لا حول ولا قوة الا بالله-كل ده فى كام يوم.
السلام عليكم ورحمة الله وبركاته
اخباركوا ايه شباب نايل موتورز.اتمنى الجميع يكون بخير بامر الله.
والله مش عارف احكى ايه ولا ايه.ولا يمكن محتاج افضفض بس.
اليوم الاول.
كان عندى مشوار فى منطقة سفير-مصر الجديدة.لفيت على ركنة مش اقل من نص ساعة ومش لاقى كل محل اللى حاطط كاوتش قديم واللى حاطط طوب واللى حاطط زرع ومش هينفع اركن غير صف تانى.ملقتش غير ركنة صف تانى اودام بنك.ركنت ولاننى متاكد اننى مش هاخد غير 10 دقايق بالكتير ركنت ومورت وسيبت الانتظار ورجعت لقيت امين مرور لازقلى مخالفة(انتظار صف تانى وتعطيل حركة المرور) لسة رايح اكلمه لقيت واحد معرفش مين هو بيقولى سيبك منه ده طلع مرة واحدة وعمال ياخد فى خمسات وعشرات من الناس ويشيل المخالفة.قلا لا بقى كفاية نصب.رحتله.يعنى ينفع تدينى مخالفة ومتعمليش مكان اركن فيه الاول وبعدين تخالفنى(فاكر نفسى قاعد انا فى امريكا لسة) قالى وانا مالى انت راكن صف تانى واللى راكن صف اول مش عارف يخرج.قلتله طيب ما السايس عارف وبيزق العربية وانا مخدتش اكتر من 10 دقايق.خلاص يا باشا ولا يهمك هى فين العربية ونشيل المخالفة وكل سنة وانت طيب.قلتله لا سيبها وانت بالصحة وبالسلامة.ومشيت قاللى ديه ب 500 جنيه.قلتله معلش انا الغلطان فى بلد كلها صح وحسبى الله ونعم الوكيل.
اليوم التانى:
على الدائرى-عربية نص نقل.عديت منه وانا 100-120 تقريبا اتخض او مكنش متوقع اننى هعديه مع اننى نبهته بالنور وكلاكس وهو كان ماشى مش ازيد من 50-60 وبعد ما عديته لقيته طاير من على يمينى وخبط المرايا اليمين وكمل كملت وراه وبقوله ليه كدة يا شيخ.قاللى نعم .قلتله تخبطلى المرايا من اليمين.طيب اخبطها من الشمال ولا كنت سالت.بس تيجى طاير من اليمين وتخبطلى المرايا وتجرى كمان.ولا حتى اسف.لا انا مخبطش المرايا ولا جيت جنبك.ماشى يا شيخ انت كذاب ولما تروح بالسلامة ابقى احلقها عشان انت كدة مش محترمها.
اليوم التالت :
واح بعربية نص نقل واقف بيبع فاكهة( جوافة) بجنيه الكيلو وشكلها حلو.قلت وماله اشوفها واجيبها للعصير واهو مفيدة للبرد.
الناس ملمومة عليه وخلاص قرب يخلص.هما 3 واقفين مع بعض ولا واحد فيهم عارف نوع الجوافة اللى بيبعها ولا عارف منين(اسماعليه-فيوم-قاهرة-دمياط) كل واحد فيهم يقول نوع مرة والتانى يرد لا لا من هنا لا من هنا.ههههه طيب ماشى.
واحد واقف يشترى قاله خمسة كيلو واداله 5 جنيه والبياع حطله وتمام وراح ساله ما تجمدلى 200 جنيه يا باشا قاله وماله اداله ال 200 وعدهم لقاهم ناقصين 5 جنيه قاله ناقصين 5 قاله حاسبت على الجوافة .ايوه. خد ال200 الفكة وعدهم واداله ال 5.قاللى طيب ما تجمدلى 200 كمان قاله معيش غير 100 قاله طيب هاتها وجمدله تانى الراجل راح للعربية(خطوتين) حط الجوافة وقاله يا عم انت دول ناقصين 150 كان بتاع الحوافة خلص وخلاص بيدور العربية ومستناش الراجل يروحله كان دور وطار.
-هو النصب حتى فى الاكل واللى كان بيعمل خدمة او معروف يتنصب عليه.حسبى الله ونعم الوكيل.
اليوم الرابع:
عمارات العبور -صلاح سالم.
بلف ورايح لبريدج ستون ومفيش غير اللفة اللى من اودام اخر العمارات وهوب الاقى امين شرطة وماسك ورق شبه الدفتر ومش دفتر.انت كدة عكسى يا باشا.ليه ومش شايف يافطة بتقول كدة.قاللى ما اهو انا واقف عشان كدة(واقف بدل يافطة).قلتله طيب قوللى اروح للمحل اللى هناك ده ازاى ومفيش دخلة ليه غير هنا.قاللى طب ولو حد جيه فى وشك قلتله عادى هوسعله او هو هيوسعلى وطول عمرها الحته ديه كدة.قلتله بقولك ايه هو انت مش خدمة فى البنك ده.قاللى بنك ايه ده معرض عربيات قلتله اه معلش مخدتش بالى.اركن بقى لحد ما تجيب الظابط يسحب الرخص ونروح النيابة.قاللى لا لا وعلى ايه .كل سنة وانت طيب قلتله انت ذوق والله وانت بالصحة وبالسلامة سلامو عليكوا ومشيت.
اليوم الخامس:
اشارة روكسى.واحد وواحدة ماشين تحت الرصيف على الشمال وانا هلف اليوتيرن وارجع وقبليهم ب 200 متر كلاكس وهو ولا هنا.كلاكس تانى لما قربت اكتر البنت طلعت على الرصيف وهو اول ما حس ببوز العربية مد ايده خبط المرايا(بيبعوا مناديل فى الاشارة على فكرة) وقفت بقوله ليه كدة ما انا مديك كلاكس .معلش يا باشا مخدتش بالى وفى ثوانى البنت شايفها فى المرايا كانت بتلف ورا العربية وجايه من اليمين وبلف اكلمها نعم قالتلى مش عاوز مناديل.لا شكرا وملقتش حاجة تتلطش جنبى(شايف عنيها بتلف بسرعة فى العربية) وحسيت بحاجة على ايدى الشمال بتلفت لقيته بيحاول يفك الساعة.بطلت العربية وسحبت الشومة من تحت الكرسى وانت ياد يا ابن....... بتعمل ايه.فكى يا بت هى طارت يمين وهو طار شمال وكانوا عدوا الشارع.
الكلام ده الساعة 12.30 الضهر.
اليوم السادس :
عربية تلات ارباع نقل-ماشى على طريق السويس وهلف اليوتيرن اللى بعد وطنية وده وقف عى يمين اليوتيرن-حضرت الشومة وقفلت الازاز نص قفلة ولقيته نازل يا باشا اروح العبور ازاى ولسه هوصف لقيت الباب بتاعه اليمين بيفتح وشايف حد نازل وجاى من ورا عربيته وهيجى عندى قلتله تعالى ورايا بقى ونركن يمين واشرحلك.اه طيب وكنت انا فاكك وهو مجاش.
قولولى بقى لو انتوا فى مكانى فى اى موقف او فى موقف الراجل بتاع الفاكهة. لا قدر الله هتعملوا ايه وقولولى هو ايه كمية النصب والكذب والسرقة ديه.
لا حول ولا قوة الا بالله.
