الموضوع: الحمد لله بفضل الله و منه استلمت السوبر صالون انهاردة...و عندي شوية استفسارات منكم

السلام عليكم ازي حضراتكم.....
بعد اكتر من سنة من البحث عن سيارة مناسبة و معقولة ف السعر و ماركة محترمة رسينا على النيسان صني الشكل الجديد.
الحمد لله انا حجزت نيسان صني الشكل الجديد العادية يوم 1-10 و و بعدين عرفت من المنتدي ان السوبر صالون اتفتحله باب الحجز يوم الخميس او الجمعة 18 او 19 -10 فاتصلت بالمندوب اللي بيتابع معايا و الراجل عمل الواجب و حوللي الحجز.

يوم 24-10 اخر يوم قبل اجازة العيد كلمني و قاللي عربيتك جاهزة قلت الحمد لله تساهيل ربنا تعالى بعد العيد. المهم اتفقنا على السبت 3-11 اللى هو انهاردة.

المهم جه يوم السبت المنتظر و الواحد ساكن ف المنيا يعني 250 كيلو من القاهرة فركبنا القطر و انطلقنا الى قاهرة المعز.
وصلنا بحمد الله مقر اوتوايجيبت في المهندسين على 10 صباحا. و معادنا كنا 11.

قابلنا المندوب بوجه بشوش و قعدنا مستنينه علشان كان بيسلم حد تاني. و بعد فترة الانتظار بدات اللحظات التى طال انتظارها, خلصنا شغل الورق الاول و رحنا نتفرج على العربية و الراجل بصراحة وفى و استيكفى جزاه الله خيرا. و استلمنا العربية و كانت اول مرة اسوق ف القاهرة و كمان اول مرة اسوق اوتوماتيك فكان في حبة رهبة كدة مشت بعد ما التحركنا و ربنا سهلها لنا و مليت بنزين و رجعنا ع المنيا.

في شوية حاجات كنت عاوز اخد راى حضراتكم عليهم و هم كلآتي:
1-البطارية اللي في العربية سائلة و لما قلتله ازاي ده انا اعرف انها بقت جافة قالى لا كله كده فبصيت ع العربية اللي ف العرض لقيت في زي ورقة استيكر على مكان الفتحات اللي بتزود منها السائل للبطارية فقلتله ليه ده جافة قاللى لا ده سائلة بس الورقة مغطية الفتحات فسكت بصراحة خصوصا اني شكيت في نفسي غير اني مش خبير ف العربيات اوي فقلت يمكن انا فاهم الفرق بينهم غلط و لا حاجة......فايه راي حضراتك مش المفروض الجافة ما بيبقاش فيها فتحات اصل هو برده قال ان ده سائلة بس مش زي اللي في السوق يعني مش هتحتاج تزودها و لا اي حاجة؟

2- الاكصدام الخلفي كان في تقشيرة بحجم صغير جدا ما تشوفهاش غير لو دققت, هي في حجم نقطة صغيرة بقلم مثلا. كلمته قال ده حاجة بسيطة جدا و مش ملاحظة وممكن تكون طوبة و لا حاجة خبطت ف الاكصدام و هي جاية.

3- بعد ما طلعت من المعرض نسيت اظبط ضغط الاطارات و فضلت ماشي بيها لحد المنيا فهل ده في ضرر كبير.

4- حاجة كمان بعد اذنكم, انا كنت ماشي على طريق الصعيد الحر بتاع الجيش المهم بحس العربية لو سبت الدركسيون العربية بتنحرف تدريجيا بعد فترة صغيرة فهل ده طبيعي و لا عشان ضغغط الاطارات اللي ما ظبطوش و لا الطريق و لا عاوزة ظبط زاويا.

5- انا قريت هنا ان اول الف المفروض ما تزيدش عن 100 و التكييف يشتغل بعد 500 كم المهم سالت المندوب لا عادي لان المواتير الحديثة بتتلين قبل ما تنزل ف العربية و بصراحة الطريق كان فاضي و يغري فما قدرتش اقاوم اني ازود شوية خصوصا كنت عاوز اوصل بسرعة بس مازودتش غير لمية و عشرين و اغلب الوقت كنت ماشي على 110 و كمان كنت مشغل التكييف على واحد طول الطريق تقريبا لان الطريق الصحراوى حر فهل اللى انا عملته غلط و اللي المندوب قال عليه في موضوع التليين صح و لا ايه.

اخيرا احب اشكر اوتوايجيبت جدا على التعامل و الاستقبال و.... بس موضوع البطارية مضايقني منهم بصراحة مش عارف اعمل ايه؟
ربنا يباركلنا فيها و يحفظها من كل سوء.
وشكرا جزيلا