الموضوع: استهلاك بنزين نيوصنى

بص ياسيدي .. صلي على النبي


أول حاجة زي مال دكتور يوسف قاللك كدة, الاستهلاك لا يتم حسابه من كومبيوتر العربية, الأرقام دي بتكون استرشادية لا أكثر ... ليه بقى؟ أقوللك ليه

1- كومبيوتر العربية له كذا موود , أول واحد بيشوف انت ماشي ازاي وعدد لفات المحرك دلوقتي بيخلي العربية تسحب كام (حالاً في التوقيت ده) , وبناءً عليه بيديك قراءة (وهي اللي انت بتقول عليها 7 أو 8 كل 100 كيلو).

2- تاني واحد بيشوف متوسط القراءات اللي هو أخدها, تقريباً خلال ربع ساعة أو من توقيت آخر قراءة انت أخدتها (مش فاكر كان مكتوب في الكاتالوج إيه بالظبط) ... لكن ده عبارة عن متوسط حسابي عادي وله نسبة انحراف عالية.


3- تعال ناخد مثال حي, علشان نتفق ان لازم حساب الاستهلاك يكون بالورقة والقلم:

- انت كنت واقف بالعربية, راكن بس مدور الموتور ... عداد الاستهلاك هايديك انه 33 لتر لكل 100 كيلو :)
- بعد كدة اتحركت على مطلع وكابس بنزين, استهلاكك هايبقى في حدود 8 أو 9 لكل 100 كيلو , طبيعي انت مزود بنزين والموتور بيحرق
- وقفت بعدها في إشارة وراح مديك تاني 33 لتر , هل بعد ده كله هاتاخد بمتوسط الاستهلاك؟ هل ده متوسط فعلي يعكس استهلاكك؟ بالتأكيد لأ

نفس الكلام, ماتبقاش في المسافة اللي بين نقلتين ودايس بنزين علشان تزود سرعة أو ماشي على طريق مرتفع أو بتتدحرج في الزحمة , وتبص على متوسط الاستهلاك الحالي, لأنه عمره ماهايكون رقم دقيق, بالتأكيد هاتستهلك 33 لتر بس انت مش هاتمشي 100 كيلو بالمنظر ده علشان تستهلكهم !!


أفضل طريقة , تصفر عداد الرحلات وانت بتفول التانك, تمشي في طريقك بأمان الله عادي, وتفتكر كويس انت كنت فاتح الشبابيك ولا قافلهم ومشغل التكييف, بعد كدة لما تروح تمون تشوف انت استهلكت كام لتر, وعدادك عمل كام كيلومتر, ومن خلال كدة تروح حاسب معدل استهلاكك الفعلي, وتشوف لما تكون بالتكييف أو من غيره هاتفرق معاك كتير ولا لأ

في الغالب, بيكون الاستهلاك يتراوح بين 5 و 7 لتر لكل 100 كيلومتر , وده مزيج بين طرق سريعة وطرق مزدحمة


جرب كدة وقوللنا ... وممكن تدخل على فهرس مكتبة القسم اللي عملها الرائع أحمد مصطفى ... هاتلاقي فيها مواضيع كتير عن معدل استهلاك بنزين الصني الجديدة, وبإذن الله هاتلاقي ما يرضيك


تحياتي , وفي أمان الله