صني 13 - تقرير صيانة الـ 10,000 وسبب صوت الفرامل

**the_air_devil** · 04-11-2012 09:52 AM

بسم الله الرحمن الرحيم

نظراً لأن العبد لله مشواره اليومي طويل وطرقي طوالي سريعة وكمان فيها طرق بطيئة وزحمة, وصلت لـ 10,000كيلو متر .... وعلى رأي المطرب المشهور ( عملت صيانة الـعشرتلاف كيلومتر...لما وصلت عشرتلاف كيلومتر) كان لازم نعالج الملاحظات....وكان ما يلي:

1- نبدأ بالحاجة السهلة: لمبة الخرائط...ماكانتش بتنور وصلحوها خلوها تنور صح

2- رجلشوا فرامل اليد ...حسيت بيها جداً وانا بارفعها وباين عليها النعمة

3- ربطوا العفشة وكشفوا على المساعدين علشان كنت خايف عليهم من كتر الدب والهبد والرزع اللي الواحد بيفاجأ بيه في طرق المحروسة ... بصراحة طرق "حريرية" توصلك لشعور بالراحة الشديدة والاطمئنان الكبير وانت سايق ... مش لاقي كلمة غير حسبنا الله ونعم الوكيل في المسئول عن عمايلها وصيانتها

4- حاولت اركب فلتر تكييف ...طلع لسة مش موجود ... فياريت الإخوة الكرام لو حد لقى فلتر تكييف نزل يقوللي اروح اركبه

5- نيجي للفرامل : ونشرح القصة باختصار

السادة ملاك الصني الجديدة معظمهم بيشتكي من صوت الفرملة على الهادي ...بيسمع صوت تريللا بتفرمل (مع عدم التأثير على كفاءة الفرملة أو الأمان) ... وكل واحد فيهم لقى رد شكل من مهندس صيانة أو ميكانيكي أو حد بيفتي وخلاص

والطبيعي يكون التيل بيطبع على الطنابير في أول ألف كيلو مثلاً ... نخليهم خمسة علشان الحبايب

انما عشرتلاف كيلو كتير ..وبعدين بيعمل هباب على الطاسات من قدام.. علشان كدة صممت اشوف الأمر في التوكيل

بعد الصيانة الصوت راح !! راح ازاي؟ ... المهندسة مشكورة قالتلي انهم صنفروا المكان ونضفوه بالهوا ... لكن ....

بما ان العديد من الناس اشتكوا من نفس القصة ... بعتوا لنيسان الأم ... ومنتظرين يتخذوا قرار بناءً على رد الشركة عليهم ... الشركة حالياً بتقوم بدراسة الإجراء الواجب اتخاذه , سواءاً هايغيروا حاجة أو يعدلوا حاجة ...ساعتها هانعرف ان شاء الله من خلال مكالمات التوكيل للسادة حائزي السيارة (زي ماحصل في القشقاي لما طلع فيها حاجة بسيطة) .... علشان نحل المشكلة ومانسمعش الصوت ده تاني

6- غيرت أماكن العجل على شكل X ودي كانت أول مرة الكاوتش يتفك فيها .... وعملت ساعتها ترصيص علشان ساعات الأمر بيحتاج لما تغير أماكن الكاوتش

أداء العربية ماشاء الله ممتاز ... وكمان فترة قصيرة ان شاء الله أغير الزيت والفلتر علشان المفروض زيت 10,000 مايقعدش الفترة كلها ... المفروض أقل لأن عشرتلاف دي هي أقصى مسافة يمكن قطعها بالزيت بأمان.... ولسة باقارن بين ليكوي مولي وفالفولاين ... ربنا يهيدنا للأصلح

تحياتي لكم جميعاً وكل صيانة وانتم طيبين

سلام عليكم

**shady_hamdy** · 04-11-2012 10:04 AM

الف مبروك للصيانة

**waleed mohamme** · 04-11-2012 10:07 AM

مبروك الصيانة

**mohamed_kta** · 04-11-2012 11:50 AM

مبروك و ربنا يحفظهالك

**sherifezzat** · 04-11-2012 12:30 PM

السلام عليكم

انا عندي اضافه بالنسبه لموضوع الصوت ده مش عارف اذا كان في حد عرف الموضوع ده ولا لأ
في صيانه ال 5000 في اوتو ايجيبت ابو رواش كنت اشتكيت من موضوع الصوت ده مهندس الاستقبال بعد لما خلص الصيانه قلي سبب الصوت ده حاجه اسمها صاجه تيل خلفي ودي سبب الصفاره دي والقطعه دي مش موجوده وبعتوا يجيبوها من بره ومش عارف هتوصل امتى

حاجه تانيه قلي عليها ومش عارف ايه رايكم فيها قلي ان الطنابير الاماميه فيها ريجه وهتحتاج تتغير مع تغيير التيل وده مش تبع الضمان لان الطنابير والتيل بره الضمان وتبع الاستخدام هل الكلام ده صح ولا ايه؟؟؟

مع جزيل الشكر

**Youssef.Awad** · 04-11-2012 02:07 PM

1000 مبروك ع الصيانة وعقبال ال100 الف كم
وكمان متشكرين ع التقرير الموجز والمفصل ده

**zambarota** · 04-11-2012 04:34 PM

اولا مبروك على الصيانه وانت السابقون

ثانيا انا زعلان ومضايق جدا بسبب صوت فرامل العربيه

الصوت بقى متكرر وبيضايق الواحد كل مره

والغريبه انك لما تدوس على الهادي يظهر الصوت ولما ترفع وتدوس مره تانيه الصوت بيروح

وفى صيانه الالف قولت لمودرن موتورز على موضوع الصوت

المهندس طبعا حافظ مش فاهم قالى دا تطبيع

ولما روحت صيانه ال ٥ الاف فى السبع مهندسه الصيانه فى الاستقبال قالتلى هايكشفو عليها

ولما خلصت العربيه قالتلى الفرامل سليمه ومفيش اى مشاكل

المعضله بقى دلوقتى ان الموضوع بقى واضح وملحوظ وكل وكيل يطلع بحكايه وحل

خلاص كفايه كتابه لحد كدا

**the_air_devil** · 04-11-2012 06:53 PM

المشاركة الأصلية كتبت بواسطة sherifezzat

السلام عليكم

انا عندي اضافه بالنسبه لموضوع الصوت ده مش عارف اذا كان في حد عرف الموضوع ده ولا لأ
في صيانه ال 5000 في اوتو ايجيبت ابو رواش كنت اشتكيت من موضوع الصوت ده مهندس الاستقبال بعد لما خلص الصيانه قلي سبب الصوت ده حاجه اسمها صاجه تيل خلفي ودي سبب الصفاره دي والقطعه دي مش موجوده وبعتوا يجيبوها من بره ومش عارف هتوصل امتى

حاجه تانيه قلي عليها ومش عارف ايه رايكم فيها قلي ان الطنابير الاماميه فيها ريجه وهتحتاج تتغير مع تغيير التيل وده مش تبع الضمان لان الطنابير والتيل بره الضمان وتبع الاستخدام هل الكلام ده صح ولا ايه؟؟؟

مع جزيل الشكر

ممكن يكون في حالتك لو الكلام على الطنابير ... انت محتاج تروح لتوكيل تاني بعد إذنك

انما صاجة وكحك وشغل بمب العيد ده , ياريت يبطلوا يفتوا بقى ... التيل ناشف ومحتاج صنفرة وتنضيف وبس ... والحل النهائي للصوت هاييجي من نيسان قريباً إن شاء الله

**the_air_devil** · 04-11-2012 06:55 PM

المشاركة الأصلية كتبت بواسطة zambarota

اولا مبروك على الصيانه وانت السابقون

ثانيا انا زعلان ومضايق جدا بسبب صوت فرامل العربيه

الصوت بقى متكرر وبيضايق الواحد كل مره

والغريبه انك لما تدوس على الهادي يظهر الصوت ولما ترفع وتدوس مره تانيه الصوت بيروح

وفى صيانه الالف قولت لمودرن موتورز على موضوع الصوت

المهندس طبعا حافظ مش فاهم قالى دا تطبيع

ولما روحت صيانه ال ٥ الاف فى السبع مهندسه الصيانه فى الاستقبال قالتلى هايكشفو عليها

ولما خلصت العربيه قالتلى الفرامل سليمه ومفيش اى مشاكل

المعضله بقى دلوقتى ان الموضوع بقى واضح وملحوظ وكل وكيل يطلع بحكايه وحل

خلاص كفايه كتابه لحد كدا

خليهم بس ينضفوه ويصنفروه ... وبإذن الله هاتحس بالفرق

-

الموضوع: صني 13 - تقرير صيانة الـ 10,000 وسبب صوت الفرامل

LinkBack

أدوات الموضوع

عرض

صني 13 - تقرير صيانة الـ 10,000 وسبب صوت الفرامل - انشر الموضوع فى :

-

-

-

-

المواضيع المتشابهه

مشكلة فى الفرامل بعد صيانة الـ 40000

صيانة 90000 + مشكلة فى الفرامل 2

مشكلة تكة الفرامل بعد صيانة ال-20,000

اي موضوع اللون النبيتى وسبب انتشاره

تقرير صيانة ال 30 الف كيلو متر كورولا 2009 + مشكلة فى الفرامل

الكلمات الدلالية لهذا الموضوع

المفضلات

المفضلات

ضوابط المشاركة