الموضوع: طلب رخم من اصحاب الجين تو

اخواني الاعزاء
تحيه طيبه للناس المحترمه
انا في الفتره الاخيره دي احترت كتير في موضوع تغيير العربيه, و ما بين اللي مكتوب في المنتدي بمعظم اقسامه و بين تقبل الواحد لموديل معين كنت بفكر في التالي و لكل موديل اسبابه:
1- جين تو:
عربيه جميله
غنيه بكماليتها
ثبات
صاج قوي يضمن عدم بهدلتها من بره بمجرد سند او جلوس البني ادميين او كافه مخلوقات الله في الشارع
استهلاك البنزين ممتاز ل 1600 (حسب حسابات الاخ توت)
تكييف ممتاز بشهاده الناس في المنتدي
2- نيسان صني:
عربيه عاديه جدا(من حيث شكل الصالون بتاعها)
استهلاك البنزين بتاعها مش مشجع اطلاقا
شكلها من بره ارستقراطي كده و ده ميزه من وجهه نظري بس مشكله صاجها دي تخلي الواحد متردد ( سبعاوي اقر بالنقطه دي)
كماليتها عاديه زيها زي اللانوس فل اوبشن (طبعا العربيه لا تقارن باللانوس دي حاجه و دي حاجه بس قصدي من ناحيه الكماليات فقط)
3- اوبترا:
من جوه صالونها مش بطال و لو ان شكل التابلوه بتاع الافيو اكثر اناقه
برضو موضوع صاجها الضعيف و انه مش هيستحمل قعد خلق الله عليه و في النهايه حاجه زي كده هتخلي شكل العربيه من بره زي المستعمل اللي متبهدل و متهان
4- بونتو:
اهو توفير بنزين برضو
شكلها مش بطال
عيبها من وجهه نظري ضعف الموتور الجديد بتاعها او بعباره اخري عشان محدش يزعل مني موتور محدود القوي
5- اللانسر:
و دي بقي مع اخويا و سقتها كتير بس مش شايف انها تستاهل السعر ده عليها و مع انها 1600 الا اني فكرت بس في ال1300 علشان اقدر علي سعرها و مع ذلك الناس هنا في المنتدي بتقول كلام يقلق من قوه الموتور ال1300 علي وزنها و التكييف
المهم علشان مطولش عليكم
كل اللي انا عايزه ان حد من الاخوه الافاضل اللي معاه جين تو يسمحلي بتجربه العربيه و لو امكن كمان الاوتوماتك منها, انا عارف ان الطلب ده تقيل جدا و رخم بس لازم ابقي عارف انا بشتري ايه بالظبط
و ربنا يكرمني و اكون من اعضاء منتدي البروتون الرسميين
انا ساكن في مدينه نصر ناحيه رابعه العدويه
اللي شايف انه ممكن يساعدني يبعتلي رساله و ربنا يبارك له
و شكرا ليكم