أستفسار عن زيادة اداء الجين 2 بتغيير اعدادات الكمبيوتر

السلام عليكم :

و أنا بدور على النت .. لقيت القطعة دي بتتباع على موقع أمازون الشهير .

Proton Gen 2 1.6L Performance Chip EVO-TECH - Authentic Magnum : Amazon.com : Automotive

القطعة ثمنها 210 دولار
بيقولوا بقى أنها بتعمل الآتي :

Product Features

• 1. Improves engine horsepower by 15%

زيادة عدد الأحصنة بنسبة 15 % يعني حوالي 15 حصان زيادة على 110 !

• 2. Improves low-end and mid-range torque

تحسين العزم الخارج على سرعات قليلة و متوسطة

• 3. Peps up acceleration

تحسين التسارع و الأستجابة لدواسة البنزين

• 4. Fuel economy improvement by up to 6%

تحسين أستهلاك البنزين بنسبة 6 % و ده رقم حلو

• 5. Smoothes out throttle response

نعومة في الأستجابة لدواسة البنزين

أنا عايز بقى الناس محترفة التعديلات دي تقولنا الكلام ده صحيح و لا كلام في أي كلام ؟

الموضوع فيه جانب من الصح وجانب تاني زياده شوية أو لو حصل بيكون مش ملحوظ للمستخدم العادي.


هل هي فعلا بتعمل كده كل الإمكانيات دي ؟

آه بس لازم يكون ماركة قوية مش أي ماركة والسلام

الأجهزة دي بتعتبر أجهزة Fuel control بس على مبسط شوية وفكرتها هي تغيير مستمر في ال AFR أو نسبة الهوا والبنزين وده عن طريق Piggy backing ال ECU أو نقدر نقول بالعربي كده كأنك ركبت فايروس فوق ال ECU يغير من طريقة تفكيره (Good Virus ) وبمعنى آخر خداعه
ومن طرق الخداع إنك تحسسه إن العربية محتاجة بنزين أكتر عن طريق تغير درجة حرارة ال intake للاقل عن الواقع ومعروف إن كل ما درجة حرارة ال intake قلت زاد الأداء ودي فايدة الانتركولر في العربيات التربو بالمناسبة.

لو ماركة تعبانه ممكن الاداء يقل استهلاك البنزين يزيد ويحصل عكس المتوقع تماما ( Bad virus)

الأجهزة دي محتاجه تعديلات مسانده ليها أو supporting mods جنبها علشان تاخد اداء محسوس

اقلها فلتر هوا رياضي و بوجيهات رياضيه لانك هتزود بنزين فطبيعي إنك تزود جنبه الهوا والشراره اللي تحرقه .

والافضل من ده طبعا ال Fuel control اللي بجد زي ال Appexi Power FC أو ال Greddy e-manage والاخير ده قوي جدا واداه ممتاز وسعرهم بيتراوح بين 2500-3000 جنيه وبردو لازم تعديلات مسانده جنبهم

شاكرين على المداخلة المفيدة دي باشا .

تسلم أيدك

بس المفروض لما أخدع الأي سي يو أنه يضخ بنزين أكتر

معناه أني ممكن أخد حصان أعلى .
بس فين التوفير ؟؟؟؟؟؟؟؟؟؟؟؟؟

صباح الخير يا باشمهندس أحمد
أنا شايف أن فكرة التعديل دى جميلة جدا .. وإن كانت نظرياً إلى حد ما
الجهاز ده بيلعب على خداع كمبيوتر العربية بإعطاءه معلومات بأن الهواء الداخل لفلتر الهواء أبرد من الواقع ومن ثم فإن كثافته أعلى وبالتالى يزيد كمبيوترالسيارة من نسبة الوقود فى خليط الحريق مما يؤدى إلى إعطاء محرك السيارة قوة حصانية أكبر.
اللى فهمته بعد كده بأن الغرض منه مش بالأساس تخفيض استهلاك البنزين .. ولكن لما نعطى المحرك قوة اكبر بيؤدى - زى العربيات اللى أصلاً الهورس باور بتاعها عالى - إلى الوصول إلى سرعة معينة (ولنقل سرعة 100 كم/ساعة) فى زمن أقل نتيجة لزيادة قوة الموتور وبالتالى عدم استهلاك بنزين أكتر لأن استهلاك البنزين يتزايد طردياً مع الزمن.
ده اللى فهمته .. ولى بعض الملاحظات :
أنا شايف إن التعديل ده ممكن يلخبط كمبيوتر العربية بطريقة تدريجية بمعنى إن الإحساس ببرودة الهواء الداخل حيكون نسبى ولحظى.. فإن زادت درجة الحرارة الخارجية لن يتمكن هذا الجهاز من خداع الـ ECU إلى الحد المطلوب .. كما أن انخفاض البرودة الخارجية اصلاً كما يحدث أحياناً فى بعض أيام الشتاء سيتطلب تعديل آخر حتى تتناسب حرارة الهواء الداخل للموتور مع حرق البنزين ولا يدخل هواء بارد أكثر من اللازم
Though performance chips are not especially for economy improvement & basically supposed to gain more HP, the module does improve MPG in case of everyday driving manner. When modifying air fuel ratio, slightly at the expense of emission & noise level, efficiency of combustion is improved & you SAVE FUEL by up to 6%
وبعدين الطريقة دى معمولة قبل كده اصلاً سواء بتطويل فلتر الهواء وإبعاده عن حرارة الموتور أو تركيب جزء معدنى للفلتر يبرد الهواء أسرع أو تركيب Intercooler
والطريقة دى ممكن تنفع فى حالات السفر أو الطرق المفتوحة اكثر ولكن جوه مدينة زى القاهرة أعتقد أنها مش مجدية بالدرجة الكافية لكثرة التوقف والسير .. واللى على حد علمى ممكن تخلى العربية مكربنة نتيجة لزيادة ضخ البنزين وعدم احتراقه بالدرجة التى تتناسب مع حركة العربية أو سرعتها .. ده رأيى
ولك جزيل الشكر على مشاركتك

اقتباس:

---

المشاركة الأصلية كتبت بواسطة tutankhamoun

بس المفروض لما أخدع الأي سي يو أنه يضخ بنزين أكتر

معناه أني ممكن أخد حصان أعلى .
بس فين التوفير ؟؟؟؟؟؟؟؟؟؟؟؟؟

---

مبدئيا صعب يكون أداء وتوفر بنزين مع بعض

لكن الفكره من تعديل ال afr هو الحرق التام للبنزين وعدم وجود أي فواقد في البنزين متتحرقش

لأن لما ال ecu العادي بيحس بضغطة '' رياضيه '' على الدواسه بيرمي بنزين بزياده لحماية الموتور من الصفع أو الشراره على بنزين قليل علشان كده عاملين خَط الراجع
فايدة الأجهزة دي إنها بتحط البنزين اللازم للأداء الرياضي بدون زياده أو فواقد مبتتحرقش

والمحصله اداء رياضي مع استهلاك بنزين معقول

ولو في المشي العادي بدون اداء رياضي الأجهزة دي فعلا ممكن توفر بنزين ولو بنسبة ضئيله

لو سمحت يا بشنهندس علاء الدين معلومه خارجيه بس عايز افهمها بخصوص تحليل حضرتك

يعنى انا لو ركبت فلتر هواء رياضى فقط معنى كده انى الهواء الداخل بيكون حرارته ابرد من المعتاد
فيقوم كمبيوتر السياره بضخ بنزين اكتر يعنى كده استهلاك البنزين بيزيد عن الطبيعى مقابل احصل على طلعه اسرع واداء اسرع لحظيا

وشكرا وجزاك الله كل خير وجميع الاعضاء

انت مش حتاخد هور باور عالى جداً كما تتخيل ... هى نسبة وتناسب ..
المعروف علمياً أنه كلما قلت برودة الهواء زادت كثافته وبالتالى يحتاج الموتور لزيادة ضخ البنزين لمعادلة نسبة خليط البنزين والهواء داخل غرفة الحرق، والعكس فى حالة سخونة الجو.
وأى واحد بيركب فلتر رياضى أو يقوم بتعديل لزيادة قوة المحرك مش بيفكر فى استهلاك البنزين بقدر ما يهمه الأداء الأقوى - وكلما كان التعديل وتغيراته كانت نسبة الزيادة .. اللى بأى حال من الأحوال لن تزيد عن 10 - 15 حصان

ما العربيه اداءها ممتاز والمانيوال بتوصل 220 عاوز تزود الاداء ليه

اقتباس:

---

المشاركة الأصلية كتبت بواسطة bahaaeldin

انت مش حتاخد هور باور عالى جداً كما تتخيل ... هى نسبة وتناسب ..
المعروف علمياً أنه كلما قلت برودة الهواء زادت كثافته وبالتالى يحتاج الموتور لزيادة ضخ البنزين لمعادلة نسبة خليط البنزين والهواء داخل غرفة الحرق، والعكس فى حالة سخونة الجو.
وأى واحد بيركب فلتر رياضى أو يقوم بتعديل لزيادة قوة المحرك مش بيفكر فى استهلاك البنزين بقدر ما يهمه الأداء الأقوى - وكلما كان التعديل وتغيراته كانت نسبة الزيادة .. اللى بأى حال من الأحوال لن تزيد عن 10 - 15 حصان

---

انا كده فهمت حضرتك وشكرا يا بشمهندس على التوضيح

ما العربيه اداءها ممتاز والمانيوال بتوصل 220 عاوز تزود الاداء ليه

يا استازى الفاضل دى مجرد معلومه انا بفهمها كزياده معلومات من الاخوه الافاضل وانا طبعا مش هعمل كدا لانى لسه هستلم برسونا اليومين دول ومستحيل اقدر اعدل فيها

بس علي فكره انت لو مركب فلتر هوا بس مش بتكبس بيه يعني مش بيطلعله صوت (يتمشي بالراحه عادي) مش حيأثر في سحب البنزين لانك ماشي في معدل الهوا القليل اللي مش محتاج يزودله احتراق ببنزين وكده

اقتباس:

---

المشاركة الأصلية كتبت بواسطة lanos2004

ما العربيه اداءها ممتاز والمانيوال بتوصل 220 عاوز تزود الاداء ليه

---

لو السؤال متوجهلي أنا يا أستاذ لانوس .
فأنا أولا مليش في أي تعديلات ... ده يا راجل بمشي على 100 في السفر و من 70 إلى 90 على الدائري .

أنا قلت فيها تحسين الأستجابة و تعديل في العزم و توفير بنزين ...... قلنا نسأل .

تحياتي لحضرتك .

اقتباس:

---

المشاركة الأصلية كتبت بواسطة sa3d alex

انا كده فهمت حضرتك وشكرا يا بشمهندس على التوضيح

ما العربيه اداءها ممتاز والمانيوال بتوصل 220 عاوز تزود الاداء ليه

يا استازى الفاضل دى مجرد معلومه انا بفهمها كزياده معلومات من الاخوه الافاضل وانا طبعا مش هعمل كدا لانى لسه هستلم برسونا اليومين دول ومستحيل اقدر اعدل فيها

---

انا اسف والله اعذرنى انا كنت مفكر نفسى فى قسم الفيات متنبهتش الا حالا
فعلا من خرج من دايو اتقل مقدارة
انا راجع بيتتى يا عم

هو حضرتك تقصد piggy box ولا remap لل ECU ؟؟

لو حضرتك قصدك piggy box بلاش أحسن لأن معظمها من شركة مش كويسة و زي ما أستاذ EVO قال ,لازم شركة محترمة جدا و برده مش هتبقى زي ال remap

أنا ممكن أكلم حضرتك عن ال remap لو حابب لاني عامله :)

فيه ناس بتشوفه مش كويس ك value for money للمواتير ال N/A
يعني عشان بحوالي 1800 جنيه و هيطلعك حوالي 10-15 و حوالي 25-35 nm
بس أنا شايف إنه كويس لو قارنته مثلا بتمن exhaust اللي هيتعبك في عمايله و فك و تركيب
ده في نص ساعة بتخلص ,ممكن تزيد لو هتعمل dyno test و ارخص من ال exhaust
أو فلتر هوا اللي بيطلع 2-3 حصان و بيتباع بـ 400-600 تقريبا

بالنسبة لاستهلاك البنزين ,من الواقع مش هيفرق حاجة في المشي العادي تقريبا
بس لو بتحرق جامد و سرعات عاليَّه هيزود الاستهلاك بتاع 2 لتر لكل 100 كيلو

هتحس بيه فعلا في ال low-mid range ,حتى في طلعة العربية هتحسه
أنا عمله بقالي أكتر من 6 شهور و الحمد لله مفيش مشاكل

أنا مجربتش اقيس و اقارن بارقام قبل وبعد عشان محدش يسأل :)
بس بأمانه هتحس بالفرق و فرق واضح كمان في متعة السواقة

لو فيه اسئلة أنا معاكم :)

الموضوع دا هل له تأثير على عمر الموتور ؟

هل ليه تأثير ؟؟

أكيد طبعا ليه :) ,مفيش زيادة في ال power من غير ضرر
بس الفكرة بقى تأثيره جامد يعني ؟؟!! لأ

كل التأثير مثلا إنك ممكن تحتاج تغير حاجات بدري شوية
بوجيهات مثلا تيول بس التأثير مش أكتر من 5% من عمرها
لان أصلا الزيادة مش بشعة في القوة يعني, إنت مش متربن :)

و عموما أنا سائل ناس اعرفها قبل ما اعمله و متأكد من الكلام ده و فيه ناس منهم مغيرين exhaust كمان يعني المفروض التأثير يكون أكبر :)

اللي أكيد هيأثر أكتر شوية ,لو عمله في عربية turbo
عشان الزيادة بتبقى كبيرة شوية, حوالي ضعف زيادة ال N/A
فـ إنت كده بتحمل زيادة على الفرامل و كمان ال boost بتاع ال turbo بيعلى

أنا أول ماشوفت التوبيك، ولقيت توت-بيه هو اللى عامله؟!! مصدقتش!
قلت tutankhamoun هيبقى من الشوماكرز -زى ماهو بيقول عليهم- ولا أيه؟؟!!! :F_eyeb1[1]:

طبعا مفيش أفضل من Live/Custom-Remap زى ما بيقول ahmed-adel

تجارب الـPiggyback أو الـParallel ECU/Megasquirt فاشلة فـ مصر؟!!
(إلا فـ حالات نادرة: شركة أو Chip-Tuner محترم+عربية جديدة+بنزين high-octane).. كده ممكن!

شوف
فيه شركات مشهورة جدا، هى أصلا بتعدل ماركات معينة بالكامل.. زى Novitec و G-Tech أو ABT و Hamann
(أو حتى تيونر عالى زى eTuners و SKN-Tuning)
بينزلوا الـmaps بتاعتهم على Powerbox منفصل -زى اللى انت بتسأل عنه
يعنى نظريا: مفيش أحسن من كده؟!!

بس عشان هو تيونرمحترم.. ممكن تلاقى warning بيقولك:
Super-plus Gasoline is a MUST otherwise power/torque will decrease by 5%

وفيه اللى بيقولك صريحة كده: التيون ده 98 أو 100oct

حاجة كمان
حالة الموتور والعربية أيـــــه؟؟
دلوقتى نفترض ان بروتون بتنزل Performance Upgrade للجين2 (اللى هو الـR3 عندكم مثلا).. تمام
- الكيت هتبقى intake و exhaust و كنترول ecu.. (بصرف النظر عن تعديلات الهاندلينج والفرامل والثبات)
بيقولك: عشان يضمن الـinstallation ده.. ويطلعلك الـ135 حصان من موتور الـCamPro يبقى فقط لعربية عاملة بالكتير 12000 ميل أو 1 year؟؟!!! :embarrassed:
عشان كده كله بيقول ان Custom-Remap أفضل.. لأنه بياخد فـ الإعتبار حالة الموتور والجيربوكس الفعلية، وبالبنزين المتاح فـ مصر 92/95
وبيعمله live عـ الداينو.. يقدر يغير فـ الـmap والـtuning-files وهو شغال لحد ماتضبط.

@ tutankhamoun
على فكرة فيه Economy-remap لتوفير البنزين، مش بس performance!!
وفيه remaps بتشفت curve العزم لـlow-down فـ رينج الـrpm.. عشان الـcity-driving بس بتقلل التوب-سبيد

@ ahmed-adel
مين اللى متيونلك عربيتك يامان؟؟
1800 جنيه أفهم من كده سامح محمد؟!! :B4_282: ولا TPS عادل وجدى بالـEvolution-chips؟!!!
(ولو خالد غازى أو تامر ياريت تقولنا فرق الأداء فـ الطلعة والـovertaking)؟!!

Rgds،

عايز أقول حاجة
أنا مختلف معاكو فـ ان تعديل الـintake مكلف ومش هتستفيد منه!! :help2:
بالعكس بقى: دا أساسى لازم التيون يتعمل على intake متعدل!!
أو عـ الأقل oem replacement فلتر High-flow.. ودى recommended من كل اللى بيعدلوا!!
(لكن متفق ان تعديل الـexhaust مش أساسى؛ عـ الأقل لعربية N/A مش هتستفيد زى مواتير التربو مثلا)؟!!

وعشان مواتير البروتون كامبرو تحديدا.. بتبقى Short-RAM intake ستوك، بتفرق جامد لو اتعملها Cold-Air intake صح.
والـHorsepower gains بتبقى كبيرة بعد الـRemap

بالنسبة لجزئية الـReliability/Durability بتاع الموتور بعد التعديل:
طبعا فيه تأثير
لأن الشركات وهى بتعمل الموتور -ستوك- بيبقى compromise مابين الأداء والإعتمادية-إستهلاك الوقود-الإنبعاثات

لما انت بتعدل: طبعا بتطلع الـreserve ده من الباور (ماهو الشركة مكانتش هتغلب تطلع الـmissing-power دى)
بس فعلا ده على حساب حاجات تانى: زى ماقال أحمد عادل
إستهلاك البنزين، طقم الدبرياج مثلا، أو الفرامل وقواعد الموتور...etc

بتفرق فـ أيه بقى؟؟
- الموتور نفسه كـConstruction (يعنى معلش مواتير الكورى وبعض اليابانى مثلا مابتستحملش تيون) :B4_282:
- كمية/مقدار الباور Output اللى انت عايز تخرجها من الموتور؟!!

وأساسى مواتير التربو الـHorsepower-gains بتبقى كبيرة بعد التيون.. أقل remap بتطلع 15-20% باور/25-30% عزم زيادة!!
بس قابل بقى إستهلاك البنزين والفرامل والكاوتش والقواعد والفتيس..!!

عشان كده الـrecommended للمواتير المتعدلة (N/A أو تربو) صيانات frequent أكثر من اللازم للستوك
يعنى Over-Servicing.. غيار زيت وفلاتر قبل ميعادها، تغيير بوجيهات وسيور وبلى على فترات أقل من الستوك؟!!:embarrassed:
- الكلام ده فعليا بيحافظ جامد على حالة الموتور فـ العربيات المتعدلة.. وبيقلل من تأثير التيون على العمر-الإفتراضى.

اقتباس:

---

المشاركة الأصلية كتبت بواسطة formulator

@ ahmed-adel
مين اللى متيونلك عربيتك يامان؟؟
1800 جنيه أفهم من كده سامح محمد؟!! :B4_282: ولا TPS عادل وجدى بالـEvolution-chips؟!!!
(ولو خالد غازى أو تامر ياريت تقولنا فرق الأداء فـ الطلعة والـovertaking)؟!!

Rgds،

---

tps بس أنا عملت remap مجبتش chip
رحتلهم عشان هم ال dealer بتاع evolution chips و دي حاجة محترمة و غير كده عندهم money back guaranty لو معجبكش ال remap

للاسف حصل حاجة بايخه لما رحت
اللي رد عليَّ في التليفون قال لي تعالى اتفضل
لما رحت لقيت عندهم lancer عال dyno بقالها أسبوع
شكله كان project شغالين فيه و ساعتها عادل وجدي اتاسفلي و قال لي تعالى وقت تاني لو حابب

بس أنا كسلت بصراحة :) , واتفقت معاه هاعمل ال remap و كده كده فيه money back guaranty لو معجبنيش و أنا كمان عارف range العربية هيبقى إيه

و اتفقت معاه هاجي يوم تاني أعمل dyno مجرد تؤكد يعني
و لما جربتها عجبتني و كسلت بصراحة أضرب المشوار تاني :)
أنا الفيصل عندي عالطريق
و للأمانة الناس حتى مرة كلمته قلتله هجيلك و قال لي تنور و انا اللي نفضت
بس كنت بشوفه هيلتزم بكلامه ولا لأ ؟؟

أنا آسف بقى لو كنتوا عاوزين تشوفوا graph بس لو عملت dyno هارفعه على طول

ياريت تقولنا فرق الأداء فـ الطلعة والـovertaking)؟!!

لو أرقام أنا آسف مجربتش , بس احنا عندنا megane 2
قبل ال remap كانت تقريبا زي عربيتي
بس ما شاء الله بعد ال remap لو ركبت ال megane بحس بفرق واضح
في كل حاجة
throttle responce
الطلعه
ال in gear acceleration حتى

اقتباس:

---

المشاركة الأصلية كتبت بواسطة formulator

فيه شركات مشهورة جدا، هى أصلا بتعدل ماركات معينة بالكامل.. زى Novitec و G-Tech أو ABT و Hamann
(أو حتى تيونر عالى زى eTuners و SKN-Tuning)
بينزلوا الـmaps بتاعتهم على Powerbox منفصل -زى اللى انت بتسأل عنه
يعنى نظريا: مفيش أحسن من كده؟!!

بس عشان هو تيونرمحترم.. ممكن تلاقى warning بيقولك:
Super-plus Gasoline is a MUST otherwise power/torque will decrease by 5%

وفيه اللى بيقولك صريحة كده: التيون ده 98 أو 100oct

حاجة كمان
حالة الموتور والعربية أيـــــه؟؟
دلوقتى نفترض ان بروتون بتنزل Performance Upgrade للجين2 (اللى هو الـR3 عندكم مثلا).. تمام
- الكيت هتبقى intake و exhaust و كنترول ecu.. (بصرف النظر عن تعديلات الهاندلينج والفرامل والثبات)
بيقولك: عشان يضمن الـinstallation ده.. ويطلعلك الـ135 حصان من موتور الـCamPro يبقى فقط لعربية عاملة بالكتير 12000 ميل أو 1 year؟؟!!! :embarrassed:
عشان كده كله بيقول ان Custom-Remap أفضل.. لأنه بياخد فـ الإعتبار حالة الموتور والجيربوكس الفعلية، وبالبنزين المتاح فـ مصر 92/95
وبيعمله live عـ الداينو.. يقدر يغير فـ الـmap والـtuning-files وهو شغال لحد ماتضبط.

---

والله العظيم ما مجاملة :)
بس بجد :tumb:
بذات حِتِّة

عشان كده كله بيقول ان Custom-Remap أفضل.. لأنه بياخد فـ الإعتبار حالة الموتور والجيربوكس الفعلية، وبالبنزين المتاح فـ مصر 92/95
وبيعمله live عـ الداينو.. يقدر يغير فـ الـmap والـtuning-files وهو شغال لحد ماتضبط.


دي بقى ميزة سامح ,إنه tuner أصلا فـممكن يغير فـ الـmap والـtuning-files وهو شغال لحد ماتضبط.
يعني لو عربيتك turbo روح عند سامح أظن هيعمل شغل أعلى

عادل وجدي بيسحب ال file و يبعته بره يتعمل بس
أنا عملت عنده عشان انا N/A فـمفيش مجال كبير إنه يلعب فيه و كمان عشان الضمان بتاع TPS
و بصراحة مردتش حد مصري يحط التاتش بتاعه فيها :)

اقتباس:

---

المشاركة الأصلية كتبت بواسطة formulator

عايز أقول حاجة
أنا مختلف معاكو فـ ان تعديل الـintake مكلف ومش هتستفيد منه!! :help2:
بالعكس بقى: دا أساسى لازم التيون يتعمل على intake متعدل!!
أو عـ الأقل oem replacement فلتر High-flow.. ودى recommended من كل اللى بيعدلوا!!
(لكن متفق ان تعديل الـexhaust مش أساسى؛ عـ الأقل لعربية N/A مش هتستفيد زى مواتير التربو مثلا)؟!!

---

إنت بس فهمتني غلط أنا مش قصدي مش لازم
أنا بـقارن في نقطة ال value for money بس مش أكتر

لو قلنا ال فلتر بيدي بالكتير 2-3 hp بـ 400-500 جنيه (ده من غير تركيب و مواسير )
ال remap بيدي على الأقل 10-15 hp بـ 1800 جنيه

اقتباس:

---

المشاركة الأصلية كتبت بواسطة formulator

بتفرق فـ أيه بقى؟؟
- الموتور نفسه كـConstruction (يعنى معلش مواتير الكورى وبعض اليابانى مثلا مابتستحملش تيون) :B4_282:
- كمية/مقدار الباور Output اللى انت عايز تخرجها من الموتور؟!!

---

ده اللي شجعني أعمله في ال c4 على فكرة ,إنها من العربيات القليلة اللي لقيتها عال site بتاع
evolution chips بتزيد 16 hp دي اقل حاجة و 20 nm تقريبا
ده ال minimum

مواتيرها كويسة في ال tuning يعني ;)

اقتباس:

---

المشاركة الأصلية كتبت بواسطة formulator

وأساسى مواتير التربو الـHorsepower-gains بتبقى كبيرة بعد التيون.. أقل remap بتطلع 15-20% باور/25-30% عزم زيادة!!
بس قابل بقى إستهلاك البنزين والفرامل والكاوتش والقواعد والفتيس..!!

عشان كده الـrecommended للمواتير المتعدلة (N/A أو تربو) صيانات frequent أكثر من اللازم للستوك
يعنى Over-Servicing.. غيار زيت وفلاتر قبل ميعادها، تغيير بوجيهات وسيور وبلى على فترات أقل من الستوك؟!!:embarrassed:
- الكلام ده فعليا بيحافظ جامد على حالة الموتور فـ العربيات المتعدلة.. وبيقلل من تأثير التيون على العمر-الإفتراضى.

---

بس ال N/A مش محتاج قوي

اقتباس:

---

المشاركة الأصلية كتبت بواسطة formulator

أنا أول ماشوفت التوبيك، ولقيت توت-بيه هو اللى عامله؟!! مصدقتش!
قلت tutankhamoun هيبقى من الشوماكرز -زى ماهو بيقول عليهم- ولا أيه؟؟!!! :f_eyeb1[1]:

---

أولا شاكرين على المداخلة و المعلومات المفيدة دي يا باشا .
أنا يا عم غلبان .
لسة راجع من أسكندرية ... رايح جاي 80 إلى 90 كم - س .
كدا روقان ... ساعة أو ساعة ونصف زيادة على الطريق .
بس صدقني و الله العظيم كلها مميزات .

توفير بنزين رهيب ..... روقان بال ...... بأخد اليمين و أعيش مع نفسي و مفيش أي توتر في السواقة .

قبلها بيومين كنت على طريق السويس و نفس السرعة .

و الحمد لله .

اقتباس:

---

المشاركة الأصلية كتبت بواسطة tutankhamoun

أولا شاكرين على المداخلة و المعلومات المفيدة دي يا باشا .
أنا يا عم غلبان .
لسة راجع من أسكندرية ... رايح جاي 80 إلى 90 كم - س .
كدا روقان ... ساعة أو ساعة ونصف زيادة على الطريق .
بس صدقني و الله العظيم كلها مميزات .

توفير بنزين رهيب ..... روقان بال ...... بأخد اليمين و أعيش مع نفسي و مفيش أي توتر في السواقة .

قبلها بيومين كنت على طريق السويس و نفس السرعة .

و الحمد لله .

---

بسم الله، ما شاء الله. زادك الله حرصًا على القيادة الهادئة دي.

بس من فضلك كيف حضرتك تحافظ على هذا النمط من القيادة الهادئة في زمن سمته الإيقاع السريع، والجري، والشد، والغرز، عشان نوفر نصف ساعة أو ساعة مثلاً في مشوار ما، ونضيع أضعافها في كلام فاضي في أي حاجة، وممكن نضيع في سبيل ذلك أرواحنا، وأرواح آخرين أبرياء؟

وكيف وكل من حولك ينظر إليك كأنك كائن فضائي، إزاي ما بتجريش! وإللي يزمرك، وإللي يقلبك نور، وإللي لما يعديك، ويجي جنبك ويقول: " ما تمشي يا عم حرام عليك"، أو "ما تجري يا جدو شوية"...إلخ، مع إنك ماشي في اليمين، بل أقصى اليمين بأقصى سرعة قانونية؟

وكيف تكبح جماح نفسك مع أنك تستقل سيارة حديثة مغرية من أهم سماتها الثبات الرائع والسحب الشديد والقدرة الممتازة على التحكم والمناورة، وأنت على طريق سريع مفتوح؟

يا ريت تفيدنا عشان كل ما أجرب التزم بالقيادة الهادية، ومع إني راكب 128 في الوقت الحالي، يعني المفترض أمشي على 80 كم/ساعة كحد أقصى لعوامل كثيرة، وأحمد ربي على ذلك، إلا إنني أحيانًا كثيرة أكسر 100 كم/ساعة لأنني معظم قيادتى على الدائري.

وشكرًا يا ريس على مشاركتك القيمة

اقتباس:

---

المشاركة الأصلية كتبت بواسطة motarjim

بسم الله، ما شاء الله. زادك الله حرصًا على القيادة الهادئة دي.

بس من فضلك كيف حضرتك تحافظ على هذا النمط من القيادة الهادئة في زمن سمته الإيقاع السريع، والجري، والشد، والغرز، عشان نوفر نصف ساعة أو ساعة مثلاً في مشوار ما، ونضيع أضعافها في كلام فاضي في أي حاجة، وممكن نضيع في سبيل ذلك أرواحنا، وأرواح آخرين أبرياء؟
وكيف وكل من حولك ينظر إليك كأنك كائن فضائي، إزاي ما بتجريش! وإللي يزمرك، وإللي يقلبك نور، وإللي لما يعديك، ويجي جنبك ويقول: " ما تمشي يا عم حرام عليك"، أو "ما تجري يا جدو شوية"...إلخ، مع إنك ماشي في اليمين، بل أقصى اليمين بأقصى سرعة قانونية؟

وكيف تكبح جماح نفسك مع أنك تستقل سيارة حديثة مغرية من أهم سماتها الثبات الرائع والسحب الشديد والقدرة الممتازة على التحكم والمناورة، وأنت على طريق سريع مفتوح؟

يا ريت تفيدنا عشان كل ما أجرب التزم بالقيادة الهادية، ومع إني راكب 128 في الوقت الحالي، يعني المفترض أمشي على 80 كم/ساعة كحد أقصى لعوامل كثيرة، وأحمد ربي على ذلك، إلا إنني أحيانًا كثيرة أكسر 100 كم/ساعة لأنني معظم قيادتى على الدائري.

وشكرًا يا ريس على مشاركتك القيمة

---

و الله يا باشا الموضوع له كذا شق .
أولا أنا متعود على السواقة الهادية من ساعة ما كنت بسوق في أوروبا (لأن السرعات هناك قليلة جدا و الكل ملتزم بها )

ثانيا لما بأمشي بسرعة معقولة بأقدر أشوف الطريق كويس و بأقدر أقف على بعد لو شوفت لوكشة عربيات حصل فيها حاجة أو عملوا حادثة
بحاول أبعد عن نفسي عن تجمع العربيات حواليا (مش مهم الوقت - المهم مأذيش نفسي أو آذي غيري غصب ان عني بطريقةسوقتي )

سرعة 80 أو 90 أفضل كتير من سرعة 100 في التركيز و دي أحصائيات و دراسات عالمية و سيبك من أي حد يقولك أنا عارف أنا بعمل أيه (و لا هو عارف و غلبان و الشيطان ضاحك عليه ) و الدليل كمية الحوادث اللي بتحصل في مصر و العربيات المكحوتة و مخبوطة .بالاضافة طبعا أن الفرامل على 80 أو 90 بتوقف العربية تماما في أي لحظة تضغط عليها بعكس أي سرعات تانية .

كمان أنا مش بحب أتأخر على حد (بحب ألتزم بمواعيدي على أد ما أقدر ) و بالتالي بأخرج بدري و أعمل حسابي أن ممكن يكون فيه زحمة .... فطبعا بأمشي على مهلي علشان معايا وقت و ما زنقتش نفسي في الوقت .

ثالثا بقى
السرعة بتجيب مصايب ... يعني أنت ممكن تجري و علشان مستعجل فاكر نفسك لما تجري هاتوصل بدري
بس ممكن تعمل حادثة أو تحك عربية و تقف تتخانق مع صاحب العربية و تتعطل أكتر أو حتى تتمسك رادار و برضه تتعطل أو تدفع غرامة الرادار .

و شكرا ياباشا على المداخلة و التعليق .