استهلاك بنزين نيوصنى

**malta** · 30-10-2012 11:40 PM

سلام عليكم يارب تكونوا قضيتوا عيد سعيد .انا اول لما جبت العربية كانت بتستهلك 7.8 و فضليت تزيد زيادة ثابتة .7.9 -8 - 8.1 لغاية ما وصلت الان ل 8.4 هل اخوانا ملاك الصنى اللى عملوا صيانة الالف استهلاك البنزين زاد ولا قل بعد الصيانة

**رفيق صلاح مراد** · 31-10-2012 12:00 AM

السلام عليكم لقد ذهبت الى توكيل نيسان للسؤال عن صنى 2012 فرد السعر 92الف الشكل القديم مانيوال وانا متحير ياترى اى شكل هو يقصد

**Youssef.Awad** · 31-10-2012 12:51 AM

ياريت نحسب الاستهلاك مانيوال ورقة وقلم وكام لتر بنزين اتحطوا فى التانك ومشينا بيهم كام كم
وبلاش نعتمد ابدا على قراءات العداد الالكترونى فى الحساب لأنه مهما كان نوع العربية ان شالله بى ام مش نيسان مش هايكون دقيق زى الطريقة الاولى

**AHMED_DINAMO** · 31-10-2012 06:35 AM

ال اعرفه ان الاستهلاك المفروض بيقل بس استنى اصحاب الصنى يردو على حضرتك

**malta** · 31-10-2012 10:54 PM

انا مش بحسبها بالورقة و القلم بس لفت انتباهى ان الزيادة ثابتة فى كل مرة 0.1 و كمان حاسس ان فعلا استهلاكها زاد فهل فى اسباب لكده و لا لا

**dodyam** · 01-11-2012 10:58 AM

المشاركة الأصلية كتبت بواسطة د.هشام

الاستهلاك أكثر من رائع سواء قبل او بعد صيانة الالف, انا مابركزش بصراحة مع كمبيوتر العربية, بس بصورة تقريبية كدة لو فولت العربية (حوالي 41 لتر) ممكن العربية تودييك الاسكندرية وترجعك تاني (للقاهرة) مع شوية مشاوير جوة البلد, محتاج ليه بقا تحسب استهلاك البنزين؟

كلام حضرتك صحيح من اسكندرية لابورواش فى القاهرة ثم المحور الى ميدان التحرير و الرجوع مرة اخرى لاسكندرية ده بتفويلة واحدة بس وكانت مع صيانة الألف و التفاصيل كالتالى

وبالنسبة للبنزين أنا متوسط الاستهلاك قبل ما أسافر طبقا لكمبيوتر العربية كان 12.3 ففولت العربية الصبح و صفرت المتوسط و عدادات الرحلات ولما وصلت اسكندرية كان لمبة التانك يدوب لسه بتنور فدخلت فولت من نفس البنزينة و أخدت القراءات وكانت كالتالى

المسافة الكلية قبل السفر و التفويل أول مرة 779
مسافة الرحلة 443
متوسط الاستهلاك طبقا للكمبيوتر 7.8 لتر لكل 100 كيلو
المسافة المتبقية الممكن قطعها قبل تانى تفويلة 57 كيلو
المسافة الكلية بعد الرجوع من السفر و التفويل تانى مرة 1222
عدد اللترات المضافة للخزان فى التفويلة الثانية 35.5 لتر
التفويل فى المرتان بالزور من بنزينة الامارات

المتوسط الفعلى للاستهلاك 8 لتر لكل 100 كيلو

السير كان بمتوسط سرعة من 140 الى 160 لمسافة 400 كيلو فيهم نصف ساعة بالتكييف و 43 كيلو على المحور وداخل القاهرة

نصيحة محدش يفول والطرمبة مش ناحية التانك و بلاش موضوع تفويل الزور كتير لانى عملت كده و زور التانك ضيق و المسدس العامل محطوش كويس ففلت من مكانه و بهدلى جنب العربية و الكاوتش بنزين طبعا خليته يغسلى المكان ده كويس بميه و صابون وأنا شلت نص لتر من الحساب فوق قصاد البنزين اللى وقع لان شاشة الطرمبة كانت 36 لتر

طبعا قبل الالف كان الكمبيوتر بقول متوسط الاستهلاك 12 ولما سافرت بقى 8
حاليا أنا 2000 كيلو و كنت فى القاهرة امبارح ما حسبتش لسه فعلى بصراحة هأحسبها و أقولك بكرة لما أروح الجراج ان شاء الله
بس عامة الكمبيوتر قرايته لسفرية امبارح بعد ما صفرته بقت 8.3 فكده زادت عن السفرية اللى قبلها فعلا واستنى بكرة هأكتب تفاصيل أكتر ان شاء الله