المقررة بالفعل يجب أن يكون قانونا من مجلس الشعب وليس قرارا من بعض الوزراء ولو كان مجلس الوزراء بأكمله
ثانيا : مش عارف أنتوا جبتوا منين إن معظم دول العالم بيتم تطبيق مثل هذا القرار فيها .. ولكن العكس هو الصحيح الدول التي يتم تكبيق مثل هذا القرار فيها هي استثناء على بقية دول العالم ... ده لو اساسا ينفع نقارن ظروف أي دولة في العالم بظروف مصر ....
ثالثا : نحن دولة شديدة الحرارة صيفا ومشمسة معظم أيام الشتاء ... وحتى لو الناس ماعندهاش شغل وأجازة مش هاتنزل تشتري حاجة بالنهار .. ولكن يكون الشراء دائما في جو الليل الرطب بعد حرارة النهار الشديدة أو غروب الشمس
رابعا : بعض دول أوروبا .. أساسا اللى مش بيشوفوا فيها الشمس حتى في الصيف ... مش محتجاين أصلا قرار زي ده لإنهم بيقعدوا في بيوتهم بدري جنب الدفايات غصب عنهم من التلج اللى بيكونوا فيه بالليل .. عشان كدة قرار زي ده مش هايخدوا بالهم منه أساسا ... لأن كل حياتهم بالنهار مش زي المصريين
خامسا : وده الأهم ... ظروف الشعب المكربس فوق بعضه مش عارف ياخد نفسه من الزحمة مش هاتخلي أصلا القرار يمكن تنفيذه ... حتى لو كان صدر بالفعل ... ممكن يكون إشاعة ويطلع الإعلام يكدب الخبر كمان كام يوم ده العادي دلوقتي ... هايعملوا إيه يعني ... هايمشوا نص الشعب يراقب على عدد وكمية المحلات والقهاوي المهولة اللى موجودة عشان يعرفوا فاتحة ولا لأ
سادسا : الفنادق والمراكب والقرى والكازينوهات السياحية اللى اساسا بتسحب باور وكهرباء يمكن أكتر من كل قهاوي ومحلات مصر مجتمعة هو استثناها كلها من القرار كما قرأت ... إشمعنى على راس السياح والبعض من المصريين ريشة عن بقية المصريين ... ده غير الفجور اللى بيرتكب بداخلها سواء من السياح أو من البعض من المصريين
سابعا : محلات كبيرة جدا زي أولاد رجب مثلا وده مشهور بإنه شغال أربعة وعشرين ساعة .. وزي كارفور اللى اساسا ولا بيفضى بالليل ولا بالنهار وعلى طول مكدس بالناس .. .. آجي اقوله إنت هاتقفل بدري أربع ساعات كاملة طبعا سلطة أصحابة وأموالهم اللانهائية هاتتحرك عشان يستثنى من القرار هو كمان زي المنشئات السياحية ... وطبعا هيستجاب ليه ماهو مش معقولة هايخسر ملايين عشان خاطر قرار خاطئ ... ونرجع لشغل الوسايط والرشاوي ... وهايقبلوا وهايعملوله اللى هوة عايزه ... لإنه هايدفع ملايين برضه ...
إذا أردت أن تطاع فأمر بما يستطاع
وما ينفعش عشان أنا بكره القهاوي وتسببها بسد الشوارع والدخان اللى بيطلع منها والدوشة ... إني أكون مؤيد للقرار ... ولكن يجب تنظيم عمل القهاوي نفسها وتحديد مساحتها بأنها لاتجور على الطريق ... وهو أصلا شيء منظم بالقانون وفي كل دول العالم لها تنظيم ولكن لا يتم تطبيقه في مصر .. والتلوث الضوضائي الصادر منهم مجرم بالقانون أصلا ويجب على من يجاور أية قهوة يصدر منها تلوث ضوضائي الإبلاغ عنها .. يبقى أنا المفروض أن أقوم بتفعيل هذه القوانين بدل ما أنا سايبها بدون تطبيق ولو حد اتصل بكبرله ... وزي ما هاسيب القرار ده برضه ولا هيطبق
وبعدين ما هو كل المحلات وأصحاب البيوت والعمارات والجراجات بيسدوا الشارع وبيحجزوه لنفسهم بقصاري الزرع والطوب واللى عايز يركن يخبط راسه في الحيط ... أقوم أطلع قرار أقفل الجراجات والمحلات وأهد البيوت ... ولا أجبر الناس على إحترام الطريق وعدم الإعتداء عليه .. وأستجيب للمواطن لما يبلغ بحاجة زي كدة
وبعدين هايعمل إيه في المناطق العشوائية اللى مصر كلها بقت عبارة عن منطقة عشوائية كبيرة
هذا القرار لن يكون إلا سبوبة للقائمين على مراقبة غلق المحلات والقهاوي للحصول على نصيبهم من أرباح تلك المحلات نظير تركهم وشأنهم كحال المصريين منذ أبد الدهر
إذا أردت أن تطاع فأمر بما يستطاع
وعلى الحكومة الإسراع في تشغيل البطالة الرهيبة ... والتي استفادت منها الصين في جعلها قوة عظمى في العالم ... في مشاريع قومية تدر على الدولة ناتجا قويا يمكنها من إنشاء متطلبات الدولة من محطات كهرباء ومياه وتتخد ما يعن لها من إجراءات تجاة الإسراع بذلك مثل إنشاء محطات بسواعد شبابنا قائمة على ابار الغاز الطبيعي الذي نصدره بأبخس الأثمان ... وليس تقييد الحريات دون أن نرى من ذلك فائدة
هذه حججي ... فما هي حجج مؤيديه ... دون حجة نقص الكهرباء وتقليد بعض الدول القليلة الأجنبية
شوف انا مع القرار واى قرار مهما كان له سلبيات وايجابيات ولكن كل ما كانت الايجابيات اكتر ثقلت الكفه للمصلحه العامه ومفيش حد يقدر يرضى كل الناس بنسبة 100%
انتو تعرفو ان القانون فى فرنسا وفى الريفيرا الفرنسيه على وجهه الخصوص والى هيا من المناطق السياحيه الاكتر ازدهارا المطاعم العامه لاتعمل بها فى الفتره من 2 ظهرا الى 6 مساء تقريبا !!!!!!! انا معرفش السبب ليه بس هما اتعودو جدا على العاده الغريبه دى
اما بخصوص نقطة السرقه فحلها زيادة الدوريات الراكبه تحياتى
معاه قلبا و قالبا و الله. انا كنت في اجازه في رمضان اللي فات و بصراحه الموضوع بقي سخيف اوي. المحلات فاتحه لحد الساعه واحده و اتنين بالليل و تنزل الصبح تشتري اي حاجه متلاقيش محل فاتح و كله بيفتح بعد صلاه الضهر. المحلات هنا في سويسرا بتقفل الساعه سته مساءا صيف شتا و لو عاوز تشتري حاجه ضروري ممكن من اي محطه بنزين بيبقي فيها سوبر ماركت صغير.
الفكره مش بس راحه السكان اللي حوالين المحلات انما كمان عشان العمال اللي بيشتغلوا في المحلات دي يعرفوا يعيشوا زي البني ادمين.
أنا مع القرار وأؤيده و كان مفروض يحصل من زمان لكن المهم التنفيذ
واضح ان معظم الاخوة الاعضاء المشاركين موافقين علي القرار
وفعلا هو قرار سليم
ربنا يسهل والحكومه تنفذه حيكون خطوة علي الطريق الصحيح
تحياتي
مش موافق
قرار زى ما بيقولوا بتاع واحد حافظ مش فاهم
و ظروف البلد دلوقتى مستمحش بالكلام ده خالص ، و محدش يقولى هيزودوا الدوريات و البلد هتبقى امان .. لو عارفين او عايزين كانوا خلوها امان فى الوضع الحالى .. ده الواحد بيبقى ماشى فى شارع كله محلات و نور و خايف ان عيل صغير يطلع عليه بسلاح و لا حاجة ما بالك بقى لما الدنيا تبقى هادية و مفيش محل فاتح
انا عن نفسى بخلص جامعة الساعة 7 بروح البيت الساعة 8 مع انى ساكن جمب الجامعة .. الجامعة فى الجيزة و انا ساكن فى الهرم .. يعنى انا لو عايز اشترى حاجة اشتريها امتى ان شاء الله ؟
انا مع قلبا وقالباً...
تحياتي
Sent from my LT18i using Forum Runner