الموضوع: المتاهه

السلام عليكم احبابنا من اصحاب الخبرات وملاك الشيري a11 ::مش عارف اوصل لعنوان او رقم تليفون حد بيبيع كارتة كنترول الشيري اللونج وطبعا هي مانوال وهي مش على شفره يعني اى شيري مانوال 2006 اعتقد حيركب عليها وزيكون موثوق في بضاعته وسعرها...
--تايه برده في عنوان كهربائي علشان يضبط الضفيره بعد تركيب الكنترول(وددت لواني ساكن قريب من المهندس طارق اسيوط لانه قاللي ان فيه واحد فت عبقري لو الضفيره محروقه يعملها من تاني) وانا من اسكندريه لكن ممكن اتعب شويه واوصل للقاهره اخري وده لان لي قرايب هناك ممكن اترازل على حد فيهم مدة التصليح لو العربيه حتبات هناك وممكن ارجع اسكندريه لو المساله ازمت اوي...
---نفسي الاقي ميكانيكي بيحب مهنته لان فيه حاجات كتير تعتمد على الخبره والذكاء مش حيبينها الكمبيوتر حيعرفها الميكانيكي الشاطر مثل(درده بتحصل وانا سايق وخاصة على الثاني والثالت والرابع لما اكون مش قارص وربما في الخامس كمان ومخدتش بالي ومش عارف دي تخص الفتيس ولا الدبرياج ولا رجلي انا... بس دي دردره مش نخعه او تفتقه لاني لسه مغير الtps والايدل ) وسبب الشك في الدبرياج اني باسمع وانا واقف صوت تكتكه سريعه ولما ادوس على الدبرياج بتروح وقال لي الميكانيكي ان دي بليه او بلى في الدبرياج هل ده له علاقه بالدردره ولو سكت عليه ايه اللي ممكن يحصل .....كمان كل شويه الاقي الفتيس بينعم في الغيارات وكانه سايب ماعدا الاول بيعض ممكن ده يكون السبب هل ممكن الدردره تروح بعد تغيير الكارته فقط ... المشكله ان الميكانيكين عندنا في الاسكندريه ما بيفضلوش يشتغلوا فيها ولذلك ما بيبدعوش فيها.....انا ما بخرجش كتير بالعربيه يعني ممكن كل 3 ايام مره مثلا ده ممكن يكون السبب ...حاسس كده ان انا طولت عليكم بس معلهش ما انا مكتبتش من زمان فباخد حقي باثر رجعي بس والله يا جماعه الدردره بس هي اللي مضايقاني اوي ومش مهم الكارته اوي اهي العربيه ماشيه... وانا لا زلت احب العربيه اوي وفعلا زي ما قالوا إخوانا الثقات ان عمرها ما كسفتنا في مشوار (بفضل الله طبعا) ....كمان فيه حاجه مهمه جدا لما بندور العربيه حتى وهي سخنه ساعات بيفضل صوت الموتور عالي جدا لمده تصل 2 دقيقه وساعات اكتر بيبقى ال rpm على 3 تقريبا ايه الحل ...بالله عليكم اريد الخروج من المتاهه بما تستطيعون من توجيهات ونصائح بانتظار ردودكم وجزاكم الله خيرا

اخي العزيز شكرا لمشاركتك وعرض المشكلة بس انا عايز اوضح معلومة بسيطة ممكن تتوة عن اي حد وهي ان كنترول العربية الشيري تحديدا يختلف عن اي كنترول بتاع اي عربية لأنة كنترول مبسط جدا وظيفتة بس هي تشغيل الموتور يعني التحكم في بخ البنزين من الأنجكشن ومزامنة ضربات شرز الكهرباء بتاع البوجيهات والتحكم في تشغيل المراوح ورفع الأربي ام مع تشغيل التكييف وخفضة بعد بداية التشغيل
لكن في سيارات اخري يتم التحكم الكامل في كل شئ حتي انة ممكن ان تضع الكنترول علي جهاز كشف الأعطال ويفتح الأنوار ويشغل العددات ويشغل مراوح التبريد ويشغل انوار الشبورة ويعمل حاجات كتيرة مش موجودة في كنترول الشيري
والخلاصة ان مش كل مشكلة تحصل نقول انها كنترول في حساسات ممكن يكون فيها مشكلة وممكن تكون مش نضيفة مثلا واصوات في الموتور ممكن تكون بلي او تاكيهات او حاجات ميكانيكية تاني......دة للأفادة
شكرا
طارق اسيوط