الخلاط الجروهي موجود في معارض كليوباترا وأقل واحد ب 650 جنيه وده أصغر وحجم ومع ان خامته نضيفه بس حجمه صغير قوي وبيطلع معاك فى السعر لحد 4000 جنيه للخلاط الواحد.

البديل ممكن تجيب ايديال ستاندارد وده تلاقى منه الاحجام الصغيره ب 250 ولا 300 ولما تدخل فى حدود ال 500-600 تجيب حجم كبير وشيك ودول اللي أنا جبتهم.

بالنسبه للبورسلين عندك نوعين من حيث التصنيع. الكريستال وده اللي أنا جبته وبيبقى غلي شويه بس ندمت اني جبته لأنه بيبان فيه أى لحوسه عامل زي الازاز كده. شكله روعه بس لما تبصله من زاويه معكوس عليها الضوء تشوف لحوسه فى الارضيه. والنوع التاني اللي مش عاكس وميزته عن السيراميك انه قطع ليزر والفرق بين البلاط بتبقى بسيطه جدا شبه مش موجوده.

البورسلين الصيني الفاتح فى حدود 70 جنيه للمتر والغامق 80 ولا 85 وكليوباترا من 80 جنيه تقريبا للعادى و+100 للكريستال.

الفرق بين السيراميك الغالي والرخيص حاجات كتير منها التصميم ودقه الالوان وثباتها مع الوقت وان البلاطه تكون عجينتها حلوه تتحمل وقوع طبق عليها مثلا وبيساعد على كده ان الصنايعي يكون مدي البلاطه مونه تقيله متبقاش مطبله وده أهم من انك تدقق فى الفراغات اللي بين البلاط لأن معظم الناس بتدقق مع صنايعي البلاط على موضوع فورق البلاط وتنسي موضوع المونه المفروشه تحت البلاطه.

أطقم الحمامات عندك الديورافيت يعمل بتاع 900 جنيه وايديال يعمل بتاع 1800 وكليوباترا 2000 جنيه وده بيبقى منقوش لون بلاط الديكور بتاع الحمام وبيبقى روعه. دي طبعا اسعار الحوض مع التواليت بس.

هتحتاج بانيو يعمل بتاع 1500 من كليوباترا من غير اي اضافات يعني مفيش جاكوزي ولا بتاع وهتشتريله طبه الصرف ودي ب 100 لو صيني و 200 لو ايطالي و طقم اكسسوار (الفواطه والصبانه الخ الخ) الديورافيت يعمل 300 وكليوباترا زييه وبيبقى منقوش لون ديكور الحمام كمان.

عندك المحابس بقى: المحبس الرئيسي اسمه محبس الدفن وده ب 80 جنيه اسمه الشريف. ومحبس السخان والحوض والشطاف اسمه محبس زاويه وعندك من أول الصيني اللي ب 8 جنيه لحد الجروهي اللي ب 50 جنيه بس متخليش السباك يركب محابس على الحنفيات السخنه لأنها هتبوظ بسرعه عشان جواها كاوتش بيسيح من الميه السخنه وهتبقى صرفت فيها فلوس على الفاضي ممكن بيها تعلي ماركه محابس الميه البارده.