ايه نظام الكراسي الجلد في الحر؟

**Ahmed_Adham** · 14-10-2012 05:09 PM

أنا عارف ان الحر خلص وممكن تكونو نسيتو تأقيره بس هل الكراسي الجلد بتبقى سخنه لو العربيه مركون فى الشمس والواحد لما يركب يتلسع ولا ايه النظام؟ واللسعه دي بتبقى أول ما الواحد يركب بس ولا بتفضل شويه الواحد ميبقاش طايق يلمس الكرسي؟

وهل فيه جلد بيبقى معزول حراري؟

**Land_Cruiser** · 14-10-2012 05:18 PM

بتبقى ساخنة أكيد بس خللى بالك هى مش حديد يعنى :) دقيقتين تلاته و بتبقى عاديه لما تفتح الشباك او لو شغلت التكييف و طبعا لون الجلد بيفرق لو كان بيج او اسود فالبيج ارحم أكيد و عامه الجلد عملى اكتر من القماش لانه ينفع يتنضف كل فتره أما القماش او القطيفه ما بينفعش فيه تنضيف

**Elawany13** · 14-10-2012 06:00 PM

أنا شايف ان الجلد مش عملى فى الصيف
القماش أو القطيفة ارحم بكتير

ميزة الجلد بيكون شكله اشيك
وسهولة التنظيف

**semi** · 14-10-2012 06:50 PM

الجلد كويس في الشكل طبعا والتنظيف مهم جدا
مشكلته انك لو سبت العربية في حتة والشمس ركزت على الجلد
لو جت تركب بتتلسع وممكن تتحرق كمان لو قعدت علطول ومش ببالغ انك ممكن تتحرق فعلا لو جلدك لمس الكرسي
بس طبعا لكل شئ حل هاتلك عازل للزجاج الامامي هيخفف كتير من الموضوع
وهتبقى مشكلتك الوحيدة لو نسيت تقفله :)

**beshomilan** · 15-10-2012 11:17 AM

انا عندى جلد وجايب فرش فرو للكرسى بتاعى بس
وكنت بعانى من موضوع السخونه ده بس بعد كده الحمدلله

**A_H_M_A_D** · 15-10-2012 11:51 AM

هي مشكلة السخونة دي موجوده فعلا , و حلها انك تركن في الضل او تحط شماسه على الازاز قبل ماتنزل

بس بجد ميزة ان الجلد بينضف بسهولة و مابيبانش فيه اثار التراب و البهدلة دي ميزة كبيرة جدا بالذات للي عنده اطفال بيطلعوا برجلهم على الكراسي و الكنبه , اكيد هايقدر الميزة دي جدا

**Ahmed_Adham** · 15-10-2012 02:26 PM

أنا عايز أركب جلد عشان بنتى بتدوس على الكراسي بس انتو كده هتخلوني أكسل يا جماعه ولا ايه. ماهو عشان أركب عازل اللنص اللي قدام بألف جنيه + حوالي 1500 جلد يبقى 2500 اجمالي طب ما كده أبقى انضف الفرش كل ست شهور ولا حاجه ب 120 جنيه وخلاص. ولا ايه؟

**mem** · 15-10-2012 03:14 PM

خليك فى جلد مع قماش او قطيفه
لحسن الجلد ده بيبقى مولع لما تكون العربية فى الشمس وبيعرق بسرعة
وانت نازل تلاقى ظهرك كله ميه
ميزته بس انه بينظف بسرعة وشكله شياكه

**M.Yahia** · 15-10-2012 03:31 PM

يا باشا ركب الجلد و توكل على الله حتى لما تبقى سايب العربية فى الشمس لما ترجعلها افتحها هويها دقيقتين و ادخل شغل التكيف علطول 5 دقائق و مش حتحس بحاجة دا بالعكس الجلد بيسقع و بيبقى تمام التمام .