اقتباس المشاركة الأصلية كتبت بواسطة hossam_elwani مشاهدة المشاركة
بعيد عنى يا استاذ باسم اركب صينى لما يوصل لمستوى الكورى رغم تواضعه وعلى فكره من 10 سنين الكورى كان زى الصينى دلوقتى او احسن درجه .. لكن اركب لعبة اطفال او خامات معاد تدويرها من النفايات لالالالا والف لا ... ربنا عرفوه بلعقل وبلعقل معروف العربيه رخصيه قوى كده ليييه رغم كمية الاوبشن الى فيها محدش اهبل النهارده

وتقبل تحياتى

لا طبعاً .. أنا أتمنالك وأتمنى لأي حد أنه يركب أحسن عربيات ..
بتسأل رخيصة ليه؟! .. دي بقى ليها ألف سبب وسبب .. منها رخص العمالة .. دعم الحكومة الصينية للصناعات الكبيرة والمتعددة زي صناعة السيارات .. غزارة الإنتاج .. بالإضافة طبعاً لقله جودة الخامات نسبياً بس مش لدرجة أنها يكون معاد تدويرها .

أنا مبقولش أنها أحسن من الألماني والفرنساوي والياباني .. ولو قلت كدة أبقى جاحد .. ولكن فيه نقطة مش عارف أوصلهالك .. وهي أنك بتاخد أعلى قيمة (اياً كانت القيمة دي مستواها أيه) مقابل الفلوس اللي بتدفعها .. والصناعات الصينية حتفضل كدة على طول .

خلي بالك فيه منتجات صينية كتيرة جودتها أعلى بكتير من منتجات أوروبية وأمريكية وبسعر أقل من النص .. ولو ليك حد في الخارج حيأكد ليك الكلام ده .

نيجي للعربيات .. خلينا نعترف أن الصينيين معرفوش لوحدهم ينتجوا سيارة بمواصفات أمان تستطيع بها غزو الأسواق الأوروبية والأمريكية .. علشان كدة بيعوضوا النقص ده بشراء شركات عريقة (جيلي وفولفو) أو بعقد تحالفات معها (بي واي دي ودايملر) .. وبالنسبة للجودة خلي بالك الصينيين ممكن يعملولك نفس العربية بخامات وجودة تقفيل أحسن من الألماني لأن الخامات وجودة التقفيل مفيهمش تكنولوجيا .. اللي فيهم تكنولوجيا هي الأجزاء الميكانيكية والعفشة .. أما الكماليات فهي متاحة للجميع زيها زي جودة الخامات .

علشان كدة أنا متوقع أن الصين في خلال 5 سنوات أو 10 سنوات بالكتير هي اللي حتبقى الحصان الرابح في دنيا السيارات بالعالم .. وساعتها حتيجي وأنت مكشر وزعلان ومزعبب وتقولي ترشحلي أنهي عربية صيني من دول ... ههههههههههههه ما هو مش معقول حيكون قدامك جودة كويسة بسعر قليل وتقول له لا يع دي صيني .. تحياتي وأسف على الإطالة وأرجو أنك متزعلش من هزاري معاك .