انا لسة مسجل امبارح وكل الناس هاجمتني ليه يا جماعة للدرجة دي انا تقيل علي قلبكو,, لو مش عاوزني ف المنتدي قولولي وانا اسيبه,, انا عمري ما غلطت في حد بجد حالتي النفسية منهارة
عرض للطباعة
انا لسة مسجل امبارح وكل الناس هاجمتني ليه يا جماعة للدرجة دي انا تقيل علي قلبكو,, لو مش عاوزني ف المنتدي قولولي وانا اسيبه,, انا عمري ما غلطت في حد بجد حالتي النفسية منهارة
أكيد الناس بتهزر معاك
يافندم هتلاقي 97 % من الاعضاء اللي هنا كارهين التوك توك واللي جابو واللي سايقه
اكيد انت عارف ليه
اكيد اتعلم على الناس دي كلها منه وانا بصراحة عمر ماهيبقى بيني وبين اي حد منهم عمار ( اتعلم عليا في الباب بتاع السواق واللي وراه من عيل صغير راكب توكتوك )
متزعلش من كلامي
انت عارف لما تكون واحد اهلاوي دخلت في منتدى الزملكاوية ؟ هو ده بالظبط :)))))))))
مافيش واحد هنا الا و توكتوك كسر عليه او خبطه او او او
و طبعا ناهيك عن رد فعل اللي سايق التوكتوك لو سواق الملاكي فتح بقه معاه
نفس الكلام بالنسبة للمكروباص و الميني باص و النص نقل بس اقل من التوكتوك
و بنسبة اقل شوية منهم التاكسي
ممكن نحاول نسأل نفسنا , هو ليه المهنيين واخدينها بلطجة ؟
وانا المريات الاتنين شمال ويمين اكسرو برضه بسبب تكتوك ابن 60×70 وكلفونى 500 جنيه يرضى مين ده ، غير بقى الخبط اللى فى العربية ايشى رفرف يمين على فانوس على اكصدام خلفى على شوية حكات كده معلمه فى العربية كلها
لو هانتكلم جد , معلش انا مش مصدق اساسا ان حضرتك سواق توك توك وهاقولك ليه
مفيش سواق توك توك هايكتب بالفرانكو tok tok el 7ob ولا هايدخل على المنتديات ويدى اراءه الفنيه فى العربيات ولا هايبقى عنده وقت ولا فلوس يقعد على النت اساسا ولا عنده كمبيوتر من اساسه
هاتقوللى ليه هو مش بنى ادم هاقولك طبعا بنى ادم وعلى عينى وراسى وممكن يكون احسن منى عند ربنا
بس سواقين واصحاب التكاتك اللى بنشوفهم فى الشارع وياما اتأذينا منهم كلهم شبه بعض وبصفات واحدة اجرام وبلطجة ولا مبالاه والفاظ واغانى شعبى وتحرش ومعاكسة بنات وغيره
هاتقولى انا مش كدا هاقولك ماشى يبقى انت من النوع التانى المحترم اللى فى حاله اللى بيجرى على اكل عيشه ويمكن شغال على التوك توك كمان مش بتاعه وعايز يجمع 20 جنيه فى اليوم عشان يصرف على بيته وعياله , اكيد برضه ال 20 جنيه مش هايبقالك منها حاجه تدفع فاتورة النت ولا ال usb modem
عموما اهلا بيك معانا عضو فى المنتدى , وماتزعلش من هجوم الناس عليك عشان انت عارف كويس الاسباب
من تواضع لله رفعه
وفى من كل الاشكال والالوان والمهمن الكويس وللاسف قليل والباقى سيئ
ربنا يهدي البشر والنفوس يارب
الأخوه خلصو الكلام كله بصراحه اللى انا داخل اقوله
بس حاجه اخيره تبقى عارفها
الناس هنا مش بيكرهوك لشخصك لاسمح الله ولا مغرورين ولامتكبرين ولا الكلام ده كله بس انتو بصراحه وبتوع المكروبصات خليتوا عندنا غل وكبت رهيب من افعالكوا
اكيد رد الفعل مش على شخصك
رد الفعل عن الكل (بالاجماع) سائقى التوك توك
المفروض تغير عنوان الموضوع وتقول ليه اصحاب التوكتك بيعاملوا الناس كلها كده
مفيش حد مننا هنا فى المنتدى لم يتأذى من التوكتوك
ومفيش بنت أو سيده ملهاش تجربه سيئه مع التوك توك
مفيش مواطن عادى لم يتأذى من هذا الوباء الذى نزل علينا
والله العظيم ياأخى بيصل بى الامر ان امشى مسافات طويله لاتفادى المناطق المزدحمه بالتوكتوك لانى بكون غير مهىء للرد على مشاكلهم التى لاتنتهى مهو لو ماخبطنيش هيقف قدامى لمجرد المضايقه ولو ما وقفش هسمع الكاسيت المزلزل والتلوث السمعى الخارج منه وان لم اسمع سأرى بعينى مضايقته لخلق الله عمال على بطال
و.و...و....و......و............و
انا معك ان هناك قله قليله جدا جدا جدا جدا محترمين وفعلا عايزين ياكلوا عيش ونحترمهم لكن الاغلبيه العظمى حدث ولا حرج ولعلمك انا من المحله وما ادراك بسائقى البلوه دى تجار مخدرات مسجلين خطر بائعى الانابيب عربجيه اطفال ازاااااااااااااااى هنحب اسلوبهم فى التعامل هل سننافق لااظن
واهلا بك يازميلنا الفاضل اعذرنى حبيت افضفض معاك وارجوا ان تتقبل رأيى من مبدأ الحريه فى التعبير
"التوك توك" هو تلك العلبة الصفيح التى تسير فى شوارع مصر بلا حسيب ولا رقيب وتنشر الفوضى المرورية ومن اهم مميزاته الصخب الموسيقى والتلوث السمعى والعبارات الخادشة التى تكتب على خلفيته ومرادفا أيضا لجرائم كثيرة وقعت مؤخرا من البلطجة للسرقة واغلب سائقيه من المراهقين والمسجلين خطر