الموضوع: باركولى .. حغـير قريب .. ومحـتاج مسـاعـدتكـم فى الاخـتيار

المشاركة الأصلية كتبت بواسطة youssef.awad

بصراحة الموضوع طلع فشنك وغير عنوانه خالص (حغير قريب) ..
انا قولت يا عم احمد هاتسيبك من التيدا خلاص وتعلى لقاشقاى ولا حاجة
ادخل الاقى فوانيس وابيض واسود !!!

عالعموم انا ميال اكتر للتانى الاسود لأنه مختلف وهايبان ان العربية متعدلة عكس الاول ..

سبونى اتمرد واكسر القاعدة مرة .. نفسى اعمل زى الاعضاء .. واعمل عناوين غريبة
نفسى اعلى فعلا واغير للقاشقاى .. احنا فى ديك الساعة

صحيح بمناسبة القاشقاى .. ما القاشقاى فيها زينون وكروم مش اسود ولايق عليها
ولا انت ايه رايك يا يوسف
عارف لو الفوانيس قدامى فى مصر والاتنين موجودين كان ممكن سهل اختار
لكن للاسف حجبهم من بره ومش قدام عنيه عشان ارتاح فى الاختيار

المشاركة الأصلية كتبت بواسطة opelawy

اولا بسم الله ما شاء الله يا احمد :)

ثانيا : الاسود طبعا .... لان لو اشتريت الاول مش هتحس بتغيير ( زيه زي الاصلي بس افتح )
و بعدين لا مؤاخدة عامل زي فوانيس ال128 او البيجو 504 الصيني :)

الاسود اشيك و اقيم

ثالثا سأللك عليهم الراجل قالي لو حصلهم اي حاجة و هما جايين هيشيلوه هما ثمنهم
يعني زي ما يكون في تأمين علي الشخنة ( فهمتني ؟؟ )
يلا يا بطل عايزين نشوف الحاجات حلوة بقي

ما تقلقش من موضوع الشحن .. الموقع موثوق فيه جدا .. وحتعامل مع شركة محترمة اللى قولتلك عليها .. ويجى براحته

المشاركة الأصلية كتبت بواسطة ahmed_su

يا راجل انا ادخل ابارك ...

قلت هايجيب الاسبورتاج ههههههههه

بص الاتنين حلوين كل واحد وليه مميزاته ...

انما عند التركيب الفعلى الرؤية هتتضح واكيد الفانوسين عند بائع واحد

ياريت تركب الاتنين فعليا واللى ترتحله اكتر كمل تركيبهم ويبقى اختيار على ارض الواقع

والف مبروك

واحشنى يا بوحميد جداااااا .. ونفسى اشوفك
انا لو حغير عربيتى مش حخرج من نيسان يا باشا .. الا لو كيا رشونى وجبولى سبورتاج هدية

موضوع الفوانيس انى اشوف الاتنين على ارض الواقع .. صعب .. لانهم مش موجودين فى مصر
وحتدوخ عليهم

المشاركة الأصلية كتبت بواسطة mmbadroo

فعلا" العنوان خدعنى يا أستاذ / أحمد وبعدين حضرتك أكيد عارف المثل ده الجوعان دائما بيحلم بسوق العيش
يعنى انا حلمت لمدة فانتو ثانية ان ممكن حضرتك تغير الإنتماء وتنفذ ....... مش هقدر اقول اكثر من كده علشان الجماعة حبيبنا بتوع نيسان ممكن يضربونى
واسمح لى انا شايف ان الفانوس الأسود افضل وشكله هجومى ويشعرك بالتغيير
مع خالص تحياتى

ياباشا احلامك اوامر .. ممكن اغير .. واجيب سبورتاج .. بس تكون هدية من الموقع او التوكيل
وساعتها حققلك احلامك
بالنسبالى على ارض الواقع .. صعب اخرج من نيسان واروح للاى فئة اخرى .. لانى ارتحت مع نيسان جدا .. ويارب يوعدنى بقاشقاى

المشاركة الأصلية كتبت بواسطة mohsunny2009

اولا الف ميروك مقدما يابوحميد على التعديل و ماشاء الله و لا قوه الا بالله على سيارتك
انا رأى الاسود اجمل على لون عربيتك و لو غيرت لون الشبكه الى كربون هاتبقى روعه
ثانيا ياريت تعملنا موضوع بالتعديلات المتاحه للصنى الشكل القديم لانى بفكر فى الموضوع ده من زمان و مش عارف بيتباع فين او التكلفه كام
فلو عملته مع صور مختلفه لا شكال فوانيس اماميه و خلفيه باسعارها هايكون موضوع فى الجون
و ياسلام ياعمده لو جبتلنا خصومات للمنتدى :b4_388:
اخيرا انا فعلا خدعت بعنوان الموضوع و دخلت بسرعه علشان اقولك القشقاى ياكبير انت عارف عشقى لها و ان شاء الله ربنا يكرمك بيها قريب بجانب المحبوبه تيدا

انوى انت بس .. وشوف عايز تعمل ايه مرحلة مرحلة .. وانا معاك
انما انزل اروح اجيب عروض .. حيكون صعب .. لان انا بتحرك واجيب عروض .. ومش بلاقى حد فى القسم بالعروض .. حتى لو كانت مجانية
ياراجل ده لغاية دلوقتى الناس مش عايزة تشارك فى المسابقة المجانية
حاجة تكسف يا دكتور محمد والله .. وتكسير مقاديف .. وخالى الدنيا تنام .. وكله بيتحمله الاعضاء لما الدنيا تنام

ولو انت عايز حاجة كلمنى وقولى وانا عنية ليك .. وتؤمرنى

المشاركة الأصلية كتبت بواسطة sehsss

يا عم أنا قولت انت هاتغير العربية وربنا فتحة عليك وهاتركب 128 هههههههههه

خالينى اقولك الاول حمد لله على السلامة وكفارة
اول ما تدخل وتشارك .. تقوم تعمل كدا معايا .. ماشى يا عم محمد
مالها ال128 والله عربية اسد .. وجميلة وتستحمل فى البلد دى ..
وبعدين ناوى اغير للصنى واديك التيدا .. ايه رايك